នៅរាត្រីថ្ងៃចន្ទ ទី១១ ខែកញ្ញា ឆ្នាំ២០២៣ នេះក្រុមបាល់ទាត់ជម្រើសជាតិកម្ពុជា នឹងបើកទ្វារពហុកីឡដ្ឋានជាតិ ក្នុងរាជធានីភ្នំពេញ ទទួលស្វាគមន៍ក្រុមភ្ញៀវកោះម៉ាកាវ ក្នុងជំនួបមិត្តភាពអន្តរជាតិ អំឡុងថ្ងៃ FIFA Day វេលាម៉ោង ៧ៈ០០ នាទីយប់។
នេះជាការប្រកួតទី៤ របស់កម្ពុជា ក្នុងឆ្នាំ២០២៣ នេះ ខណៈជំនួបចុងក្រោយកាលពីសប្ដាហ៍មុន កម្ពុជា បានប្រកួតស្មើគ្នា ១-១ ជាមួយក្រុមកោះហុងកុង កាលពីថ្ងៃទី៧ ខែកញ្ញា ឆ្នាំ២០២៣ កន្លងទៅ។ ជំនួបទី១ ក្នុងឆ្នាំ២០២៣ នេះគឺជាការប្រកួតបិទពូល នៃពានរង្វាន់ AFF Mitsubishi Electric Cup ដោយចាញ់ថៃ ៣-១ និងប្រកួតលើកទី២ ចាញ់បង់ក្លាដេស ក្នុងប្រកួតមិត្តភាពអន្តរជាតិ ១-០ អំឡុងខែមិថុនា។
ប្រវត្តិប្រកួតកន្លងមករវាងកម្ពុជា ទល់កោះម៉ាកាវ ៦លើកចុងមាន៖
– ២០០៨ កម្ពុជា ៣-១ ម៉ាកាវ (Asian Cup & Asian Challenge Cup)
– ២០០៩ ម៉ាកាវ ១-២ កម្ពុជា (Asian Cup & Asian Challenge Cup)
– ២០១១ កម្ពុជា ៣-១ ម៉ាកាវ (ជម្រុះ Asian Challenge Cup)
– ២០១១ ម៉ាកាវ ៣-១ កម្ពុជា (ជម្រុះ Asian Challenge Cup)
– ២០១៥ កម្ពុជា ៣-០ ម៉ាកាវ (ជម្រុះ World Cup)
– ២០១៥ ម៉ាកាវ ១-១ កម្ពុជា (ជម្រុះ World Cup)
ទាំងក្រុមកម្ពុជា និងម៉ាកាវ មានភារៈកិច្ចសំខាន់ ដូចគ្នាដែរ នៅចុងឆ្នាំនេះ ដោយកម្ពុជា ត្រូវប្រកួត វគ្គជម្រុះបឋម នៃពានរង្វាន់បាល់ទាត់ពិភពលោក FIFA World Cup 2026 ដោយប៉ះក្រុមប៉ាគីស្ថាន ខណៈហុងកុង ត្រូវប៉ះក្រុមមីយ៉ាន់ម៉ា៕