សិល្បៈអន្តរជាតិ៖ តារាសម្ដែងល្បីហុងកុងវ័យ៤១ឆ្នាំ បានអញ្ជើញជាកិត្តិយសក្នុងកម្មវិធីកម្សាន្តបែប Variety មួយរបស់ទូរទស្សន៍ TVB មានឈ្មោះថា «Drive U To The Hell» កាលពីពេលថ្មីៗនេះ ដោយនៅក្នុងវេលានោះលោកបានរៀបរាប់រឿងរន្ធត់ដែលលោកបានជួបប្រទះនៅប្រទេសម៉ាឡេស៊ីខណៈលោកទៅកម្មវិធីមួយជាមួយនឹងលោក Moses Chan ។
យោងតាមការផ្សាយរបស់គេហទំព័រព័ត៌មានរបស់សិង្ហបុរី 8days លោក Bosco និង Moses Chan វ័យ 51ឆ្នាំ បានទៅចូលរួមក្នុងវិធីមួយ ដោយអ្នកទាំងពីរត្រូវបានគេដាក់ឱ្យស្នាក់នៅបន្ទប់ប្រណិតនៃសណ្ឋាគារកម្រិតល្អបំផុតក្នុងតំបន់ Ipoh ។ ដោយបន្ទប់អ្នកទាំងពីរគេគឺស្ថិតនៅត្រង់ជ្រុងនៃអគារដែលត្រូវបានគេមានជំនឿថាមានវត្ថុកខ្វក់ អមនុស្សនិងរឿងអបិយជំនឿផ្សេៗ ប៉ុន្តែកាលណោះនៅពេលទទួលបានបន្ទប់លោកមិនបានគិតច្រើននោះទេ ហើយអ្នកលោកក៏ទទួលកូនសោរនិងចូលទៅរៀបចំបន្ទប់។
ពេលចូលបន្ទប់លោកបានគោះទ្វារមុននឹងចូល តែពេលដើរចូលក្នុងបន្ទប់លោកមានអារម្មណ៍ដូចជាបាត់អ្វីម្យ៉ាង ដំបូងលោកមិនអាចបើកភ្លើងបន្ទប់បាន លោកស្មានថាអំពូលមានបញ្ហា ហើយលោកក៏បន្តដើរចូលទៅក្នុងបន្ទប់ តែកាន់តែដើរចូលទៅលោកកាន់តែមានអារម្មណ៍ត្រជាក់និងព្រឺសំបុរ ពេលនោះស្រាប់តែលោកឮសូរសំឡេងប៉ាំង ចំណែកភ្លើងអំពូលស្រាប់តែភ្លឺ។
Bosco ភ័យយ៉ាងខ្លាំងលោកងាកមើលទៅខាងក្រៅឃើញអង្គរក្សនៅក្រៅបន្ទប់មានទឹកមុខស្លេកស្លាំង ហើយគេអត់បានចូលមកក្នុងបន្ទប់ជួយឆែកឆេរសុវត្ថិភាពឱ្យលោកដូចរាល់ដងនោះឡើយ។ ពេលនោះឯងដែល Bosco ដឹងថាមានអ្វីចម្លែកកើតឡើង លោកប្រញ៉ាប់យកកាបូបចេញពីបន្ទប់ រឿងដែលកំប្លែងបំផុតនោះលោក បានជួប Moses Chan ប្រញ៉ាបប្រញ៉ាល់ ចង់សុំប្ដូរបន្ទប់ដូចគ្នា។
ថ្វីត្បិតពេលនោះអ្នកទាំងពីរមិនបាននិយាយអ្វីប៉ុន្តែក្នុងចិត្តបានដឹងស្រាប់ហើយថាពួកគេបានជួបរបស់ពិតនៅម៉ាឡេស៊ីហើយ ដូច្នេះពួកក៏ប្រញាប់ទៅ Lobby ដើម្បីសុំប្ដូរបន្ទប់។ «ខ្ញុំរីករាយណាស់ដែលអ្នកឱ្យបន្ទប់ប្រណិតមកខ្ញុំសំរាក ប៉ុន្តែមិនចាំបាច់នោះទេ សូមឱ្យបន្ទប់ធម្មតាៗមកពួកខ្ញុំគេងបានហើយ»។
ជាចុងក្រោយលើកឡើងថា «សូម្បីតែអង្គរក្សដែលមកចាំការពារសុវត្ថិភាពឱ្យលោកក៏ដឹងថាបន្ទប់នោះមានខ្មោចលងដែរ»៕