គម្រោងអភិវឌ្ឍជលផលក្រោយពេលប្រមូលផល (CAPFish-Capture) ដែលសហការផ្ដល់មូលនិធិដោយសហភាពអឺរ៉ុប អនុវត្តដោយ រដ្ឋបាលជលផល និងអង្គការ UNIDO នឹងនាំសហគ្រាសចំនួន ៤ដែលកំពុងមានសក្ដានុពលនៅក្នុងប្រទេសកម្ពុជា ទៅកាន់ទីក្រុងបារីស ប្រទេសបារាំង នៅថ្ងៃទី៣០ ខែកញ្ញា ខាងមុខនេះ។
លោក ថោង រ៉ា អ្នកជំនាញសុវត្តិភាពចំណីអាហារថ្នាក់ជាតិ របស់អង្គការ UNIDO បានលើកឡើងថា៖ «ការនាំសហគ្រាសដែលមានសក្ដានុពលទាំង ៤ទៅកាន់ប្រទេសបារាំងនេះ គឺដើម្បីឲ្យពួកគាត់បានផ្គូរផ្គង់អាជីវកម្មជាមួយអ្នកទិញដែលនៅទីក្រុងបារីស ដើម្បីពិនិត្យមើលលទ្ធភាពក្នុងការនាំចេញផលិតផលជលផលរបស់កម្ពុជាទៅកាន់ទីផ្សាអឺរ៉ុប ពិសេសទីផ្សារប្រទេសបារាំងតែម្ដង»។
អ្នកជំនាញសុវត្តិភាពចំណីអាហាររូបនេះ បានបន្តថា ក្រុមហ៊ុន សហគ្រាស ចំនួន ៤ដែលនឹងនាំទៅកាន់ប្រទេសបារាំងនេះរួមមាន សហគ្រាសទឹកត្រី លាង ឡេង, ក្រុមហ៊ុនទឹកត្រី ង៉ូវ ហេង កំពត, សហគ្រាស Cambodia Fresh Farm កសិដ្ឋានចិញ្ចឹមត្រីទីឡាព្យា និង ក្រុមហ៊ុន Confirel ដែលកំពុងមានផែនការផលិតម្ស៉ៅប្រហុក សម្រាប់នាំចេញ។ ក្រុមហ៊ុន សហគ្រាសទាំង ៤នឹងធ្វើដំណើរទៅកាន់ប្រទេសបារាំង ចាប់ពីថ្ងៃទី៣០ ខែកញ្ញា និងគ្រោងត្រឡប់មកវិញនៅថ្ងៃទី០៥ ខែតុលា ឆ្នាំ២០២៣។
លោកបន្ថែមថា មកដល់ពេលនេះមានសហគ្រាចំនួន ៨ហើយដែលទទួលបានស្តង់ដា និមិត្តសញ្ញាគុណភាពផលិតផលជលផល (CQS) ខណ:មានសហគ្រាសចំនួន ២០ផ្សេងទៀតដែលកំពុងអនុវត្តន៍ស្តង់ដា CQS នេះ។ ដោយឡែកនៅពេលថ្មីៗនេះ គម្រោងបានទទួលពាក្យ៥សហគ្រាសទៀត និងកំពុងចុះទៅធ្វើសវនកម្មសហគ្រាសចំនួន ៥ ដោយរយ:ពេល២ខែនេះសហគ្រាសគមពុងដោះស្រាយបញ្ហាដែលមិនទាន់អនុឡោម។
គូសបញ្ជាក់ថា គម្រោង CAPFish-Capture បានគាំទ្រដល់សហគ្រាសចំនួន២៨ ជាជំនួយបច្ចេកទេស និង សម្ភារបរិក្ខារ ទៅដល់សហគ្រាសនីមួយៗដែលមានតម្លៃចាប់ពី ២៥ ០០០ដុល្លារ ដល់ ១០០ ០០០ដុល្លារអាមេរិក ដើម្បីកែលម្អប្រតិ្តបត្តិការអាជិវកម្ម និងអនុវត្តស្តង់ដារសុវត្ថិភាពម្ហូបអាហារ CQS ។ មកទល់ពេលនេះ សហគ្រាសចំនួន០៨ ទទួលបាន CQS ដែលក្នុងនោះ CQS ពេញលេញ ចំនួន០៤ និង CQS ធម្មតាចំនួន០៤៕