មុខសញ្ញាចាស់ចំនួន ២នាក់ទើបចេញពីពន្ធនាគារ ក្រោយរួមភេទជាមួយប្រុសដូចគ្នារួចហើយ បានធ្វើសកម្មភាពភ្ជង់យកម៉ូតូ និងទ្រព្យសម្បត្តិផ្សេងទៀតរហូត ២លើកជាប់ៗគ្នា ចុងក្រោយត្រូវសមត្ថកិច្ចក្របួចជាប់ បញ្ជូនទៅតុលាកាសារជាថ្មីទៀត។
លោកវរសេនីយ៍ឯក ឈឿង គឹមសុង នាយការិយាល័យ នគរបាលព្រហ្មទណ្ឌកម្រិតស្រាល បានប្រាប់ឲ្យដឹងថា ក្រោមផែនការពង្រឹងបញ្ហាសន្តិសុខសណ្តាប់សាធារណៈ ដែលណែនាំដោយឯកឧត្ដម ឧត្ដមសេនីយ៍ទោ សាត គឹមសាន ស្នងការនៃស្នងការដ្ឋាននគរបាលខេត្តបាត់ដំបង លោកបានចុះដឹកនាំកម្លាំងអន្តរាគមន៍បង្ការបង្ក្រាបស្រាវជ្រាវរហូតកំណត់មុខសញ្ញា និងឈានដល់ការឃាត់ខ្លួនជនសង្ស័យបានជាបន្តបន្ទាប់ចំនួន ០២ នាក់ ក្រោយធ្វើសកម្មភាពលួចមានស្ថានទម្ងន់ទោសប្រេីប្រាស់កាំបិតភ្ជង់យកម៉ូតូ ទូរស័ព្ទដៃ និងលុយប្រជាពលរដ្ឋ ដែលប្រព្រឹត្តផ្ទុយនឹងច្បាប់ ២ករណីជាប់ៗគ្នា នៅត្រង់ចំណុចភូមិអូរដំបង ឃុំអូរដំបង២ ក្នុងស្រុកសង្កែ និងមួយចំណុចទៀតក្នុងភូមិចំការឫស្សី សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង។
ជនសង្ស័យមានឈ្មោះ ឡាច ងួនយី ភេទប្រុស អាយុ ២២ ឆ្នាំ មានទីលំនៅក្នុងភូមិ១៣មករា សង្កាត់ព្រែកព្រះស្តេច ក្រុងបាត់ដំបង និងម្នាក់ទៀតឈ្មោះសារ៉ម លី ហៅ ជីន ភេទប្រុស អាយុ ៤២ ឆ្នាំ មានទីលំនៅភូមិដាំស្ពៃ សង្កាត់ស្លាកែត ក្រុងបាត់ដំបងជាបក្សពួកតែមួយ និងជាមុខសញ្ញាចាស់ទើបចេញពីពន្ធនាគាហើយមិនរាងចាលបន្តធ្វើសកម្មភាពផ្ទុយនឹងច្បាប់ដដែល។
លោកវរសេនីយ៍ឯក ឈឿង គឹមសុង បានបញ្ជាក់បន្ថែមថា ជនសង្ស័យទី ១ នៅថ្ងៃទី ២០ ខែកក្កដា ឆ្នាំ ២០២១ បានត្រូវរូវគ្នាមួយជនរងគ្រោះជាភេទប្រុសដូចគ្នា មានឈ្មោះ ឃុយ ចាន់ដារាវត្តី អាយុ ២៥ឆ្នាំ បានទៅជួលបន្ទប់មួយកន្លែងរួមភេទ រួចហើយបានប្រាប់ដៃគូឲ្យនាំខ្លួនទៅយកបក្សពួកម្នាក់ លុះដល់ចំណុចកើតហេតុស្ងាត់មានឱកាសក៏ទាញកាំបិតភ្ជង់ជនរងគ្រោះយកម៉ូតូឃ្លីក ជាមួយនឹងទូរស័ព្ទដៃ ១គ្រឿងរួចគេចខ្លួនបាត់ ក្រោយទទួលបានពាក្យបណ្តឹងទើបកម្លាំងជំនាញចុះឃាត់ខ្លួនបាន។ រីឯមួយករណីទៀតនៅថ្ងៃបន្ទាប់ទី ២១ ខែកក្កដា ជនសង្ស័យនិងបក្សពួកម្នាក់ទៀតបានធ្វើសកម្មភាពយកកាំបិតភ្ជង់ពីជនរងគ្រោះម្នាក់យកបានទូរស័ព្ទ ១គ្រឿង និងលុយ ៥០ដុល្លារ ចុងក្រោយក៏ត្រូវនគរបាលកម្លាំងអន្តរាគមន៍បង្ការបង្ក្រាបស្នងការខេត្តស្រាវជ្រាវឃាត់ខ្លួនបានទាំង ២នាក់តែម្តង។
វត្ថុតាងដែលកម្លាំងនគរបាលដកហូតបានទាំង ២លើករួមមាន៖ ម៉ូតូហុងដាឃ្លីក ពណ៌ខ្មៅ ស៊េរីឆ្នាំ ២០១៧ មួយមួយគ្រឿង, ទូរស័ព្ទដៃម៉ាក HUAWEI ០១ គ្រឿង ជាជារបស់ជនរងគ្រោះត្រូវប្រគល់ជូនម្ចាស់ដើមវិញ, ដំបងដែកពណ៌ខ្មៅ ០១ ដេីម, កាំបិតកែច្នៃដងដែក ០១ ដេីម, ប្រាក់ដុល្លាក្លែងក្លាយមួយចំនួន និងឧបករណ៍ប្រេីប្រាស់គ្រឿងញៀនមួយចំនួនទៀត។
កាលពីចុងសប្តាហ៍កន្លងមកនេះជនសង្ស័យ រួមទាំងវត្ថុតាងមួយចំនួនត្រូវកម្លាំងការិយាល័យជំនាញកសាងសំណុំរឿងបញ្ជូនទៅកាន់សាលាដំបូងខេត្តបាត់ដំបងដើម្បីអនុវត្តបន្តតាមនីតិវិធី៕
ដោយ: ដំបងក្រញូង