សិល្បៈអន្តរជាតិ៖ ថ្មីៗនេះលេចវត្តមានតារាចម្រៀងមុខសង្ហា Cai Xukun ជាមួយនឹងផលិតករល្បីប្រចាំផលិតកម្ម YG ដែលធ្វើឱ្យមានអ្នកកើតជាចម្ងល់ថា តិចលបុរសសង្ហារូបនេះងាកទៅប្រឡូកក្នុងរង្វង់សិល្បៈ K-pop ខណៈការងារសិល្បៈក្នុងប្រទេសចិនរបស់លោកកំពុងជាប់គាំង។
កាលពីជាង ២ខែមុន ពោលនៅក្នុងខែមិថុនា ឆ្នាំ២០២៣ តារាចម្រៀងដ៏ល្បីរបស់ចិនគឺ Cai Xukun បានរងរឿងអាស្រូវបង្ខំមិត្តស្រីឱ្យរំលូតកូន ដែលរឿងដ៏ភ្ញាក់ផ្អើលនេះបានធ្វើឱ្យបុរសសង្ហារូបនេះរងនូវការរិះគន់ និងត្រូវបានដាក់បម្រាមមិនឱ្យចេញមុខតាមកញ្ចក់ទូរទស្សន៍ ឬកម្សាន្តផ្សេងៗនៅក្នុងប្រទេសចិននោះឡើយ។
ថ្វីត្បិតតែបែបនេះតែ Ca Xukun កាលណោះកំពុងធ្វើការប្រគំតន្ត្រីនៅក្រៅប្រទេស មុននឹងបាត់មុខចេញពីគ្រប់ប្រព័ន្ធផ្សព្វផ្សាយ ក៏ដូចជាក្នុងការងារសិល្បៈផ្សេងៗ។
យ៉ាងណាមិញស្រាប់តែកាលពីថ្ងៃទី២១ ខែសីហា ឆ្នាំ២០២៣ កន្លងទៅនេះ តារាចម្រៀងដែលរងនូវរឿងអាស្រួវដ៏ច្រើនសន្ធឹកសន្ធាប់រូបនេះ បានបង្ហោះរូបថតមួយសន្លឹកនៅលើគណនី Instagram របស់ខ្លួនជាមួយនឹងមនុស្សជំនិតរបស់ផលិតកម្ម YG Entertainment ដោយគេដឹងថាបុរសរូបនោះគឺជាផលិតករដ៏ល្បីរបស់ផលិតកម្មយក្សកូរ៉េមួយនេះផងដែរ។
Cai Xukun បានសរសេររៀបរាប់ថា៖ «អរគុណកុំភ្លេចរង់ចាំតាមដានតន្ត្រីរបស់ពួកខ្ញុំ»តាមរយៈរូបភាពនេះបានធ្វើឱ្យអ្នកនិយមតាមដានរឿងរ៉ាវសិល្បៈ និងអ្នកលេងបណ្ដាញសង្គមដាក់ការសង្ស័យថា Cai Xukun អាចនឹងមានការងារសិល្បៈថ្មីណាមួយនៅក្នុងប្រទេសកូរ៉េខាងត្បូងដោយចាប់ដៃជាមួយនឹងផលិតកម្ម YG ត្បិតអីការងារសិល្បៈរបស់លោកនៅក្នុងប្រទេសចិនកំពុងស្ថិតក្នុងដំណាក់កាលផ្អាកជាបណ្ដោះអាសន្ន។
រំលឹកឡើងវិញ Cai Xukun បានជាប់ពាក់ព័ន្ធនឹងរឿងអាស្រូវ បង្ខំឱ្យមិត្តស្រីរំលូតកូន ព្រមទាំងទាក់ទងនឹងអនីតិជន ប៉ុន្តែរឿងរ៉ាវទាំងអស់នេះត្រូវបានសាមីខ្លួនចេញមកបដិសេធ ព្រមទាំងគំរាមប្ដឹងបកចំពោះអ្នកដែលយកព័ត៌មានមិនពិតនេះមកផ្សព្វផ្សាយផងដែរ៕