ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានស្នើថ្នាក់ដឹកនាំ និងមន្រ្តីពាក់ព័ន្ធ សិក្សាឡើងវិញអំពីតម្លៃនៃការធ្វើលិខិតឆ្លងដែន ដើម្បីឈានទៅបញ្ចុះឱ្យបានទាបជាតម្លៃបច្ចុប្បន្ន។ ការណែនាំរបស់ប្រមុខក្រសួងមហាផ្ទៃ បានធ្វើឡើងក្នុងពិធីសំណេះសំណាលជាមួយថ្នាក់ដឹកនាំ និងមន្រ្តីជាន់ខ្ពស់ក្រសួងមហាផ្ទៃ នាព្រឹកថ្ងៃទី៤ ខែសីហា ឆ្នាំ២០២៣នេះ។
ឯកឧត្តមបានមានប្រសាសន៍ថា«តម្លៃហាក់ដូចមានភាពខ្ពស់ សូមឱ្យអង្គភាពពាក់ព័ន្ធមេត្តាពិនិត្យពិចារណា ហើយការងារនេះ យើងដឹងទាំងអស់គ្នាថា[តម្លៃបច្ចុប្បន្ន]មិនក្រោម១០០ដុល្លារទេ»។ ឯកឧត្តមបានស្នើឱ្យលើកយោបល់ដើម្បីសម្រេច និងបញ្ជាក់ទៀតថា«ដើម្បីកុំឱ្យការវិត្តន៍ពីមួយអាណត្តិទៅមួយអាណត្តិ លិខិតឆ្លងមានការឡើងថ្លៃរហូត»។
គួររម្លឹកថា សម្ដេចក្រឡាហោម ស ខេង អតីតឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ក៏ធ្លាប់បានមានប្រសាសន៍កាលពីខែមីនា ឆ្នាំ២០២៣ថា រាជរដ្ឋាភិបាលនឹងពិចារណានូវតម្លៃក្នុងការធ្វើលិខិតឆ្លងដែន ដើម្បីឱ្យមានតម្លៃសមស្របណាមួយ សម្រួលដល់ប្រជាពលរដ្ឋ ព្រោះមានប្រជាពលរដ្ឋមួយចំនួនបានត្អូញត្អែរថា ការធ្វើលិខិតឆ្លងដែនមានតម្លៃថ្លៃពេក។
សូមបញ្ជាក់ថា តម្លៃ និងរយៈពេលអតិបរមាសម្រាប់ការផ្តល់សេវាធ្វើលិខិតឆ្លងដែន(ថ្ងៃធ្វើការ)សម្រាប់មនុស្សចាស់មានសុពលភាព ១០ឆ្នាំ សេវាធម្មតាមានតម្លៃ១០០ដុល្លារ រយៈពេល១៥ថ្ងៃ នៃថ្ងៃធ្វើការ ខណៈសេវាឆាប់រហ័សកម្រិតមធ្យមមានតម្លៃ១៥០$ រយៈពេល៧ថ្ងៃនៃថ្ងៃធ្វើការ។ ចំណែកសេវាឆាប់រហ័សមានតម្លៃ២០០$ រយៈពេល ១ថ្ងៃ នៃថ្ងៃធ្វើការ។
យោងតាមតារាងតម្លៃរបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ សម្រាប់កុមារអាយុក្រោម៦ឆ្នាំ មានសុពលភាពលិខិតឆ្លងដែន៥ឆ្នាំ ក្នុងសេវាធម្មតាតម្លៃ៨០ដុល្លារ រយៈពេលធ្វើ១៥ថ្ងៃនៃថ្ងៃធ្វើការ សេវាឆាប់រហ័សកម្រិតមធ្យមតម្លៃ១២០ដុល្លារ រយៈពេល៧ថ្ងៃនៃថ្ងៃធ្វើការ ហើយសេវាឆាប់រហ័សមានតម្លៃ១៦០ដុល្លារ រយៈពេល១ថ្ងៃនៃថ្ងៃធ្វើការ។
បច្ចុប្បន្ន ទីតាំងផ្តល់សេវាមាននៅនាយកដ្ឋានលិខិតឆ្លងដែន នៅភូមិតាង៉ូវ សង្កាត់និរោធ ខណ្ឌច្បារអំពៅ រាជធានីភ្នំពេញ។ ជាមួយគ្នានេះ អគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ ក៏មានសាខាលិខិតឆ្លងដែននៅផ្សារទំនើបអ៊ីអន២ រាជធានីភ្នំពេញ និងសាខាលិខិតឆ្លងដែន ខេត្តបាត់ដំបង ខេត្តកោះកុង និងក្រុងប៉ោយប៉ែត ខេត្តបន្ទាយមានជ័យ។
ពាក់ព័ន្ធនឹងតម្លៃនៃការធ្វើលិខិតឆ្លងដែននៅប្រទេសក្បែរខាងកម្ពុជាវិញ នៅប្រទេសថៃ ការធ្វើលិខិតឆ្លងដែននៅប្រទេសថៃមានតម្លៃធម្មតាពី ១,០០០ ទៅ ១,៥០០បាត ឬអាចនិយាយបានថាក្រោម៥០ដុល្លារអាមេរិក៕
