សិល្បៈជាតិ៖ តារាសម្ដែងរូបសង្ហា ងែត សុវណ្ណនេត កំពុងតែជួបទុក្ខព្រោះតែម្ដាយរបស់លោកកំពុងតែឈឺធ្ងន់ ដល់ថ្នាក់បញ្ជូនទៅជួយសង្គ្រោះក្នុងបន្ទប់សង្គ្រោះ ICU ដោយអាការៈបាត់ស្មារតី រហូតតារារូបនេះប្រើទាំងវិទ្យាសាស្ត្រ និងផ្លូវក្នុងឱ្យជួយ ដោយលោកបានប្រកាសបន់ស្រន់មុខវត្ថុស័ក្ដិសិទ្ធិកាត់អាយុខ្លួនឯង២០ទៅ៣០ឆ្នាំជាថ្នូរប្ដូរយកដង្ហើមអ្នកម្ដាយ។
មួយរយៈក្រោយនេះដោយសារតែរវល់នឹងការងារផ្ទាល់ខ្លួនផងនិងឧស្សាហ៍ចុះឡើងមើលថែទាំជំងឺអ្នកម្ដាយផង ទើបធ្វើឱ្យបុរសសង្ហារូបនេះដកឃ្លាបន្តិចពីការរឿងភាគបុរាណដែលត្រូវចំណាយពេលច្រើនខែ ប៉ុន្តែលោកនៅបន្តទទួលការងារពិធីករ និងថតស្ពតពាណិជ្ជកម្មដែលមិនសូវចាយពេលវេលាច្រើន។
យ៉ាងណាមិញថ្មីៗនេះស្រាប់តែសារព័ត៌មានត្រយងបានទទួលដំណឺងថាម្ដាយរបស់ កាវីន (ឈ្មោះក្នុងសិល្បៈ) កំពុងឈឺធ្ងន់ ហើយត្រូវបានបញ្ជូនមកមន្ទីរពេទ្យ ដើម្បីសង្គ្រោះ ដោយក្នុងនោះ ក្រៅពីពឹងវិទ្យាសាស្ត្ររកគ្រូពេទ្យជំនាញហើយនោះ តារារូបនេះក៏បានរត់រកផ្លូវក្នុងទៅតាមអបិយជំនឿរបស់ជនជាតិខ្មែរដែលមានតាំងពីបុរាណឱ្យជួយដែរ ដោយក្នុងនោះមានទាំងបន់ស្រន់កាត់អាយុខ្លួនផង ថ្វាយភ្លេងពិណពាទ្យផង និងហ៊ានកោរសក់បូជាផង ឱ្យតែម្ដាយរបស់ខ្លួនអាចត្រលប់មកធូរស្បើយដូចមុនវិញ។
យោងតាមរយៈការឆ្លើយឆ្លងសារអេឡិចត្រូនិចរវាងអ្នកសារព័ត៌មានត្រយងនឹងតារាឯកប្រុសរឿង «តម្លង់៧សន្តាន» ស្ថានភាពជំងឺម្ដាយរបស់លោកកាន់តែមានសភាពធ្ងន់ធ្ងរដែលចាំបាច់ត្រូវចំណាយលើថ្លៃព្យាបាលច្រើន ប៉ុន្តែលោកមិនអល់អែកនឹងប្រឹងប្រែងរកប្រាក់ដើម្បីព្យាបាលម្ដាយនោះឡើយ ទោះជាលំបាក ទោះជាត្រូវចំណាយអស់ពីខ្លួន ក៏លោកមិនស្ដាយសំខាន់គឺម្ដាយបានធូរសះស្បើយឡើងវិញ ប៉ុន្តែហាក់មិនសូវជាមានសង្ឃឹមប៉ុន្មាននោះឡើយ។
លោក ងែត សុវណ្ណនេត មានបងប្អូន២នាក់ប្រុសទាំង២នាក់។ លោកមានស្រុកកំណើតនៅខេត្តពោធិ៍សាត់ លោកកំព្រាឪពុកតាំងពីតូច និងរស់នៅជាមួយម្ដាយនិងបងប្រុស៕