កុមារី Cui Chenxi មានអាយុ ១៣ឆ្នាំគីជាអត្តពលិកមានវ័យក្មេងជាងគេ ដែលបានឈ្នះមេដាយមាស លើកប្រភេទកីឡា Skateboarding វិញ្ញាសា Women’s street ក្នុងព្រឹត្តិការណ៍ប្រកួតកីឡាកម្រិតទ្វីបអាស៊ី Asian Games 2022 ធ្វើឡើងនៅទីក្រុង Hangzhou ប្រទេសចិន។
ជ័យជម្នះរបស់កុមារី Cui Chenxi ដណ្ដើមបានតំណែងជើងឯកនៃការប្រកួតកីឡានេះ នៅវគ្គផ្តាច់ព្រ័ត្រ ខណៈដែលកីឡាការិនី Zeng Wenhui របស់ចិន ដណ្តើមបានមេដាយប្រាក់ ហើយកីឡាករ Ito Miyu របស់ជប៉ុនបានឈ្នះមេដាយសំរឹទ្ធ កាលពីថ្ងៃទី២៧ ខែកញ្ញា ឆ្នាំ២០២៣ នៅមជ្ឈមណ្ឌលកីឡា Qiantang Roller Sports Center ក្នុងទីក្រុង Hangzhou ខេត្ត Zhejiang ភាគខាងកើតប្រទេសចិន។
Cui Chenxi គឺជាអត្តពលិកជម្រើសជាតិកីឡាជិះស្គី របស់ប្រទេសចិន។ យោងតាមបទសម្ភាសន៍ជាមួយអ្នកសារព័ត៌មាន Cui បានចាប់ផ្តើមរៀនជិះស្គីជាលើកដំបូងនៅអាយុត្រឹមតែ៣ ឆ្នាំប៉ុណ្ណោះ ប៉ុន្តែរយ:ពេល ៣ឆ្នាំមុនចូលរួមប្រកួតក្នុងព្រឹត្តិការណ៍កីឡាកម្រិតទ្វីបអាស៊ី Asian Games រូបនាងបានធ្វើការហ្វឹកហាត់ជិះស្គីលើទឹកកក បន្ទាប់ពីមិនអាចចេញទៅក្រៅបានក្នុងអំឡុងពេលជំងឺរាតត្បាតកូវីដ១៩។
គិតត្រឹមព្រឹកថ្ងៃទី២៨ កញ្ញានេះ ប្រទេសចិនកំពុងឈរកំពូលតារាង នាមជាប្រទេសដែលដណ្ដើមបានមេដាយច្រើនជាងគេ សរុបចំនួន ១៤០គ្រឿង មេដាយមាស ៧៦គ្រឿង មេដាយប្រាក់ ៤៣គ្រឿង និងមេដាយសំរឹទ្ធ ២១គ្រឿង ខណ:មេដាយសរុបទី ៤៩៤ បានរកឃើញម្ចាស់ហើយ ក្នុងព្រឹត្តិការណ៍ប្រកួតកីឡាកម្រិតទ្វីបអាស៊ី Asian Game លើកទី១៩។
សូមបញ្ជាក់ថា ព្រឹត្តិការណ៍ប្រកួតកីឡាកម្រិតទ្វីបអាស៊ី Asian Games 2022 ធ្វើឡើងនៅទីក្រុង Hangzhou ប្រទេសចិន ចាប់ពីថ្ងៃទី២៣ ខែកញ្ញា ឆ្នាំ២០២៣ រហូងដល់នៅថ្ងៃទី៨ ខែតុលា ឆ្នាំ២០២៣ មានប្រទេសចូលរួមចំនួន ៤៥ប្រទេស ប្រកួតលើ ៤៨២វិញ្ញាសា និង៤០ប្រទេសកីឡា៕
