គូសម្ដែងដ៏ស័ក្តិសមក្នុងរឿង «មេឃខៀវ» លោក ប៉ែន ចំរុង ឈ្មោះក្នុងសិល្បៈ លី ម៉ៃកូ និងវណ្ណថៃ ថ្វីត្បិតតែវគ្គរបស់អ្នកទាំងពីរបានបញ្ចប់ទៅហើយក្ដី ប៉ុន្តែហ្វេននៅតែតាមដាន និងចង់ដឹងពីរឿងរ៉ាវខាងក្រៅឆាករវាងតារាសំណព្វចិត្តទាំងពីរជាបន្តទៀត ចំណែកអ្នកទាំងពីរក៏មិនកំណាញ់នោះទេ តែងតែឧស្សាហ៍បង្ហាញរូបភាពផ្អែមល្ហែម និងស្អាតៗចែកជូនដល់អ្នកគាំទ្រជានិច្ច។
កាលពីថ្ងៃទី២៥ ខែកក្កដា ម្សិលមិញនេះ តារាសម្ដែងវ័យក្មេងកំពុងពេញនិយមក្នុងស្រទាប់យុវវ័យពិសេសអ្នកនិយមទស្សនារឿង BL លោក លី ម៉ៃកូ និងដៃគូសម្ដែងរបស់ខ្លួន វណ្ណថៃ បានចែករំលែករូបភាព Sweet ជាច្រើនសន្លឹកជាមួយនឹងអ្នកគាំទ្រតាមរយៈហ្វេសប៊ុកហ្វេនផេករបស់ខ្លួន ដែលធ្វើឱ្យអ្នកគាំទ្ររបស់អ្នកទាំងពីររីកថ្លើមព្រោះតែភាពជិតស្និទ្ធិរវាងតារាទាំងពីរទោះវគ្គរបស់អ្នកទាំងពីរចប់ទៅហើយក្ដី។
រូបភាពផ្អែមល្ហែមខាងលើបានធ្វើឱ្យហ្វេនដែល Ship តារាទាំងពីរចូលមកខមមិនយ៉ាងច្រើនថាមើលទៅផ្អែមល្ហែមណាស់ មើលទៅសមគ្នាណាស់ តែរូបភាពទាំងនេះក៏ប្រហារបេះដូងនារីៗមួយចំនួនដែលលួច Crush លើតារាទាំងពីរដូចគ្នារហូតមានខ្លះបានចូលមកខមមិនលេង បន្លំមែនថា «ម៉ិចប្រុងមែនទែន អេ ស្រីៗអស់ហើយបងអើយបង»។
យ៉ាងណាមិញទំនាក់ទំនងស្អិតល្មួតរវាងតារាសម្ដែងវ័យក្មេងទាំងពីរស្ថិតក្នុងតំបន់ Friendzone ឬក៏រំកិលទៅលើសពីនោះ នៅមិនទាន់មានការបញ្ជាក់អះអាងណាមួយពីតារាទាំងពីរដួងនោះទេ មានត្រឹមតែរូបភាពផ្អែមល្ហែម និង Caption ដែលធ្វើឱ្យហ្វេនយកទៅគិតខ្លួនឯងតែប៉ុណ្ណោះ។ ត្រយងនឹងព្យាយាមទាក់ទងទៅកាន់តារាប្រុសសង្ហាទាំងពីររូបដើម្បីឱ្យគាត់ធ្វើការបកស្រាយនិងឆ្លើយតបចំពោះចម្ងល់របស់មហាជន៕
