គេហដ្ឋាននៅ New Orleans ដែលជាកម្មសិទ្ធិរបស់តារាចម្រៀងល្បី Jay-Z និង Beyonce បានឆេះហើយសមត្ថកិច្ចជឿថាអគ្គីភ័យនេះកើតឡើងដោយសារមានអ្នកលួចដុត។
អគ្គីភ័យបានឆេះគេហដ្ឋានដែលមានតម្លៃ២.៤លានដុល្លាររបស់តារាល្បីទាំងពីរកាលពីរាត្រីថ្ងៃពុធកន្លងទៅ ហើយបើយោងតាមការចុះផ្សាយរបស់សារព័ត៌មានក្នុងស្រុក Nola.com បានរាយការណ៍ថាអគ្គីភ័យនេះអាចកើតឡើងដោយមានមនុស្សលួចដុត នេះបើយោងតាមការមន្ត្រីពន្លត់អគ្គីភ័យបានរកឃើញកំប៉ុងហ្គាស៍និងសៀវភៅនៅក្នុងចង្ក្រានទាំងដែលផ្ទះគ្មានមនុស្សរស់នៅ។
ក្រោយទទួលបានទូរស័ព្ទរាយការណ៍ភ្លាមមន្ត្រីពន្លត់អគ្គីភ័យបានទៅកន្លែងកើតហេតុដោយប្រើរយៈពេល២ម៉ោងទើបអាចគ្រប់គ្រងនិងពន្លត់អណ្ដាតភ្លើងឆាបឆេះផ្ទះរបស់តារាចម្រៀងល្បីទាំងពីររូបខាងលើបាន។ មន្ត្រីសមត្ថកិច្ចស៊ើបអង្កេតបានរកឃើញ អាកុល ដែកកេះ និងឧបករណ៍ធ្វើឱ្យផ្ទុះនៅកន្លែងហេតុ។
ប្រភពបានថ្លែងប្រាប់សារព័ត៌មាន The New York Post ថាអគ្គីភ័យច្បាស់ជារាលដាលខ្លាំងនិងបង្កឱ្យកើតមានវិនាសសកម្មធ្ងន់ធ្ងរប្រសិនបើមិនមានការពន្លត់អណ្ដាតភ្លើងបានទាន់ពេលវេលា។
អ្នកជិតមួយរូបសុំមិនបញ្ចេញអត្តសញ្ញាណបានប្រាប់សារព័ត៌មាន Nola.com ថាជាទូទៅមនុស្សជាច្រើនបានចេញចូលរបងអគារផ្ទះនោះព្រោះតែមិនមានចាក់សោ ហើយមុនពេលកើតហេតុការណ៍ភ្លើងឆេះនេះក៏ប្រហែលជាមនុស្សចេញអគារផ្ទះនេះដូចគ្នា។
អគារដែលមានលំនាំតាមអាមេរិកឡាទីននេះកសាងឡើងជាព្រះវិហារកាលពីឆ្នាំ១៩២៦ ដោយតម្លៃ ៨៤០០០ (៨ម៉ឺន៤ពាន់ដុល្លារ) នៅឆ្នាំ១៩៧៧ អគារត្រូវបានទិញក្នុងតម្លៃ ១០០,០០០ (១សែនដុល្លារ) ហើយប្ដូរទៅជាសាលាបង្រៀនរាំរបាំបាល់ឡេ ហើយក្រោយមកនៅឆ្នាំ២០០១ បានក្លាយមកជាផ្ទះធម្មតាវិញ។
តាមសេចក្ដីរាយការណ៍ Beyonce បានទិញអចលនទ្រព្យដែលមកដល់បច្ចុប្បន្ន(២០២១)មានអាយុ៩៥ឆ្នាំនេះកាលពីឆ្នាំ ២០០៥ ក្នុងរង្វង់ទឹកប្រាក់២,៦លានដុល្លារសហរដ្ឋអាមេរិក៕
