មិនធម្មតា! បុរសម្នាក់ប៉ុនប៉ងដើរក្នុងពោងបាល់អណ្ដែតទឹក លើមហាសមុទ្រអាត្លង់ទិក ឆ្លងកាត់ពីរដ្ឋមួយទៅរដ្ឋមួយ

បុរសជើងខ្លាំងម្នាក់ឈ្មោះ រេ រ៉ីហ្សា បាលូឈី (Ray Reza Baluchi) គ្រោងចំណាយពេល ៣ទៅ ៤សប្ដាហ៍ ក្នុងការធ្វើដំណើរលើមហាសមុទ្រអាត្លង់ទិក ដោយចាប់ផ្ដើមចេញដំណើរពីរដ្ឋ Florida ទៅរដ្ឋ New York ការធ្វើដំណើររបស់លោក គឺដើរក្នុងពោងអណ្ដែតទឹកមានរាងដូចជាបាល់។

ការធ្វើដំណើរលើផ្ទៃមហាសមុទ្រមិនមែនជារឿងងាយទេ លោក រេ រ៉ីហ្សា បានបោះបង់ចោលការខិតខំប្រឹងប្រែងរបស់លោក បន្ទាប់ពីទើបតែចេញធ្វើដំណើរបានចំងាយ ៣៥គីឡូម៉ែត្រពីកន្លែងដែលលោកចាប់ផ្ដើម ដោយចំណាយពេលជិត ១ថ្ងៃប៉ុណ្ណោះ ហើយលោកក៏បានសម្រេចចិត្តដើរឲ្យពោងបាល់អណ្តែតទឹករបស់លោកខិតឡើងមកលើឆ្នេរសមុទ្រនៅទីក្រុង ផាម ខូស៏ (Palm Coast) ដែលបានធ្វើឲ្យអ្នកនៅក្បែរឆ្នេរនោះមានការភ្ញាក់ផ្អើលយ៉ាងខ្លាំង។

លោក រេ រ៉ីហ្សា បានប្រាប់សារព័ត៌មាន CNN ថា កត្តាដែលធ្វើឲ្យលោកសម្រេចចិត្តបោះបង់ចោលការប៉ុនប៉ងដ៏ធំនេះព្រោះតែ បញ្ហាសម្ភារៈបរិក្ខារមានភាពខ្វះខាតដោយសារវាជ្រុះបាត់ពេលកំពុងធ្វើដំណើរ។ លោកបានបន្ដថា មូលហេតុដែលលោកសម្រេចចិត្តដើរលើទឹកដោយពោងបាល់អណ្ដែតទឹកនេះគឺដោយសារតែលោកចង់រៃអង្គាសប្រាក់ ដើម្បីឆ្លើយតបនឹងមូលនិធិសប្បុរសធម៌លើកដំបូងរបស់លោក។

លោកបានបញ្ជាក់បន្តថា ក្រុមការងាររបស់លោកនឹងទិញឧបករណ៍តាមដានសកម្មភាព និងឧបករណ៍ផ្សេងៗទៀតមកជំនួសបន្ថែម ដូច្នេះលោកនឹងបន្តដំណើរទៅមុខរហូតដល់គោលដៅ ប៉ុន្ដែឆ្មាំសមុទ្រមិនអនុញ្ញាតឲ្យលោកបន្តធ្វើដំណើរបែបនេះទេ។

អ្នកនាំពាក្យឆ្មាំសមុទ្រអាមេរិកម្នាក់បានប្រាប់សារព័ត៌មាន CNN ថា គេតម្រូវឲ្យលោក រេ រ៉ីហ្សា មានឧបករណ៍នាំផ្លូវនិងសុវត្ថិភាពដ៏ជាក់លាក់ មានទូកអមការពារ និងរៀបចំផែនការធ្វើដំណើរ មុនពេលគាត់ចេញដំណើរម្ដងទៀត។ ស្របពេលជាមួយគ្នា លោក រេ រ៉ីហ្សា និយាយថា លោកចង់ធ្វើដំណើរតែឯង ដោយមានក្រុមការងារចាំជួយនៅលើគោក។ ​

សូមបញ្ជាក់ថា ពោងបាល់បណ្ដែតទឹកនេះត្រូវបានរៀបផ្គុំដោយដែកព័ទ្ធជុំវិញ អមជាមួយនឹងពោងសងខាង មានចន្លោះសម្រាប់ឲ្យមនុស្សដើរពីខាងក្នុង ប្រៀបដូចជាសត្វកណ្ដុររត់នៅក្នុងកងរង្វិលអីចឹង៕

 ប្រែសម្រួលដោយ៖ ជុំ ពេជ្រវណ្ណារ៉ា