នៅព្រឹកថ្ងៃទី៦ ខែតុលានេះ ក្លិបបាល់ទាត់ សៀមរាប យូណាយធីត (Siem Reap United) បានប្រាកាសផ្តាច់នូវកិច្ចសន្យាលោក Oriol Mohedano Segura នាយកបច្ចេកទេស និងជាគ្រូបង្គោល បានសម្រេចព្រមព្រៀងគ្នាដោយក្តីគោរពទៅវិញទៅមកពីការ។
ហេតុផលនៃការផ្តាច់នូវកិច្ចសន្យានេះ ដោយក្លិបបានគោរពទៅតាមហេតុផលចម្បងរបស់លោក Oriol នឹងជម្រាបសាធារណៈជនឲ្យបានដឹងដូចតទៅ៖
១. លោក Oriol មានធុរៈផ្ទាល់ខ្លួន និងធុរៈគ្រួសារ ដោយតម្រូវឲ្យលោកត្រឡប់ទៅកាន់ប្រទេសអេស្ប៉ាញវិញញឹកញាប់។
២. លោក Oriol ជាប់ឈ្មោះក្នុងវគ្គសិក្សា UEFA Pro License ដែលជាអាជ្ញាបណ្ណគ្រូបង្វឹកអាជីពកម្រិតកំពូលប្រចាំទ្វីបអឺរ៉ុប ដោយតម្រូវឲ្យគាត់ត្រូវបន្តការសិក្សាផ្ទាល់នៅប្រទេសស្វីស រយៈពេល ៦ ខែ។
៣. លោក Oriol ឈានដល់ការចរចារដឹកនាំក្លិបអាជីពឈុតធំមួយនៅប្រទេសនេប៉ាល់ (បំពេញលក្ខខណ្ឌសិក្សា UEFA Pro License) ។
រំលឹកដែរថា ក្លិបបាល់ទាត់សៀមរាបយូណាយធីត បានចុះហត្ថលេខាជាផ្លូវការ តែងតាំង លោក Oriol Mohedano Segura ជាគ្រូបង្គោល និងនាយកបច្ចេកទេសកីឡាជាផ្លូវការរបស់ក្លិបបាល់ទាត់សៀមរាបយូណាយធីត កាលពីថ្ងៃទី២៩ខែសីហាកនុំ្លងទៅ។ លោក Oriol Mohedano Segura មានកុងត្រារយៈពេល ៥ឆ្នាំ ក្នុងការរួមការងារជាមួយសៀមរាបយូណាយធីត។
លោក Oriol Mohadano Segura គឺជាគ្រូបង្វឹកម្នាក់ ដែលទទួលបានការសិក្សាកម្រិត License A ដែលទទួលស្គាល់ដោយសហព័ន្ធបាល់ទាត់អឺរុប UEFA។ លោកគ្រូបង្វឹកសញ្ជាតិអេស្បាញ វ័យ ៣៧ឆ្នាំនេះ មានបទពិសោធន៍ដឹកនាំតាំងពីឆ្នាំ ២០១១ នៅតាមក្លិបបាល់ទាត់ ក្នុងប្រទេសអេស្បាញ ស្វីស ណ័រវេស ហ្វាំងឡង់ និងជាពិសេស គឺក្នុងប្រទេសកម្ពុជា។ នៅក្នុងឆ្នាំ ២០២២ កន្លងទៅនេះ លោកក៏បានរួមចំណែកជួយឲ្យក្រុមបាល់ទាត់មួយរបស់ប្រទេសកម្ពុជា ឱ្យទទួលបានលេខ ៣ ក្នុងលីគកំពូលរបស់កម្ពុជា Cambodian Premier League ផងដែរ៕