នៅក្នុងជម្រុះ Euro 2024 នៅកីឡដ្ឋាន Koning Boudewijnstadion រវាងបែលហ្ស៊ិក និងស៊ុយអែត កាលថ្ងៃពីយប់ថ្ងៃទី១៦ ខែតុលា ត្រូវបានផ្អាកភ្លាមៗនៅតង់ទី១ បន្ទាប់ពីមានការបាញ់សម្លាប់អ្នកគាំទ្រស៊ុយអែត ២រូបនៅទីក្រុងប្រ៊ុចសែល។
ក្រោយចប់ការប្រកួត គ្រូបង្វឹកស៊ុយអែត Janne Andersson បាននិយាយថា៖ «អ្នករាល់គ្នាសោកស្តាយខ្លាំងណាស់ ហើយកីឡាករទាំងអស់បានយល់ព្រមមិនបន្តការប្រកួត»។
ស្របពេលខ្សែការពារក្រុម Manchester United របស់ស៊ុយអែត កីឡាករ Victor Lindelof បានបន្ថែមថា៖ «យើងបានពិភាក្សាអំពីការប្រកួតដែលនៅសល់ជាមួយបែលហ្ស៊ិក។ ការសន្និដ្ឋានគឺមិនត្រូវលេងទៀតទេ។ អ្វីដែលសំខាន់បំផុតនោះគឺថាអ្នកគាំទ្រមានសុវត្ថិភាពនៅពេលនេះ»។
ខណ:នាយករដ្ឋមន្ត្រីបែលហ្ស៊ិក លោក Alexandre de Croo បានបញ្ជាក់ថា៖«មនុស្សពីរនាក់ដែលត្រូវបានគេបាញ់សម្លាប់កាលពីល្ងាចថ្ងៃចន្ទ ជាជនជាតិស៊ុយអែត»។
យោងតាមការចុះផ្សាយរបស់ Reuters និង Sky Sports បានឱ្យថាខ្មាន់កាំភ្លើងត្រូវបានបំផុសគំនិតដោយរដ្ឋអ៊ីស្លាម (Islamic State) ប៉ុន្តែរហូតមកដល់ពេលនេះមិនមានទំនាក់ទំនងអ្វីជាមួយស្ថានភាពនៅអ៊ីស្រាអែល និងប៉ាឡេស្ទីនទេ ពោលគឺរង់ចាំការ Update បន្ថែមទៀត៕
