តារាចម្រៀង ស៊ូ ដាណេ ឬមានឈ្មោះដើមកំណើតហៅថា ឆោម ច័ន្ទនេត បានចេញមកបង្ហោះសំណេរមួយដែលប្រៀបដូចជាសារដាស់ស្មារតីបងប្អូនប្រជាពលរដ្ឋកម្ពុជានៅថ្ងៃទី២៧ ខែកក្កដា ឆ្នាំ២០២១ នេះ ក្រោយបញ្ហាចម្រូងចម្រាសរឿងចម្លងតាមប្រាសាទអង្គរវត្តពីសំណាក់ភាគីថៃ នៅពេលនេះភាគីកម្ពុជាជាពិសេសមហាជនដែលធ្លាប់តែឈឺឆ្អាលបញ្ហានេះចាប់ផ្ដើមមានសភាពស្ងប់ស្ងាត់។
សំណេររបស់អ្នកនាង ស៊ូ ដាណេ ដែលធ្វើឱ្យមានការចាប់អារម្មណ៍ខ្លាំងនោះពីសំណាក់សាធារណជននោះមានអត្ថន័យទាំងស្រុងយ៉ាងដូច្នេះថា៖ «ពិតណាស់ !ប្រទេស២ ៣ ជិតគ្នាមិនអាចថាគ្មានវប្បធម៌ស្រដៀងគ្នាបាន ប៉ុន្តែ! ខ្មែរមានភាពអស្ចារ្យនៃប្រាសាទអង្គរវត្តដែលគ្មាននរណាដូច។ កុំយកកម្លាំងពូថៅដែលអាចកាប់ឈើបាន យកទៅប្រៀបធៀបនិងឡាមដែលមុតខ្លាំង ដែលអាចកោរបានតែសក់ក្បាល។ សេចក្តីប្រមាថរបស់ប្រទេសជិតខាងមកលើកម្ពុជាបង្ហាញនូវអកុសលធម៌បំផុត ប្រសិនបើព្យាយាមកសាងអង្គរវត្តទី២ ឱ្យខាងតែបាននោះ ! សូមកុំសោកស្តាយនៅពេលដែល ភាពវិនាសស្រាប់តែប្រសូត្រឡើងទន្ទឹមគ្នា
ខ្ញុំធ្លាប់សន្យាបើកថ្នាក់បង្រៀនអំពីសិល្បៈវប្បធម៌ ជាការដោះដូរនិងការរួបរួមប្រឆាំងទប់ស្កាត់កុំឱ្យមានការបន្តសាងសង់ សូមទប់ស្កាត់ឱ្យបាន ពេលនោះដែរ ប្អូនស្រីម្នាក់លើកឡើងចំអកថា៖គ្រាន់តែចង់បង្ហាត់កូនខ្មែរសោះចាំបាច់មានការដោះដូរ ?ជឿថាខ្មែរអាចធ្វើបាន ហើយគាត់សើច។ខ្ញុំក៏តបទៅគាត់ថា ៖ ធ្វើអ្វីម្យ៉ាងទៅប្អូន ! កុំនៅស្ងៀម ។»
គួរដឹងដែរថា អ្នកនាង ស៊ូ ដាណេ គឺជាអតីតសិល្បការិនីប្រចាំមន្ទីរវប្បធម៌ និងវិចិត្រសិល្បៈរាជធានីភ្នំពេញ។ ក្រៅពីជាតារាចម្រៀងសម័យមួយរូបដែលមានទឹកដមសំឡេងលំនាំតារាចម្រៀងជំនាន់ដើមអ្នកស្រី បែ៉ន រ៉ន ហើយនោះ អ្នកនាង ស៊ូ ដាណេក៏មានជំនាញសិល្បៈបុរាណជាច្រើនមុខទៀតផងដែរដូចជា៖ យីកេ របាំបុរាណ និងស្មូតជាដើម៕
