តារាចម្រៀង Baek Yerin កាលពីថ្ងៃអង្គារទី២៧ ខែកក្កដា ឆ្នាំ២០២១ បានបង្ហោះរូបភាពថ្មីលើគណនី IG (Instagram) ដែលធ្វើឱ្យអ្នកបានឃើញហើយសឹងតែបាត់ដង្ហើមជាមួយនឹងម៉ូដសក់ខ្លីនិងស្នាមសាក់ជាច្រើនពេញដងខ្លួន។
រូបភាពខាងលើដែល Baek Yerin បានផុសទទួលបានការ Like ជិត ១០០,០០០ និងមតិវិជ្ជមានរាប់មិនអស់ពីអ្នកគាំទ្ររបស់កញ្ញា ត្រឹមតែពីរបីម៉ោងនៃការបង្ហោះតែប៉ុណ្ណោះ ប៉ុន្តែមិនមែនមនុស្សគ្រប់គ្នាសុទ្ធតែនិយាយពាក្យល្អនិងពីរោះចំពោះរូបថតខាងលើនេះនោះទេ។ ក្នុងនោះមានអ្នកបញ្ចេញមតិមួយរូបបានធ្វើការឆ្លើយតបនៅខាងក្រោមរូបរបស់ Yerin យ៉ាងដូច្នេះ៖ «អ្នកពិតជាស្អាតណាស់។ តែ…កុំសាក់បន្ថែមច្រើនទៀតអី។ ខ្ញុំចង់បានន័យថា តើអ្នកនឹងយករូបស្ទីគឃឺទៅបិទលើរថយន្ត Benthley ទេ? ចម្លើយគឺអត់ទេ។»
យ៉ាងណាមិញ Yerin បានឆ្លើយតបចំពោះបុគ្គលខាងលើយ៉ាងថ្លៃថ្នូរវិញថា៖ «ខ្ញុំមិនមែនជារថយន្ត Benthley នោះទេ។ ខ្ញុំគ្រាន់តែជា Yerin ប៉ុណ្ណោះ។ សូមអរគុណ XX» អ្នកគាំទ្រជាច្រើនបានចូលការពារតារាស្រីរូបនេះដោយបានបញ្ចេញមតិថា ៖ «វាជារឿងគួរឱ្យស្អប់ខ្ពើមណាស់ដែលអ្នកឯងយកមនុស្សទៅប្រៀបធៀបជាមួយនឹងវត្ថុបែបនោះ។ កុំរវល់ជាមួយនាង។» ខណៈអ្នកខ្លះទៀតបានសរសេរថា ៖ «រាងកាយរបស់នាង ទុកឱ្យនាងជាកំណត់ទៅ។ ខ្វល់ខ្វាយតែរឿងរបស់ខ្លួនឯងបានហើយសម្លាញ់» ។ល។
ថ្មីនេះ Baek Yerin បានចេញអាល់ប៊ុមចម្រៀងទោលរបស់ខ្លួនដែលមានឈ្មោះថា «tellusboutyourself» ក៏ដូចជាចេញបទចម្រៀងថ្មីជាមួយនឹងសមាជិកទាំង៤រូបទៀតនៃក្រុមចម្រៀងរ៉ក់ «The Volunteers» របស់ខ្លួន។
ទស្សនាព័ត៌មានជាវីដេអូខាងក្រោមនេះ៖