សិល្បៈអន្តរជាតិ៖ តារាចម្រៀងស្រី Britney Spears និងស្វាមី Sam Asghari បានសម្រេចចិត្តបញ្ចប់ចំណងអាពាហ៍ពិពាហ៍ ហើយដើរផ្លូវរៀងៗខ្លួនវិញ បន្ទាប់ពីប្រើប្រាស់ឈ្មោះជាប្ដីប្រពន្ធបានត្រឹម១ឆ្នាំនិង២ខែប៉ុណ្ណោះ។
យោងតាមការផ្សាយរបស់សារព័ត៌មាន TMZ តារាចម្រៀងស្រីវ័យ៤១ឆ្នាំ និងអតីតស្វាមីប្អូនមួយជាងមួយជួររបស់ខ្លួន Sam Asghari សម្រេចចិត្តបញ្ចប់ចំណងអាពាហ៍ពិពាហ៍ដោយសារតែកើតមានទំនាស់ពាក្យសម្ដី ព្រោះភាគីអតីតស្វាមី Britney ជឿពាក្យចចាមអារ៉ាមថាប្រពន្ធរបស់ខ្លួន គឺជាមនុស្សមានចិត្តមិនស្មោះត្រង់។ ប្រភពព័ត៌មានដដែលបានបន្ថែមទៀតថា បុរសវ័យ២៩ឆ្នាំ រូបនេះបានរើអីវ៉ាន់ចេញពីផ្ទះដែលពួកគេកំពុងរស់នៅ ទៅនៅកន្លែងផ្សេងថែមទៀតផង ខណៈភាគីទាំងពីរកំពុងដំណើរការលែងលះគ្នាទៅតាមនីតិវិធី។
មែនទែនទៅចំណងស្នេហ៍របស់ Britney និង Sam បានបង្កើតឡើងតាំងពីឆ្នាំ ២០១៦ មក ក្រោយសេពគប់គ្នា៦ឆ្នាំ អ្នកទាំងពីរបានសម្រេចចិត្តដឹកដៃគ្នាចូលរោងការនៅខែ មិថុនា ឆ្នាំ២០២២ មុននឹងបែកបាក់គ្នានៅក្នុងឆ្នាំ២០២៣នេះ៕
