សិល្បៈអន្តរជាតិ៖ កម្មវិធីទូរទស្សន៍ចិនបានចាក់ផ្សាយរឿងរ៉ាវស្នេហាស្មោះស្ម័គ្ររវាងគូស្វាមីភរិយាមួយគូ ដែលធ្វើឱ្យទស្សនាមានការចាប់អារម្មណ៍ជាខ្លាំង តើព្រោះតែហេតុអ្វី? នោះក៏ព្រោះទោះជាប្រពន្ធបានប្រែប្រួលសម្រស់ពីស្ត្រីវ័យ២៧ឆ្នាំ ទៅជាលោកយាយ ៨០ឆ្នាំ ដែលមានមុខមាត់ជ្រីវជ្រួញ ប៉ុន្តែស្វាមីនៅតែស្រលាញ់និងលើកទឹកចិត្តភរិយាដដែល។
រឿងរ៉ាវដ៏គួរឱ្យចាប់អារម្មណ៍នេះបានកើតឡើងជាច្រើនឆ្នាំមុន ដោយកាលណោះស្ត្រីជាភរិយាមានវ័យ២៧ឆ្នាំ ក្រោយរៀបការនិងផ្ដល់កំណើតកូនប្រុសដំបូងរួចបានត្រឹមតែ២ខែ ស្រាប់តែរាងកាយមានការប្រែប្រួលយ៉ាងចម្លែក។ នាងមានអារម្មណ៍អស់កម្លាំង ល្វើយល្ហិតល្ហៃ រហូតថ្ងៃមួយក្រោយពេលឆ្លុះកញ្ចក់នាងស្រាប់តែយំជាខ្លាំងព្រោះមិនអាចទទួលយកមុខខ្លួនឯងដែលជ្រីវជ្រួញដូចជាលោកយាយចាស់វ័យ៨០ឆ្នាំនៅក្នុងកញ្ចក់។ នាងបានព្យាយាមប្រើប្រាស់គ្រឿងសំអាង ដើម្បីជួយបិទបាំងស្នាមជ្រួញ ប៉ុន្តែមិនអាចជួយ ហើយថែមទាំងធ្វើឱ្យសភាពស្បែកមុខនាងយ៉ាងយឺនជាងមុនទៀត រហូតលែងហ៊ានឆ្លុះមើលមុខខ្លួនឯងក្នុងកញ្ចក់។
ក្រោយមានអាការៈបែបនេះ នាងត្រូវបានអ្នកផងនិន្ទា ធ្វើឱ្យមានអារម្មណ៍តូចចិត្តជាងខ្លាំង សូម្បីដាក់ពាក្យធ្វើការក៏ពិបាកដោយសារតែមុខខាងក្រៅខុសពីអាយុពិតពេក ហេតុនេះនាងត្រូវបានក្រុមហ៊ុនជាច្រើនបដិសេធ។ ឈឺចាប់ជាងត្រូវគេបដិសេធការងារមិនស្មើនឹងកូនប្រុសរបស់នាងមិនព្រមឱ្យម្ដាយនៅក្បែរ ព្រោះតែខ្លាចមុខម្ដាយ។ រឿងទាំងអស់នេះធ្វើឱ្យនាងបាក់ទឹកចិត្តហើយគិតចង់បញ្ចប់ជីវិតខ្លួនឯងម្ដងៗ តែជាសំណាងល្អ ព្រោះនៅក្នុងគ្រោះលើកនេះ នាងមានស្វាមីល្អដែលរង់ចាំនៅក្បែរនិងលើកទឹកចិត្តនាងជានិច្ច។ ដំបូងឡើយពេលដឹងថាខ្លួនមានអាការៈខុសប្រក្រតី នាងធ្លាប់ស្នើសុំលែងលះជាច្រើនដង ព្រោះមិនចង់ឱ្យខ្លួនក្លាយជាបន្ទុក តែស្វាមីនាងមិនយល់ស្រប ហើយថែមទាំងមិនធ្លាប់នឿយហត់នឹងនាំនាងទៅព្យាបាលតាមមន្ទីរពេទ្យផ្សេងៗនោះឡើយ។
ទីបំផុតលទ្ធផលបង្ហាញឱ្យឃើញថា សុខភាពរាងកាយនាងនៅរឹងមាំល្អណាស់ តែមូលហេតុដែលនារីក្នុងវ័យ២០ឆ្នាំប្រែប្រួលសភាពស្បែកបែបនេះដោយសារតែនាងកើតមានជំងឺចាស់មុនវ័យ ឬជំងឺមុខចាស់ ដែលធ្វើឱ្យមុខអ្នកជំងឺជ្រីវជ្រួញ មើលទៅចាស់ជាងវ័យ ហើយបើតាមរបាយការណ៍អ្នកកើតជំងឺនេះមានត្រឹម១០នាក់ប៉ុណ្ណោះលើពិភពលោក។
បន្ទាប់ពីសាច់រឿងរបស់នាងត្រូវបានផ្សព្វផ្សាយលើកញ្ចក់ទូរទស្សន៍ នាងក៏ទទួលបានការជួយវះកាត់កែសម្ផស្សឱ្យ Free ដោយនាងបានឆ្លងកាត់ការវះកាត់ចំនួន៤ដង ការវះកាត់ម្ដងៗមានចំនួនជាច្រើនម៉ោង ហើយត្រូវចាក់ម្ជុលដេរលើផ្ទៃមុខជាង២០០ថ្នេរ ព្រមទាំងប្រើពេលច្រើនខែទម្រាំសះស្បើយ។
ថ្វីត្បិតការធ្វើដំណើរពីមួយកន្លែងទៅមួយកន្លែងដើម្បីព្យាបាលនាងមានការលំបាក និងប្រើពេលយូរ ប៉ុន្តែក្រោយពីវះកាត់រួចផ្ទៃមុខនាងបានប្រសើរឡើងធ្វើឱ្យនាងមើលឃើញពីតម្លៃខ្លួនឯងឡើងវិញ។ ចំណែកស្វាមីរបស់នាងមិនដែលបោះបង់ចោលភរិយា ហើយមើលថែទាំនាងយ៉ាងល្អ រហូតមកដល់ពេលនេះអ្នកទាំងពីរមានកូនទីពីរជាមួយគ្នាហើយ ដោយសមាជិកទាំង៤នាក់បន្តរស់នៅយ៉ាងមានសុភមង្គលជាមួយគ្នា៕
