សិល្បៈអន្តរជាតិ៖ ករណីដែលកំពុងតែមានការចាប់អារម្មណ៍និងតាមដានច្រើនសម្រាប់អ្នកគាំទ្រវិស័យបវរកញ្ញានាខណៈនេះគឺរឿងដែល Miss Grand International រងលំដាប់ទីពីរ ឆ្នាំ២០២២ កញ្ញា Engfa បានជាន់ជាយស្បៃរបស់ម្ចាស់មកុដ Miss Grand Cambodia ឆ្នាំ២០២៣ កញ្ញា ភឹម ស្រីនោ នៅក្នុងដើរ Show មួយនាប្រទេសថៃ ដោយករណីនេះបណ្ដាលឱ្យមានផ្ទុះចេញនូវការរិះគន់ជាច្រើនពីសំណាក់អ្នកទស្សនា ដោយភាគច្រើនគេបានវាយតម្លៃថាកញ្ញា Engfa យកជើងកៀសបែបនេះ ដូចជាមិនផ្ដល់តម្លៃឬកិត្តិយសដល់កញ្ញា ភឹម ស្រីនោ ដែលជាបវរកញ្ញាភ្ញៀវមកពីប្រទេសជិតខាងសោះ។ ចំពោះករណីដដែលនេះ នៅខណៈដែលខ្លួនមានឱកាសចូលរួមក្នុងកម្មវិធីសម្ពោធភាពយន្ត «The Creator» បញ្ចាំងនៅក្នុងប្រទេសថៃ កញ្ញា Engfa បានឆ្លើយតបចំពោះរាល់ករណីដ៏រសើបនេះ ដោយត្រយងសូមសង្ខេបខ្លីដូចតទៅ៖
ជាបឋមសូមទោសចំពោះ Miss Grand Cambodia និង ហ្វេនៗកម្ពុជា ព្រោះរូបភាពដែលផ្សាយចេញលើប្រព័ន្ធផ្សព្វផ្សាយពិតជាមិនសមរម្យពិតមែន តែខ្ញុំមិនមានចេតនាធ្វើបែបនោះទេ និយាយរួមគឺមិនចង់មានបញ្ហាស្រាប់ហើយ ព្រោះខ្ញុំមានការងារត្រូវធ្វើ និងមានអ្នកគាំទ្រនៅទីនោះទៀត តាមពិតមុននេះមានផ្ទុះរឿងមិនសំពះតប រហូតមកផ្ទុះរឿងខ្លាំងគឺនៅពេលមានរូបភាពយកជើងកៀសស្បៃ ទើបមានអ្នកគិតថាខ្ញុំមានបញ្ហាជាប្អូនស្រីនោទេដឹង? គឺពួកយើងអត់មានបញ្ហាអ្វីជាមួយគ្នាទេ ថ្ងៃកម្មវិធីខ្ញុំពាក់សក់ក្លែងក្លាយ ហើយពាក់មកុដតែអត់បានយកដង្កៀបមកគៀប គឺគ្រាន់តែពាក់ដាក់បន្តុបពីលើ ពេលដើរដល់ឈុតចុងក្រោយ មានមនុស្សដើរបន្តកន្ទុយគ្នា ហើយខ្ញុំក៏អត់បានដឹងថាគាត់រលាស់ស្បៃ ពេលនោះខ្ញុំបានគិតមួយវិនាទី ពីរវិនាទីដែរ តើធ្វើយ៉ាងម៉េចបន្តទៀត ព្រោះបើឱនចុះគឺមិនកើតទេ ព្រោះឈុតចំហទ្រូង ចំណែកមកុដអាចនឹងរបូតជ្រុះពីលើក្បាល បើមានរូបភាពមកុដជ្រុះពីលើក្បាល ប្រាកដជាមើលទៅមិនល្អ យើងអត់មានវិជ្ជាជីវៈ បើសិនជាអ្នកតាមដានកម្មវិធី ច្បាស់ជាឃើញខ្ញុំយកជើងកៀសឈុតខ្លួនឯងស្រាប់ហើយ តែដល់ពេលយកជើងកៀសឈុតគេមើលទៅមិនសមរម្យ ខ្ញុំទទួលរាល់ពាក្យតិះទៀនទាំងអស់ ហើយខ្ញុំក៏បានផ្ញើសារទៅសុំទោសប្អូនណាណូ (ភឹម ស្រីនោ) ហើយប្រាប់គាត់ថាបងអត់សប្បាយចិត្ត សុំទោសពិតមែន បងមិនមានចេតនាទេ ហើយប្អូនស្រីក៏បានឆ្លើយតបវិញថា គាត់ក៏សុំទោសដូចគ្នា គាត់ក៏មិនមានចេតនារលាស់ស្បៃមកត្រូវខ្ញុំដែរ។
សម្រាប់កញ្ញា អ៊ីងហ្វា ដែលជាម្ចាស់មកុដ Miss Grand Thailand ឆ្នាំ២០២២ ត្រៀមនឹងមានការប្រគំតន្ត្រីនៅប្រទេសកម្ពុជាយើងនាងពេលឆាប់ៗខាងមុខនេះ បន្ទាប់ពីកញ្ញាចេញទៅប្រគំតន្ត្រីនៅហ្វីលីពីន និងវៀតណាមរួច៕
សូមទស្សនាវីដេអូព័ត៌មានទាំងស្រុងខាងក្រោមនេះ៖