សិល្បៈជាតិ៖ មរណភាពនៃអ្នកចេះដឹង និងជនសកម្មដែលបានលះបង់ទាំងធនធាន ក៏ដូចជាពេលវេលាដើម្បីជួយដល់សង្គមជាតិ ដូចជាឧកញ៉ា ឈាង រ័ត្ន នៅតែជាប្រធានបទដែលសាធារណជនផ្តោតការចាប់អារម្មណ៍ ក៏ដូចជាអាល័យស្រណោះ។ ក្នុងចំណោមអ្នកដែលសោកស្ដាយការចាកចេញគ្មានថ្ងៃវិលវៃរបស់លោកក៏មានលោក តាន់ គីមសួរ មួយរូបផងដែរ ដោយលោកបានចេញមកបង្ហើបថាសោកស្ដាយ បើលោកនាំឧកញ៉ា ឈាង រ័ត្ន ឡើងកំពូលភ្នំឱរ៉ាល់ ម្ល៉េះសមមច្ចុរាជមិនអាចផ្ដាច់យកជីវិតបាននោះឡើយ។
លោក តាន់ គីមសួរ ដែលជាបុគ្គលម្នាក់មានភាពស្និទ្ធស្នាលជាមួយនឹងគ្រួសារ ឧកញ៉ា ឈាង រ័ត្ន និងអ្នកនាង ស្រីអូន នារាត្រីថ្ងៃទី១៧ ខែតុលា ឆ្នាំ២០២៣ ពោលគឺក្រោយពិធីបុណ្យ៧ថ្ងៃនិង១០០ថ្ងៃរបស់ឧកញ៉ា ឈាង រ័ត្ន បុរសលេចធ្លោលើសកម្មភាពថែរក្សានិងអភិវឌ្ឍព្រៃឈើរូបនេះបានរំលឹកអនុស្សាវរីយ៍ចុងក្រោយរវាងខ្លួននិងឧកញ៉ា ឈាង រ័ត្ន ក្នុងកម្មវិធីឆ្ពោះទៅរកភាពធូរស្រាលពីជំងឺផ្លូវចិត្ត ក្រោមការណែនាំនិងអប់រំផ្លូវចិត្តពីព្រះអង្គគ្រូ គូ សុភាព។ ជាការកត់សម្គាល់នៅក្នុងការរៀបរាប់នោះ លោក តាន់ គីមសួរ បានបង្ហាញក្ដីសោកស្ដាយដែលឧកញ៉ា ឈាង រ័ត្ន មិនបានឡើងភ្នំឱរ៉ាល់ជាមួយនឹងខ្លួន ព្រោះលោកយល់ថាបើសិនជាពេលនោះឧកញ៉ា ឈាង រ័ត្ន ព្រមឡើងភ្នំ ប្រហែលជាមច្ចុរាជកំណាចនោះមិនអាចមកផ្ដាច់សង្ខាររបស់លោកបានឡើយ។ សូមតាមដានការរៀបរាប់ទាំងស្រុងរបស់ លោក តាន់ គីមសួរ ដូចតទៅ៖
«ទាំងនេះគឺជារូបភាពចុងក្រោយនៃការជួបមុខគាត់នៅក្នុងកម្មវិធីឆ្ពោះទៅរកភាពធូរស្រាលពីជំងឺផ្លូវចិត្ត គាត់បានដាក់ខ្លួនមកចូលរួមជាមួយសិក្ខាកាមផ្សេងៗទៀតដើម្បីរកវិធីបន្តរស់ទៅមុខទៀតដោយយកចិត្តទុកដាក់ស្ដាប់អំពីការណែនាំរបស់លោកគ្រូចិត្តសាស្ត្រ និងឱវាទអប់រំផ្លូវចិត្តរបស់ព្រះអង្គគ្រូ គូ សុភាព។ វាពិតជារឿងមួយដ៏សោកស្ដាយខ្លាំងណាស់ចំពោះខ្ញុំដែលខ្ញុំបានប្រឹងព្យាយាមខ្លាំងណាស់ក្នុងការចាប់ទាញដៃរបស់គាត់ តែជាលទ្ធផលនៅតែមិនអាចទាញឈ្នះមច្ចុរាជបាន បើពេលនោះគាត់ព្រមផ្ដល់ឱកាសឲ្យខ្លួនឯងបានឡើងទៅកំពូលភ្នំឱរ៉ាល់ជាមួយខ្ញុំ ប្រហែលជាមច្ចុរាជដ៏កំណាចនោះរកគាត់មិនឃើញទេ សុំអភ័យទោសផង ខ្ញុំសូមបង្ហោះពីគាត់ជាលើកចុងក្រោយដើម្បីឲ្យធូរស្រាលផ្លូវចិត្តបន្តិច»
នៅក្នុងកម្មវិធីខាងលើ ក្រៅអំពី លោក តាន់ គីមសួរ ឧកញ៉ា ឈាង រ័ត្ន ក៏មានវត្តមាន Influencer វ័យក្មេង ពេជ្រ សួគ៌លី លោក ប៉ែន ចំរុង និងអ្នកស្រី ម៉ម សុម៉ាលី ផងដែរ។
គេនៅចាំបានថា កាលពីថ្ងៃទី៩ ខែកក្កដាឆ្នាំ២០២១ ត្រូវនឹងរុក្ខទិវា លោក តាន់ គីមសួរ និងក្រុមអ្នកប្រយុទ្ធបៃតង បានប្រតិបត្តិការ បាចគ្រាប់ពូជឈើ ៤០០០០០ (៤សែនគ្រាប់) នៅលើទឹកដីឱរ៉ាល់នៃខេត្តកំពង់ស្ពឺ ក្នុងកម្មវិធីព្យាបាលដំបៅផែនដី ដែលលោកជាស្ថាបនិកផ្ដួចផ្ដើមឡើង ដោយយុទ្ធនាការកាលណោះមានតារាល្បីចូលរួមជាច្រើនដួង ក្នុងនោះក៏មានអ្នកនាងស្រីអូនសម្រស់ធម្មជាតិ និងឧកញ៉ា ឈាង រ័ត្ន ផងដែរ៕