មនុស្សជាច្រើននាក់បានស្លាប់ ខណៈអគ្គិភ័យបានឆាបឆេះអគារអាផាតមិន ខ្នាតតូចមួយ ក្នុងទីក្រុងហាណូយ កាលពីយប់ថ្ងៃអង្គារ។ នេះបើយោងតាមការចេញផ្សាយដោយសារព័ត៌មាន VN Express នាថ្ងៃពុធ ទី១៣ ខែកញ្ញា ឆ្នាំ២០២៣។
អគ្គីភ័យបានកើតឡើងនៅម៉ោង១១និង៥០នាទីយប់ នៅផ្លូវ Khuong Ha ក្នុងសង្កាត់ Thanh Xuan។
អាផាតមិននេះ ត្រូវបានគេបែងចែកទៅជាផ្ទះល្វែងសម្រាប់ជួល មានទំហំជាង ២០០ម៉ែត្រការ៉េ កម្ពស់១០ជាន់ មានមនុស្សប្រហែល ១៥០នាក់។
គិតត្រឹមព្រឹកថ្ងៃអង្គារនេះ មនុស្ស ៧០នាក់ត្រូវបានជួយសង្គ្រោះ ក្នុងនោះមនុស្ស ៥៤នាក់ ត្រូវបានបញ្ជូនទៅមន្ទីរពេទ្យផ្សេងៗគ្នាក្នុងទីក្រុងហាណូយ ខណៈមនុស្ស ៤០នាក់ទៀតបានបាត់បង់ជីវិត។
អគ្គីភ័យនេះបានរលត់ទាំងស្រុងហើយ ប៉ុន្តែកម្លាំងសង្គ្រោះកំពុងស្វែងរកជនរងគ្រោះបន្ថែមទៀត។
ទន្ទឹមនោះ មន្ទីរពេទ្យ Bach Mai ដែលទទួលជនរងគ្រោះ ១៩នាក់ ក្នុងនោះមានកុមារ ៨នាក់ ខាងមន្ទីរពេទ្យបាននិយាយថា មនុស្ស ២នាក់ស្លាប់ និងម្នាក់ទៀតស្ថិតក្នុងស្ថានភាពធ្ងន់ធ្ងរ។ មនុស្សភាគច្រើនមានអាការៈថប់ដង្ហើម ដោយសារស្រូបផ្សែងច្រើន។
ដោយឡែកមន្ទីរពេទ្យ Dong Da បានឲ្យដឹងថា ខ្លួនបានទទួលអ្នកជំងឺចំនួន ៨នាក់ គិតត្រឹមម៉ោង ៨និង៣០នាទីព្រឹកថ្ងៃពុធ ហើយមនុស្ស ៤នាក់បានស្លាប់ ខណៈ៤នាក់ទៀត ត្រូវបានបញ្ជូនទៅមន្ទីរពេទ្យមួយផ្សេងទៀត។ លោកវេជ្ជបណ្ឌិត Nguyen Dinh Phuc ប្រធានមន្ទីរពេទ្យបាននិយាយថា អ្នកជំងឺមានការភ័យស្លន់ស្លោ ម្នាក់ក្នុងចំណោមពួកគេ បានរងរបួសឆ្អឹងខ្នង បន្ទាប់ពីធ្លាក់ពីលើអគារខ្ពស់ ខណៈស្ត្រីម្នាក់ និងកូនរបស់គាត់ មានការថប់ដង្ហើម។
ទាក់ទិននឹងបញ្ហានេះ មន្ត្រីពន្លត់អគ្គិភ័យម្នាក់បាននិយាយថា គេមិនទាន់ដឹងថា មានមនុស្សប៉ុន្មាននាក់នៅក្នុងអគារអំឡុងពេលភ្លើងឆេះ នឹងដឹងពីមូលហេតុដែលបណ្ដាលឲ្យមានអគ្គីភ័យនោះទេ៕