ថៃបំបែកកំណត់ត្រាឆ្លងប្រចាំថ្ងៃខណៈអ្នក ឆ្លង កូវីដ-១៩ថ្មីមានការកើនឡើងខ្ទងម៉ឺននាក់ ត្រឹម២៤ម៉ោង

ថ្ងៃព្រហស្បតិ៍ ទី២១ ខែកក្កដា ឆ្នាំ២០២១នេះ ​ក្រសួងសុខាភិបាលថៃ បានរាយការណ៍ពីការរកឃើញករណីឆ្លងជំងឺ COVID-19 ថ្មីៗចំនួន ១៣,៦៥៥ករណីបន្ថែម ដែលជាចំនួនករណីឆ្លងប្រចាំថ្ងៃខ្ពស់បំផុត មិនធ្លាប់មានពីមុនមក ខណៈមនុស្សចំនួន ៨៧នាក់ទៀតបាត់បង់ជីវិត។ នេះបើយោងតាមការចេញផ្សាយដោយសារព័ត៌មាន Bangkok Post។

ក្នុងចំណោមករណីឆ្លងថ្មីៗខាងលើនេះ មាន ១៣,១១០ករណី ត្រូវបានរកឃើញនៅលើប្រជាជនថៃទូទៅ ខណៈ ៥៤៥ករណីទៀត ត្រូវបានរកឃើញនៅលើអ្នកទោសតាមពន្ធនាគារ និងជាច្រើនករណីទៀតនៅតាមបណ្ដាខេត្តនានារបស់ប្រទេសថៃ។ រហូតមកទល់ពេលនេះ ថៃបានកត់ត្រានូវករណីឆ្លងសរុប នៅទូទាំងប្រទេសចំនួន ៤៥៣,១៣២ករណី ក្នុងនោះមានអ្នកស្លាប់ ៣,៦៩៧នាក់ និងអ្នកជាសះស្បើយ ៣១២,៣៧៧នាក់។

កាលពីថ្ងៃពុធសប្តាហ៍នេះ អាជ្ញាធរសុខាភិបាលថៃបានសុំអភ័យទោស ចំពោះភាពយឺតយ៉ាវរបស់ខ្លួន ក្នុងការអនុវត្តយុទ្ធនាការចាក់វ៉ាក់សាំង ស្ថិតនៅចំពោះមុខការឆ្លងរាតត្បាត វីរុស COVID-19 បម្លែងថ្មី Delta ដែលមានសមត្ថភាពចម្លងរហ័ស និងងាយបង្កឲ្យអ្នកជម្ងឺឈឺធ្ងន់ រហូតដល់បាត់បង់ជីវិត។ ខណៈដែលប្រទេសថៃបានស្ថិតនៅលើលេខរៀងទី ៥០ ដែលជាប្រទេសមានចំនួនអ្នកឆ្លងសរុប ៤៥៣,១៣២នាក់។

ប្រទេសថៃបានសន្យាទៀតថា ខ្លួននឹងសហការជាមួយកម្មវិធីចែកចាយវ៉ាក់សាំងអន្តរជាតិ Covax ដែលគាំទ្រដោយ UN ដើម្បីទទួលបានវ៉ាក់សាំងគ្រប់គ្រាន់នៅឆ្នាំ២០២២។

គួរជម្រាបថា គិតត្រឹមដើមសប្តាហ៍នេះ ថៃសម្រេចបានការចាក់វ៉ាក់សាំងជូនប្រជាជនបានចំនួន ១៤.៨លានដូស ក្នុងនោះប្រជាជន ៣.៥១លាននាក់ បានទទួលការចាក់គ្រប់ដូស៕

ប្រែសម្រួលដោយ៖ ជុំពេជ្រវណ្ណារ៉ា