សិល្បៈអន្តរជាតិ៖ អ្នកជំនាញជនជាតិថៃ អះអាង មិនមាន «គ្រូកាយកែវ» នៅក្នុងប្រវត្តិសាស្ត្រ មិនមានក្នុងសិលាចារឹកខ្មែរបុរាណ រូបភាពនៅលើជញ្ជាំងប្រាសាទកាលពី៤០០ឆ្នាំនៅលើជញ្ជាំងប្រាសាទអង្គរវត្តគឺមិនមែនជាស្លាបរបស់គ្រូកាយកែវ តែជារូបលោកតាមុនីឥសី(ផាយ)ក្រណាត់ ខណៈដែលអតីតសង្ឃល្បីឌឺដងថា កាន់តែវិកលចរិកមែនទែនហើយ ដែលយកឈាមឆ្កែ-ឆ្មាទៅបូជា។
ថ្មីៗនេះនៅក្នុងប្រទេសថៃមានរឿងគួរឱ្យចាប់អារម្មណ៍មួយដោយសារតែមានការឆ្លាក់រូបចម្លាក់ធំខ្ពស់ដើម្បីសម្រាប់ជាទីសក្ការៈបូជាដោយមានឈ្មោះថាព្រះគ្រូកាយកែវ។ រូបចម្លាក់ដែលត្រូវបានអ្នកមានជំនឿនាំគ្នាទៅគោរពបូជាភ្លូកទឹក-ភ្លូកដីនេះ ក៏មានអ្នកដែលមិនយល់ស្របមួយចំនួនបានព្យាយាមជជីកវែកញែកនិងស្រាវជ្រាវរកប្រភពកំណើតពិតប្រាកដរបស់ព្រះគ្រូកាយកែវអង្គនេះ តើពិតជាមានដើមកំណើតមកពីកម្ពុជា ពិតមែនឬ?
សម្រាប់ករណីនេះមានការលើកឡើងខុសៗគ្នាពីអ្នកជំនាញក្ដី សាស្ត្រាចារ្យប្រវត្តិសាស្ត្រនៅក្នុងប្រទេសថៃក្ដី ឬក៏អ្នកដែលដឹងពីប្រវត្តិរបស់គ្រូកាយកែវនេះក្ដី។
សាស្ត្រាចារ្យប្រវត្តិសាស្ត្រថៃមួយរូបឈ្មោះ ធុងថង ចាន់ស្រាងស៊ុ (ธงทอง จันทรางศุ )បានបង្ហោះថា ប៉ុន្មានថ្ងៃមកនេះមានការចាប់អារម្មណ៍រឿងគ្រូកាយកែវ ជារូបចម្លាក់ដែលទទួលបានការគោរពបូជានៅក្នុងចំណោមមនុស្សមួយក្រុម ដោយបានឮតៗគ្នាគ្រូកាយកែវគឺជាគ្រូរបស់ព្រះបាទជ័យវរ័ន្មទី៧ ប៉ុន្តែមិនមានមូលដ្ឋានឬភស្តុតាងអះអាងជាសិលាចារិកឬមានប្រភពមកពីណាឱ្យពិតប្រាកដនោះឡើយ។ ជំនឿចំពោះវត្ថុស័ក្តិសិទ្ធិថ្វីត្បិតតែមិនខុសច្បាប់ តែអាចប្រាប់បានពីភាពមិនច្បាស់លាស់និងមិនរឹងមាំរបស់ចិត្តមនុស្សក្នុងសង្គម បើនិយាយឱ្យចំៗគឺបែបមិនក្រែងចិត្តគឺចង់ប្រាប់ថាមានកម្រិតខ្ពស់។
ខណៈដែលអតីតសង្ឃមានឈ្មោះល្បីមួយរូបបានចេញមកដាស់តឿនដល់ជនជាតិថៃដែលមានជំនឿចំពោះគ្រូកាយកែវ ដោយភ្ជាប់ជាមួយនឹងរូបភាពថតចេញពីគណនីហ្វេសប៊ុកដែលបានលើកឡើងថា៖ «ខ្ញុំជាខ្មែរបុរីរ៉ាំ នេះមកពីសែស្រឡាយខ្មែរអាចដឹងខ្លះៗរឿងផ្លូវងងឹត បើអ្នករាសីចុះ ជោគជតាមិនល្អ ឬមានគ្រោះកម្មអ្វី កុំទៅសុំពរជ័យពីវត្ថុនេះឱ្យសោះ ព្រោះគេគឺជាបក្សីខ្មោច ឬភាសាខ្មែរហៅក្រាប ស្រែកហៅរកវិញ្ញាណ ឬបើទទួលបានផលសម្រេចណាមួយពីគេ ត្រូវតែតបស្នងគេឱ្យឆ្អែត បើមិនឆ្អែតទេគេនឹងស៊ីអ្នកដែលចិញ្ចឹមនោះ ខ្មែរមានជំនឿថាគេជាអ្នកតំណាងឱ្យយមទូត។
ចំណែកឯជំនួយការសាស្ត្រាចារ្យ ក័ងវុន ខាត់ឈិម៉ា ( Dr.กังวล คัชชิมา ) សាស្ត្រាចារ្យជំនាញសិលាចារិកខ្មែរបុរាណ នៃសកលវិទ្យាល័យសិល្បករ បានឱ្យដឹងថា ប្រវត្តិសិលាចារិកខ្មែរបុរាណ បើមើលថយក្រោយនៅសម័យព្រះបាទជ័យវរ័្មនទី៧ ឬប្រមាណជាង៨០០ឆ្នាំមុន មិនប្រាកដឃើញភស្តុតាងឬស្លាកស្នាមប្រវត្តិសាស្ត្រទាក់ទងនឹង អាទិទេពបិសាច ឬបរមគ្រូរបស់ព្រះអង្គដែលមានលក្ខណៈរូបរាងកាយដូចជាគ្រូកាយកែវនោះឡើយ ក្នុងសម័យព្រះបាទជ័យវរ័្មនទី៧ ដោយគ្រូដែលមានជាប់ឈ្មោះនៅក្នុងសិលាចារឹកមានតែ២នាក់ប៉ុណ្ណោះ។
យ៉ាងណាមិញរឿងនេះនៅតែជារឿងរសើបនិងកំពុងមានការតាមដាននៅក្នុងប្រទេសថៃ ព្រោះមានទាំងអ្នកមានជំនឿនិងអ្នកដែលមិនជឿ ហើយអ្នកដែលមិនជឿ ហាក់មានប្រៀបជាងព្រោះមានទាំងអំណះអំណាងច្បាស់លាស់ និងឯកសារជាតឹកតាងបញ្ជាក់ថា មិនមានឃើញប្រវត្តិឬប្រភពរបស់គ្រូកាយកែវនៅក្នុងប្រវត្តិសាស្ត្រកម្ពុជានោះឡើយ៕