នាយករដ្ឋមន្ត្រីផុតអាណត្តិ លោក ប្រាយុទ្ធ ចាន់អូចា បានធ្វើជាប្រធានកិច្ចប្រជុំគណៈរដ្ឋមន្ត្រីជាលើកចុងក្រោយរបស់លោកកាលពីថ្ងៃអង្គារ ដោយនិយាយថា លោកពេញចិត្តនឹងការអនុវត្តរបស់រដ្ឋាភិបាល ក្នុងរយៈពេល ៤ឆ្នាំកន្លងមកនេះ។ នេះបើយោងតាមការចេញផ្សាយដោយសារព័ត៌មាន Bangkok Post នាថ្ងៃពុធ ទី៣០ ខែសីហា ឆ្នាំ២០២៣។
បន្ទាប់ពីជំនួបនោះ លោកឧត្តមសេនីយ៍ ប្រាយុទ្ធ បានថតរូបជាមួយគណៈរដ្ឋមន្ត្រីចាស់ៗ មន្ត្រីរដ្ឋាភិបាល និងកម្មករ បន្ទាប់មកបានញ៉ាំអាហារថ្ងៃត្រង់ជាមួយគ្នា។
នៅពេលអ្នកកាសែតសួរថា តើលោកចង់ឲ្យរដ្ឋាភិបាលថ្មីធ្វើអ្វីខ្លះ? លោក ប្រាយុទ្ធ បានឆ្លើយថា៖ «គួរទុកឲ្យរដ្ឋាភិបាលថ្មីធ្វើអ្វីតាមការយល់ឃើញរបស់ពួកគេ»។
បន្ទាប់មកនៅពេលអ្នកកាសែតសួរថា តើលោកគ្រោងនឹងធ្វើអ្វីបន្ទាប់ពីចេញពីតំណែង? លោក ប្រាយុទ្ធ បាននិយាយថា «ខ្ញុំចង់សម្រាក និងចំណាយពេលច្រើនជាមួយគ្រួសាររបស់ខ្ញុំ។ ខ្ញុំនឹងក្លាយជាពលរដ្ឋសាមញ្ញម្នាក់ដោយគ្មានឯកសិទ្ធិពិសេស»។
លោក ប្រាយុទ្ធ បានបញ្ជាក់ថា ក្នុងរយៈពេល ៤ឆ្នាំកន្លងមកនេះ សមាជិកគណៈរដ្ឋមន្ត្រីទាំងអស់បានធ្វើការជាមួយគ្នាយ៉ាងល្អ ហើយពួកគេតែងតែបានបញ្ចេញមតិដោយហេតុផល។
ក្នុងកិច្ចប្រជុំគណៈរដ្ឋមន្រ្តី លោក ប្រាយុទ្ធ និងមន្រ្តីទាំងអស់បានពេញចិត្ត និងសប្បាយរីករាយ ជាមួយនឹងការតែងតាំងនាយករដ្ឋមន្រ្តីថ្មី ហើយពួកគេជឿជាក់លើការដឹកនាំរបស់នាយករដ្ឋមន្រ្តីថ្មី ដែលនឹងតម្រង់ផ្លូវឆ្ពោះទៅកាន់ភាពជោគជ័យ និងការអភិវឌ្ឍន៍។
តាំងពីដើមមក នាយករដ្ឋមន្រ្តីថ្មីទី៣០ របស់ប្រទេសថៃ លោក ស្រេតថា ថាវីស៊ីន មានគំនិតចង់បញ្ចប់ភាពលំអៀងខាងនយោបាយ និងដើរចេញពីជម្លោះ។ លោក ស្រេតថា បានផ្តល់ដំបូន្មានមួយចំនួនថា៖ «ភាពឧស្សាហ៍ព្យាយាម ស្មោះត្រង់ អត់ធ្មត់ ប្រុងប្រយ័ត្ន និងតម្លាភាព គឺជាភារកិច្ចរបស់គណៈរដ្ឋមន្ត្រី។ អ្វីៗនឹងដំណើរការដោយរលូន ប្រសិនបើធ្វើតាមទាំងនេះ»។
នៅក្នុងសារបង្ហោះនៅលើបណ្ដាញសង្គម Facebook របស់លោកកាលពីថ្ងៃសៅរ៍ លោក ប្រាយុទ្ធ បានពិណ៌នាពីរយៈពេល៩ឆ្នាំ ក្នុងការកាន់តំណែងជានាយករដ្ឋមន្រ្តីរបស់ប្រទេសជារយៈពេលដ៏មានន័យ និងមិនអាចបំភ្លេចបានបំផុតនៃជីវិតរបស់លោក។ ក្នុងនាមលោកជានាយករដ្ឋមន្ត្រី លោកបានចំណាយពេលវេលារបស់ខ្លួនដើម្បីការពារប្រទេស ដែលលោកគិតថាបានរីកចម្រើនយ៉ាងលឿន ហើយឥឡូវនេះ សេដ្ឋកិច្ចប្រទេសគឺអាចស្មើនឹងប្រទេសជាច្រើនទៀត។
គួររំលឹកថា លោក ប្រាយុទ្ធ បានឡើងកាន់អំណាច បន្ទាប់ពីធ្វើរដ្ឋប្រហារយោធាទម្លាក់រដ្ឋាភិបាលជាប់ឆ្នោតរបស់គណបក្សភឿថៃដឹកនាំដោយលោកស្រី យីងឡាក់ ស៊ីណាវ៉ាត់ត្រា កាលពីខែឧសភា ឆ្នាំ២០១៤។ ប៉ុន្តែនៅឆ្នាំ២០២៣នេះ លោកបានប្រកាសចូលនិវត្តន៍ពីឆាកនយោបាយ ក្រោយគណបក្សថៃរួបរួមជាតិ ដែលមានលោកជាប្រធានបក្ស រងការបរាជ័យយ៉ាងធ្ងន់ធ្ងរក្នុងការបោះឆ្នោតសកលកាលពីថ្ងៃទី១៤ ខែឧសភា កន្លងទៅ៕