សិល្បៈជាតិ៖ អតីតម្ចាស់មកុដ Miss Grand Cambodia ឆ្នាំ២០២២ និងជាអតីតលំដាប់រងទី៥ Miss Grand International ឆ្នាំ២០២២ កញ្ញា ពេជ្រ វត្តីសារ៉ាវឌ្ឍី ទៅដល់ទីណា មានតែអ្នកចូលចិត្ត អាណិតស្រលាញ់ ពិតជាមិនខុសនោះឡើយ ព្រោះក្រៅពីក្ដោបបេះដូងហ្វេនបានហើយ សូម្បីតារារៀមច្បង អម្ពរទេវី ក៏សរសើរវត្តីមិនដាច់ពីមាត់ដែរ។
តារាខុសជំនាន់ពីរដួងគឺ កញ្ញា ពេជ្រ វត្តីសារ៉ាវឌ្ឍី និង អ្នកស្រី អម្ពរ ទេវី មានឱកាសជួបគ្នាដោយសារតែ អ្នកទាំងពីរបានចូលរួមសម្ដែងក្នុងភាពយន្តភាគបុរាណបែបប្រវត្តិសាស្ត្រខ្នាតវែងរឿង «អប្សរាមហាអង្គរ» របស់អ្នកនិពន្ធនិងដឹកនាំឆ្នើម ហ្វៃ សំអាង។ នៅក្នុងការបង្ហោះថ្មីមួយកាលពីថ្ងៃទី២៧ ខែកញ្ញា ឆ្នាំ២០២៣ នៅលើ Story IG របស់កញ្ញា ហុក សារីតុលា ដែលជាមិត្តជិតស្និទ្ធរបស់កញ្ញា វត្តី ហើយក៏ជាតួអង្គម្នាក់សាច់រឿងនេះ គេសង្កេតឃើញថា វត្តីបានអង្គុយបត់ជើង នៅចំពីខាងមុខតារារៀមច្បងដោយដៃរបស់តារាទាំងពីរដួងក្ដោបគ្នាយ៉ាងណែន ក្នុងនោះ អ្នកស្រី អម្ពរ ទេវី បានពោលសរសើរចំពោះវត្តី ថ្វីត្បិតតែមានសំឡេងរំខានច្រើន ប៉ុន្តែគេអាចស្ដាប់បានថាអ្នកស្រីបានពោលសរសើរចំពោះតួអង្គនាងឆផ្កា៖ «ខ្មែរយើងស្អាត មានភាពក្លាហាន អ៊ីចឹងបានយើងជាប់អ៊ីចឹងណាកូន យើងមិនចាញ់ប្រទេសជិតខាងទេ»។ ពេជ្រ វត្តីសារ៉ាវឌ្ឍី ត្រូវបានមហាជនទាំងក្នុងចង្កោមអ្នកសិល្បៈ និងអ្នកគាំទ្រ ស្រលាញ់ចូលចិត្តដោយសារតែក្មេងស្រីរូបនេះមានអត្តចរិតរួសរាយរាក់ទាក់ ទន់ភ្លន់ ដឹងខុសត្រូវទាបខ្ពស់ និង ចេះឱនលំទោនស្គាល់ចាស់ទុំ។ អ្នកគាំទ្រជឿថា វត្តី ច្បាស់ជានឹងទទួលបានវិជ្ជាសម្ដែង ក៏ដូចជាបទពិសោធន៍ ពីតារារៀមច្បងអម្ពរទេវី ដើម្បីមកអភិវឌ្ឍទឹកដៃសម្ដែងជាក់ជាមិនខាន ព្រោះវត្តីជាក្មេងស្រីម្នាក់ដែលទៅដល់ទីណាមានតែអ្នកផងអាណិតស្រលាញ់។
បន្ទាប់ពីការបង្ហោះរបស់កញ្ញា ហុក សារីតុលា រួច ពេជ្រ វត្តីសារ៉ាវឌ្ឍីបានចូលមក Add Story ហើយបង្ហាញពីទំហំទឹកចិត្តខ្លួនបន្ថែមចំពោះតារារៀមច្បងថា៖ «ជួបគ្នាថ្ងៃដំបូង អ្នកមីងប្រាប់ថាធ្លាប់តែឃើញក្មួយនៅក្នុងហ្វេសប៊ុក ចំណែកក្មួយ កាន់តែសំណាងដែលបានជួបហើយបានថតជាមួយអ្នកមីង»។
យោងតាមការរៀបរាប់ពីលោក ហ្វៃ សំអាង ដែលធ្លាប់បានបញ្ជាក់កន្លងមក តួអង្គនាង ឆផ្កា គឺជាតួអង្គមួយនៅក្នុងផ្ទៃរឿងមានភាពរឹងមាំមិនទន់ជ្រាយចំពោះរឿងស្នេហាទេ នាងក្លាហានហ៊ានទូលថ្វាយនៅចំពោះមុខព្រះភក្ត្រព្រះរាជា ព្រះបាទ ជ័យ វរធន និងព្រះរាជអគ្គមហេសី ឥន្ទ្រទេវី ទៀតផង។ ទស្សន:របស់ ឆផ្កា គ្រប់ដង្ហើមចេញចូលនៃជីវិត ព្រះឱរស ទេវបុត្រមិនត្រូវទ្រង់ព្រះចិន្តាថា អ្នកដទៃល្ងង់និងទន់ខ្សោយជាងអង្គឯងនោះទេ ត្រូវតែគម្បីសណ្តោសអភ័យទោសចំពោះកំហុសអ្នកដទៃ ពីព្រោះការធ្វើបែបនេះនាំឲ្យអ្នកមានកំហុសមានមុខមាត់ប្រសើរជាងការដាក់ទោសទណ្ឌ ចំណែកអ្នកស្រី អម្ពរ ទេវី កំពូលតារាសម្ដែងលំដាប់ប្រទេសដែលមានពិសោធន៍សម្ដែង ៣៤ឆ្នាំ សម្ដែងជាតួអង្គ អ្នកអង្គម្ចាស់ស្ត្រី កាមល ជានាដកាឯករបាំប្រចាំព្រះមហានគររហូតបានក្លាយទៅជាសាស្ត្រាចារ្យ៕