ក្នុងផ្ទះ គួរតាំងគំនូរអ្វីខ្លះ ដើម្បីឲ្យត្រូវក្បួនហុងស៊ុយ? បច្ចុប្បន្ននេះ ប្រជាជនភាគច្រើនតែងតែជឿលើការតាំងរូបភាពដើម្បីឲ្យត្រូវតាមក្បួនហុងស៊ុយ។ ពួកគេជឿជាក់ថា ការតាំងរូបភាពតុបតែងផ្ទះតាមបែបហុងស៊ុយនេះ អាចជួយផ្ដល់នូវភាពចម្រុងចម្រើន និងលើករាសីដល់ម្ចាស់។ តោះ! មកដឹងថា មានសត្វអ្វីខ្លះដែលអាចជួយលើករាសីម្ចាស់ដូចខាងក្រោម៖
១. រូបសេះ៖
សេះ ជាសត្វធាតុភ្លើង គេតែងមានជំនឿថា សេះជាសត្វដែលពេញប្រៀបទៅដោយកម្លាំងធាតុ ហើយទិសប្រចាំឆ្នាំមមី គឺទិសខាងត្បូង។ លើសពីនេះទៀត សេះជាសត្វតំណាងឲ្យមន្ត្រីមានលំដាប់ខ្ពស់ និងការរស់នៅសុខសប្បាយ។ សេះ គឺសំដៅលើភាពរហ័សរហួន អាចធ្វើឲ្យការប្រកបមុខជំនួញ និងការងាររបស់អ្នកទទួលបានជោគជ័យកាន់តែឆាប់រហ័ស។ លក្ខណៈសេះមង្គល គឺជាសេះដែលកំពុងរត់ ឬលោត។ គេច្រើនដាក់តាំងរូបសេះចំនួន៨ក្បាល មានន័យថា បង្កើនភាពរហ័សរហួន និងស្ទាត់ជំនាញ។
២. នាគ ៖
តំណាងឲ្យភាពរុងរឿងបំផុត និងជានិមិត្តរូបសំខាន់មួយក្នុងប្រវត្តិសាស្ត្ររបស់ជនជាតិចិន។
រូបនាគជាន់ពពក៖ ជានិមិត្តរូបនៃអំណាច និងការបង្គាប់បញ្ជាក្នុងការងារ។ ប្រសិនបើអ្នកដាក់តាំងនៅទិសខាងកើតផ្ទះ សត្វនាគនឹងបញ្ចេញឫទិ្ធអំណាចខ្លាំងបំផុត។ លើសពីនេះទៀត អ្នកអាចតាំងរូបនាគនៅកន្លែងណាក៏បាន ដើម្បីនាំជោគលាភដ៏មហាសាលចូលក្នុងផ្ទះ។ សត្វនាគ អាចធ្វើឲ្យអាជីវកម្មរបស់អ្នកដំណើរការបានល្អផងដែរ ប្រសិនបើយកវាទៅទុកនៅកន្លែងធ្វើការ នឹងបង្ហាញនូវភាពធំធេង អំណាច បារមី និងស្ថិតស្ថេរ។
៣. ត្រី ៖
តំណាងឲ្យមង្គល ភាពសម្បូរបែប និងគង់វង្ស។ ម្យ៉ាងទៀត ត្រីសំដៅលើផលកម្រៃ ឬផលប្រយោជន៍ និងការសម្រេចក្តីប្រាថ្នារបស់អ្នកក្នុងការប្រកបមុខជំនួញផងដែរ។ រូបត្រីមាស អាចផ្ដល់ឲ្យអ្នកមានមាសហូរហៀរ។ ត្រីមាសនេះត្រូវបានគេយកទៅធ្វើជាអំណោយដ៏សំខាន់ជូនគ្នាទៅវិញទៅមកក្នុងថ្ងៃមង្គលផ្សេងៗ
៤. សំពៅ ៖
រូបសំពៅ គឺតំណាងឲ្យភាពចម្រើនរុងរឿងខាងមុខជំនួញ ដែលនាំមកនូវមាសប្រាក់ ជួយជំរុញជោគលាភ ព្រមទាំងជួយឲ្យមុខជំនួញរបស់អ្នកទទួលបានជោគជ័យកាន់តែខ្លាំងឡើង ។
៥-ដំរី ៖
ជាសត្វដែលមានរូបរាងខ្ពស់ហើយធំ មាននិស្ស័យជាមិត្ត និងមិនមែនជាសត្វសាហាវនោះទេ ។ ក្រៅពីនេះ ដំរីជាសត្វដែលស៊ីធញ្ញជាតិជាអាហារ វាក៏មិនគំរាមដល់សត្វផ្សេងៗទៀតក្នុងលោកដែរ។ បើនិយាយបែបហុងស៊ុយ គឺតំណាងឲ្យទីខ្ពស់ ធំសម្បើម ប្រៀបដូចជាភ្នំ ហើយដំរីអាចបំបែកថាមពលមិនល្អផ្សេងៗបានផងដែរ។ ក្រៅពីនេះ ដំរី គឺតំណាងឲ្យភាពជោគជ័យ សម្បូរបែបដល់ជីវិតរបស់អ្នក និងក្រុមគ្រួសារ ។
៦-ប្រើស ៖
ជាសត្វមង្គលដែលគេនិយមប្រើក្នុងរឿងហុងស៊ុយ ព្រោះគេជឿថា ប្រើសនឹងជួយឲ្យសមតាមបំណងនូវអ្វីដែលខ្លួនប្រាថ្នា និងតំណាងឲ្យការលូតលាស់។ ប្រសិនបើផ្ទះណាកើតរឿងរ៉ាវ ឬអ្នករស់នៅក្នុងផ្ទះឈ្លោះប្រកែកគ្នា គឺអាចប្រើរូបប្រើសនេះដើម្បីជួយកែរឲ្យបញ្ហាទាំងឡាយស្ងប់ស្ងាត់បាន។ ចំណែកទីតាំង គឺមិនគួរដាក់បែរមុខចេញពីមុខផ្ទះឡើយ អ្នកគួរដាក់វាបែរមុខចូលផ្ទះវិញ ព្រោះប្រើសនឹងអាចនាំយករឿងល្អចូលផ្ទះបាន ។
៧-ក្រៀល ៖
គេចាត់ទុកជា សត្វមង្គលមានអត្ថន័យល្អ ។ ការយកសត្វក្រៀលមកតុបតែងផ្ទះ នឹងជួយឲ្យអ្នកមានអាយុយឺនយូរ សុខភាពរឹងមាំ តួនាទីការងារស្ថិតស្ថេរ និងជំរុញឲ្យការរៀនសូត្រឈ្លាសវៃ។ ម្យ៉ាងទៀត នឹងជួយឲ្យសមាជិកក្នុងគ្រួសារ មានអាយុយឿនយូរ មានសុខភាពរាងកាយមាំមួន ។ ប្រសិនបើមានអ្នកឈឺ នឹងអាចជាសះស្បើយឆាប់ៗ។ រីឯមនុស្សវ័យធ្វើការក្នុងគ្រួសារ នឹងមានតួនាទីការងារល្អ រលូន គ្មានឧបសគ្គ ៕
សម្រួលដោយ៖ ជុំ ពេជ្រវណ្ណារ៉ា