សិល្បៈជាតិ៖ ទម្រាំកសាងអាជីវកម្មមួយឱ្យបានរឹងមាំ និងមានឈ្មោះបោះសំឡេងដូចសព្វថ្ងៃនេះ តារាសម្ដែង-ពិធីករ និងនាយកប្រតិបត្តិក្រុមហ៊ុន Alex Entertainment Agency លោក អេឡិច ចាន់ត្រា បានចំណាយពេលមិនតិចជាង ៨ឆ្នាំនោះឡើយ។ ជាការឆ្លើយតបនឹងតម្រូវការទីផ្សារដ៏ច្រើនសន្ធឹកសន្ធាប់ពីអតិថិជន លោក អេឡិច ចាន់ត្រា បានចាប់ផ្ដើមពង្រីកសេវាកម្មឱ្យកាន់តែធំ ដោយសម្លឹងរកមើលដៃគូសហការដែលអាចជួយពង្រីកសក្តានុពលអាជីវកម្មរបស់ខ្លួន ដូច្នេះលោកបានចាប់ដៃគូសហការជាមួយនឹងសណ្ឋាគារលំដាប់ផ្កាយប្រាំ ដែលពិធីចុះហត្ថលេខា លើកិច្ចសហការរវាង Alex Entertainment Agency និង សណ្ឋាគារ SUN & MOON Riverside បានធ្វើឡើងកាលពីរសៀលថ្ងៃ ព្រហស្បតិ៍ ទី០៧ កញ្ញា ២០២៣ កន្លងទៅ។
ថ្លែងក្នុងឱកាសនោះ លោក អេឡិច ចាន់ត្រា បានសម្ដែងក្ដីរំភើប និងសោមនស្សរីករាយដែលបានចាប់ដៃគូ សហការអាជីវកម្មជាមួយនឹងសណ្ឋាគារលំដាប់ផ្កាយប្រាំ Sun & Moon Riverside Hotel។ នាយកប្រតិបត្តិរូបនេះបានរំលឹកឱ្យដឹងដែរថា ដំបូងឡើយការបង្កើតក្រុម Alex Entertainment គឺដោយការស្រលាញ់ចំពោះសិល្បៈបុរាណនិងសម័យ ព្រមទាំងមានគោលដៅចង់ចូលរួមចំណែកមួយភាគដើម្បី ជួយរកចំណូលបន្ថែម ក៏ដូចជាជួយបង្កើតចំណូលដល់បងប្អូនមិត្តសិល្បករ-សិល្បការិនី ទាំងថ្មីនិងចាស់ ក្នុងការផ្គត់ផ្គង់ជីវភាពប្រចាំថ្ងៃ។
ចំណែកឯកិច្ចសហប្រតិបត្តិការក្នុងភាពជាដៃគូនេះគឺ ត្រូវបានលោក អេឡិច ចាន់ត្រា លើកឡើងថា គឺធ្វើឡើងស្របទៅតាមតម្រូវការរបស់អតិថិជន ជាពិសេសគូស្វាមីភរិយានិងក្រុមគ្រួសារដែលកំពុងស្វែងទីកន្លែងនិងអ្នករៀបចំកម្មវិធីអាពាហ៍ពិពាហ៍មានបទពិសោធន៍ ដូចជា អេឡិច អិនធើធេនមេន អេជិនស៊ី ដែលមានជំនាញក្នុងការរៀបចំកម្មវីធីសប្បាយរីករាយ កម្មវិធីកម្សាន្ត និងកម្មវិធីជប់លៀងមង្គលការជាច្រើនឆ្នាំ ដូច្នេះការសហការគ្នាជាមួយនឹង សណ្ឋាគារ សាន់ & មូន រីវើសាយ ដែលរក្សាបាននូវស្តង់ដារបដិសណ្ឋារកិច្ចកិច្ចខ្ពស់បំផុត ក្នុងការផ្តល់នូវកន្លែងស្នាក់នៅ ការពិសារអាហារ ការហាត់ប្រាណ ការទាក់ទងគ្នាក្នុងសង្គម និងប្រកបអាជីវកម្មបានយ៉ាងងាយស្រួល ប្រកបដោយផាសុខភាព និងទាន់សម័យ ច្បាស់ជាធ្វើឱ្យអតិថិជនកាន់តែមានទំនុកចិត្តទ្វេរដង។
អ្វីដែលកាន់តែពិសេសទៀតនោះ គឺការបង្កើតកញ្ចប់សេវាកម្មថ្មី ពី Alex Entertainment Agency ដែលនឹងជូនផ្តល់អត្ថប្រយោជន៍បន្ថែម មិនធ្លាប់មានពីមុនមក នោះគឺទទួលបានបន្ទប់ពិសេសសម្រាប់រាត្រីទឹកឃ្មុំនៅក្នុងសណ្ឋាគារ Sun & Moon Riverside ដែលជាសណ្ឋាគារលំដាប់ផ្កាយ៥ផងដែរ។
បន្ថែមលើអ្វីដែល អេឡិច ចាន់ត្រា បានលើកឡើង អ្នកឧកញ៉ា បណ្ឌិត ជា រតនា ស្ថាបនិក SUN & MOON Group បានបង្ហាញពីចំណាប់អារម្មណ៍ផ្ទាល់ខ្លួនដែរថា អ្នកឧកញ៉ាជឿថា កិច្ចសហប្រតិបត្តិការគ្នាក្នុងភាពជាដៃគូលើកនេះនឹងក្លាយជាចំណែកមួយ ជួយជំរុញឱ្យមានការបង្កើតផែនការអាពាហ៍ពិពាហ៍ប្រកបដោយអនុស្សាវរីយ៍ផ្អែមល្ហែមនៅក្នុងប្រទេសកម្ពុជាកាន់តែមានចំនួនកើនឡើងថែមទៀត៕
