កុមារី Victory Brinker គឺជាបេក្ខនារីដំបូងគេបង្អស់ដែលទទួលបានប៊ូតុងមាសចំនួន៥តែម្នាក់ឯង។ កុមារីវ័យ ៩ឆ្នាំដែលឡើងមកបង្ហាញទេពកោសល្យច្រៀងបទចម្រៀង Opera បានបង្កើតប្រវត្តិសាស្ត្រនៅលើវេទិកាប្រកួត «America’s Got Talent» ក្រោយពីការសម្ដែងសមត្ថភាពរបស់ក្មួយស្រីទាក់ចិត្តគណៈកម្មការនិងអ្នកទស្សនាយ៉ាងខ្លាំង។
កុមារីស្រី Victory បានជ្រើសរើសបទចម្រៀងមានចំណងជើង «Juliet’s Waltz» ប៉ុន្តែនឹងច្រៀងក្មួយស្រីបានទទួលស្គាល់ថាខ្លួនលួចភ័យ អាចនិយាយបានថាភ័យផងរំភើបផង។ Victory បានប្រាប់គណៈកម្មការទាំងអស់ថាបើសិនជាក្មួយស្រីឈ្នះ ក្មួយស្រីនឹងប្រើប្រាក់រង្វាន់១លានដុល្លារទៅទិញអាវយឺតពណ៌ឥន្ទធនូភ្លឺផ្លេកៗឱ្យ Simon Cowell ព្រោះក្មួយយល់ថាលោកគួរតែពាក់អាវពណ៌ខ្លះ។
បន្ទាប់ពីបង្ហាញសមត្ថភាពយ៉ាងអស្ចារ្យដែលគ្មានអ្នកណាសឹងនឹងជឿថាកុមារីវ័យត្រឹម៩ឆ្នាំមានទេពកោសល្យច្រៀងបទអូប៉េរ៉ាលំបាកល្អឥតខ្ចោះ ប៉ុន្តែ Simon Cowell បែរជានិយាយថាគណៈកម្មការនឹងមិនផ្ដល់ Yes ឱ្យទៅក្មួយស្រីឡើយ ដោយពួកគេបានរាប់ថយក្រោយចាប់ពី៥ចុះមក បូករួមជាមួយនឹងពិធីករលោក Terry Crews ពោលគឺមនុស្សប្រាំនាក់បានរួមគ្នាចុចលើប៊ូតុងមាស ឱ្យក្មួយស្រី ដែលជាសកម្មភាពមួយមិនធ្លាប់មានសោះនៅក្នុងកម្មវិធី America’s Got Talent កន្លងមក។
ប៊ូតុងមាសនេះបានធ្វើឱ្យកុមារីវ័យ៩ឆ្នាំដ៏មានទេពកោសល្យខាងលើបានឡើងទៅកាន់វគ្គ Live Show ដោយស្វ័យប្រវត្តិដូចគ្នាទៅនឹងម្ចាស់ប៊ូតុង ៤នាក់ផ្សេងទៀតពីកម្មវិធី៕
