លោក ណុះ ស្លេះ ប្រធានសហព័ន្ធកីឡាម៉ូតូទឹកម្ពុជា ប្តេជ្ញារៀបចំការប្រកួតកម្រិតជាតិ និងអន្តរជាតិក្នុងរយៈពេលមួយឆ្នាំឲ្យបាន ៣ លើកយ៉ាងតិចដើម្បីការអភិវឌ្ឍធនធានមនុស្សឲ្យកាន់តែរីកចម្រើនបន្ថែមទៀត ជាពិសេសកម្លាំងស្មារតីនេះបានធ្វើឲ្យប្រភេទកីឡាម៉ូតូទឹកកម្ពុជា បានកសាងកេរ្តិ៍ឈ្មោះលើឆាកអន្តរជាតិ ជាក់ស្តែងដូចជាសមិទ្ធផលស៊ីហ្គេម ឆ្នាំ២០២៣ជាដើម។
លើកពីនេះលោក ណុះ ស្លេះ ប្រធានសហព័ន្ធមានប្រសាសន៍ថា៖«យើងនឹងស្នើសុំបន្តទៀតដើម្បីលើកទឹកចិត្ត កីឡាករ របស់ យើងដែលមានស្នាដៃមានសមត្ថភាពដណ្តើមបានមេដាយ មាសពីការប្រកួតនានាទាំងកម្រិតតំបន់ និង អន្តរជាតិ ដែលលេចធ្លោដើម្បីលើកទឹកចិត្តពួកគាត់ឲ្យមានលំនឹង។ មិនមែនដើម្បីតែអាជីពកីឡាតែមួយមុខ នោះទេប៉ុន្តែ អនាគតរបស់ពួកគាត់ជាមន្ត្រីរាជការ មន្ត្រីនគរបាលជាតិ ដែលទាំងអស់នេះ រាជរដ្ឋាភិ បាល តែងតែងយកចិត្តទុក ដាក់លើកទឹកចិត្តឲ្យមានអនាគតវែងឆ្ងាយបន្ថែមទៀត»។
កាលពីពេលថ្មីៗ កីឡាករម៉ូតូទឹកកម្ពុជា បានបញ្ចប់ការចូលរួមព្រឹត្តិការណ៍ Water Jet World Series ឆ្នាំ២០២៣ ជុំទី៣ នៅសហរដ្ឋអាមេរិក ប្រកួតពីថ្ងៃទី០៤ ដល់ថ្ងៃទី០៨ ខែតុលា ឆ្នាំ២០២៣។ កីឡាករ សាលី ហ្វីលីន បានដណ្ដើមបានមេដាយ រួមមានមេដាយមាស ២ គ្រឿង ប្រាក់ ២ គ្រឿង និងសំរឹទ្ធ ១ គ្រឿង។ បញ្ចប់ព្រឹត្តិការណ៍ កីឡាម៉ូតូទឹកកម្ពុជា បានដណ្ដើមបានមេដាយរហូតដល់ ៩គ្រឿង ដ្បិតកន្លងមក ខ្លួន និងសិស្សប្អូន ម៉ីន មូស្ដាន់ ដណ្ដើមបានមេដាយយ៉ាងច្រើនម្នាក់មួយ ឬ ២គ្រឿងប៉ុណ្ណោះ៕
ប្រភព៖ NOCC