ទីក្រុងភ្នំពេញ នឹងធ្វើម្ចាស់ផ្ទះរៀបចំព្រឹត្តិការណ៍ការប្រកួតកីឡាវាយកូនបាល់ជើងឯកអាស៊ី ឆ្នាំ២០២៣ (Inaugural Asian Junior Championship 2023) នឹងធ្វើឡើងចាប់ពីថ្ងៃទី៤ ដល់ថ្ងៃទី៨ ខែកញ្ញា ឆ្នាំ២០២៣ នៅពហុកីឡដ្ឋានជាតិមរតកតេជោ។ នេះបើយោងតាមលោក ជា ពៅ អគ្គលេខធិការរង នៃសហព័ន្ធកីឡាវាយកូនបាល់កម្ពុជា ប្រាប់ Cambodia 2023។
លោក ជា ពៅ អគ្គលេខធិការរង នៃសហព័ន្ធកីឡាវាយកូនបាល់កម្ពុជា បានប្រាប់ឲ្យដឹងថា ព្រឹត្តិការណ៍ប្រកួតជើងឯកអាស៊ី ឆ្នាំ ២០២៣ (Inaugural Asian Junior Championship 2023) មានសារសំខាន់ សម្រាប់ការរីកចម្រើន នៃកីឡាវាយកូនបាល់ ការកំណត់អត្តសញ្ញាណទេពកោសល្យ និងការបង្កើតបំពង់បង្ហូរដ៏រឹងមាំ នៃអត្តពលិកជំនាញ ដែលអាចបន្តដើម្បីតំណាងប្រទេស របស់ពួកគេក្នុងកម្រិត នៃការប្រកួតជាច្រើន។
លោកអគ្គលេខធិការរងបានបន្តថា ការប្រកួតក៏រួមចំណែកដល់ការអភិវឌ្ឍទូទៅនៃកីឡាករ-កីឡាការិនីវ័យក្មេង ការបង្កើនគុណតម្លៃនៃវិន័យ ការតស៊ូ និងការងារជាក្រុមដែលពង្រីកលើសពីពិភពលោកនៃកីឡាវាយកូនបាល់។
លោកបានបន្ថែមទៀតថា កីឡាករ-កីឡាការិនីកំពូលអាស៊ី នឹងទទួលបានឱកាសប្រកួតក្នុងព្រឹត្តិការណ៍នេះ នឹងផ្តល់ពិន្ទុ ATF 14U ខ្ពស់បំផុត និងឱកាសលេងក្នុងកម្រិតខ្ពស់បំផុត ។ការប្រកួតនេះមានកីឡាករចំនួន ២៤នាក់ និងកីឡាការិនី ២៤ នាក់នឹងត្រូវបានជ្រើសរើសសម្រាប់ព្រឹត្តិការណ៍នេះ។
កីឡាករចំនួន ៨ នាក់ និងកីឡាការិនី ៨ នាក់ ត្រូវជ្រើសរើសក្នុងព្រឹត្តិការណ៍ Grade A ដែលធ្វើឡើងនៅម៉ោង ៤។ កីឡាករនឹងទទួលបានឱកាសចូលរួមជាផ្នែក ITF 14U Team ទៅ Florida 2023, ITF/ATF Regional team ប្រចាំខែមករា ឆ្នាំ ២០២៤ និង Elite 14U Asia-Pacific Trophy នៅប្រទេសអូស្រ្តាលី។
ការប្រកួតនេះមាន ៤ វិញ្ញាសា គឺវិញ្ញាសាឯកត្តជនបុរស វិញ្ញាសាឯកត្តជននារី វិញ្ញាសា វាយគូបុរស និងវិញ្ញាសាវាយគូនារី ។ ចំណែកម្ចាស់ផ្ទះកម្ពុជាបានបញ្ជូនកីឡាករវ័យក្មេង ២ រូបប្រកួតលើ ២ វិញ្ញាសា គឺវិញ្ញាសាឯកត្តជនបុរស និងវិញ្ញាសាឯក្កតវាយគូបុរស ដូចជាកីឡាករ ពៅ វីរៈ និងកីឡាករ សភ្ត័ រតនៈ៕
