កីឡាករ វឿន វាសនា សមាជិកក្រុមបាល់ទះជម្រើសជាតិកម្ពុជា បានចេញដំណើរទៅចូលរួមក្លិបថ្មីរបស់ខ្លួន កាលពីថ្ងៃអាទិត្យ ទី៨ ខែតុលា ឆ្នាំ២០២៣ កន្លងទៅជាមួយក្លិប Win Streak ដែលជាក្លិបលីគបាល់ទះនៅតៃវ៉ាន់ (Enterprise Volleyball League)។
ឥឡូវនេះលីគកំពូលតៃវ៉ាន់ បានដាក់បញ្ចូលឈ្មោះ វឿន វាសនា ក្នុងវិបសាយរបស់ខ្លួនហើយ ដោយរូបគេពាក់អាវលេខ៩ ជាមួយក្លិបថ្មីរបស់ខ្លួន។ មុនដំណើរទៅដល់របស់វឿន វាសនា ក្លិប Win Streak មានសមាជិកជាកីឡាករបរទេស ដូចជា Bryan Bagunas ក្រុមជម្រើសជាតិហ្វីលីពីន និងកីឡាករ Sim Jian Qin របស់ម៉ាឡេស៊ី។ ដូច្នេះដំណើរទៅដល់របស់ វឿន វាសនា គឺជំនួសកូតាកីឡាករបរទេសនៅពេលបាត់ឈ្មោះកីឡាករ Sim Jian Qin ចេញពីក្រុម។
មុនចេញដំណើរទៅកោះតៃវ៉ាន់ វឿន វាសនា បានប្រាប់ក្រុមការងារសារព័ត៌មានត្រយង ថា រូបគេបានចុះកុងត្រា២ឆ្នាំជាមួយ ក្រុម Win Streak ជាថ្នូរនឹងថ្លៃនឿយហត់ បើកបូកទាំងប្រាក់ខែ ថ្លៃធ្វើដំណើរ ស្នាក់នៅ ហូបចុក និងអត្ថប្រយោជន៍ផ្សេងទៀតប្រមាណខ្ទង់ម៉ឺនដុល្លារអាមេរិក។
សូមទស្សនាការកិច្ចសម្ភាសន៍ ជាមួយ វឿន វាសនា មុនចេញដំណើរកន្លងទៅ៖
សម្រាប់ក្រុម Win Streak ទើបតែបង្កើតឡើងនៅឆ្នាំ២០២២ នោះទេ ប៉ុន្តែថៅកែក្លិនលោក Lien Hua-Jung ដែលជាអគ្គនាយកក្រុមហ៊ុន Brilliant Footwear Corporation ធ្លាប់បានឧបត្ថម្ភបង្កើតក្លិបបាល់ទះមួយគឺTaichung Lien Chuang បច្ចុប្បន្នប្តូរទៅជា Taichung Apollo ប៉ុន្តែក្រោយមកក៏ដកខ្លួនចេញដោយសារមានបញ្ហា នៅគ្រានោះ។ ដូច្នេះនេះជាការត្រឡប់មកវិញរបស់លោក Lien Hua-Jung ស្របពេលដែលក្លិប Win Streak ក៏មានកូតាចូលរួមប្រកួតជើងឯកក្លិបប្រចាំទ្វីបអាស៊ី តំណាងឱ្យតៃវ៉ាន់ ផងដែរ ក្នុងនាមជាម្ចាស់ជើងឯកឆ្នាំចាស់។
លីគបាល់ទះតៃវ៉ាន់ Enterprise Volleyball League មានសមាជិកចំនួន៦ក្រុម រួមមាន Conti Sports, TMFI Falcons, Mizuno, Taichung Apollo, Taipower និងWin Streak។ សម្រាប់ក្រុមWin Streak ជាម្ចាស់ជើងឯកឆ្នាំចាស់ ក្រោយយកឈ្នះក្រុមខ្លាំង Pingtung Taipower នៅវគ្គផ្ដាច់ព្រ័ត្រ ៣សិតទល់២សិត ដោយលទ្ធផល 19:25, 25:20,18:25,25:21និង15:12៕