ពានរង្វាន់ King Cup រៀបចំឡើងដំបូងពីឆ្នាំ១៩៦៨ ដោយសហព័ន្ធកីឡាបាល់ទាត់ថៃ ដែលគ្រាខ្លះរៀបចំរាល់ ១ឆ្នាំម្តង ហើយឆ្នាំខ្លះប្តូរទៅជា២ឆ្នាំម្តង។ កម្ពុជា ធ្លាប់បានអញ្ញើញឱ្យចូលរួមប្រកួតបានចំនួន ២លើកដែរ ក្នុងចំណោម៤៨លើកមកនេះ ដោយឆ្នាំចូលរួមដំបូងនៅ១៩៧៣ ក្នុងនាមជាសាធារណៈរដ្ឋខ្មែរ ដែលធ្វើឡើងរាជធានីបាងកក ចន្លោះថ្ងៃទី១៦ ដល់២៥ ខែធ្នូ មាន៦ក្រុមចូលរួម ស្របពេលដែលកម្ពុជា ធ្លាក់ត្រឹមវគ្គចែកពូល ក្រោយចាញ់កូរ៉េខាងត្បូង ៥-០ និងបន្តចាញ់ម៉ាឡេស៊ី ៣-២។ កាលនោះកូរ៉េខាងត្បូង ជាម្ចាស់ជើងឯក។
ចូលដល់ឆ្នាំ១៩៧៤ ក្រុមសាធារណៈរដ្ឋខ្មែរ ចូលប្រកួតម្តងទៀតក្នុងចំណោមសមាជិកទាំង៨ក្រុម ដែលមាន២ពូល ចាប់ពីថ្ងៃទី១០ ដល់២០ ខែធ្នូ នៅរាជធានីបាងកក ដដែល។ កម្ពុជាស្ថិតនៅពូល A ជាមួយ កូរ៉េខាងត្បូង, វៀតណាមខាងត្បូង ក្រុមPSM Makassar (ប្រទេសឥណ្ឌូនេស៊ី) ខណ:ពូល B មានម្ចាស់ផ្ទះ ថៃ, ម៉ាឡេស៊ី, សិង្ហបុរី និងឡាវ។
តាមលក្ខខ័ណ្ឌដែលបានកំណត់ក្រុមទាំងអស់ត្រូវប្រកួតជម្រុះក្នុងពូល ហើយក្រុមលេខ ១ និងលេខ២ ឡើងទៅកាន់វគ្គពាក់កណ្ដាលផ្ដាច់ព្រ័ត្រ។ ជាលទ្ធផលនៃវគ្គជម្រុះតាមពូល កម្ពុជា បានយកឈ្នះវៀតណាមខាងត្បូង ក្នុងលទ្ធផល ៣ទល់និង២ ហើយប្រកួតទី២ កម្ពុជា បានចាញ់កូរ៉េខាងត្បូង ក្នុងលទ្ធផល ២ទល់និង១ និងប្រកួតទី៣ កម្ពុជា បានប្រកួតស្មើក្រុម PSM Makassar (ក្លិបមកពីឥណ្ឌូនេស៊ី) ក្នុងលទ្ធផល ១-១។
ដោយសារកម្ពុជា មានពិន្ទុស្មើគ្នាជាមួយវៀតណាមខាងត្បូង នៅក្នុងពូល តម្រូវឱ្យក្រុមទាំង ២ប្រកួតវគ្គ Play-Off ដើម្បីរកចាំណាត់ថ្នាក់លេខ ២ល្អ តំណាងឱ្យពូលឡើងទៅជុំបន្ត ជាលទ្ធផលក្រុមកម្ពុជា បានយកឈ្នះវៀតណាមខាងត្បូង ក្នុងលទ្ធផល ២ទល់និង០ ឡើងទៅកាន់វគ្គពាក់កណ្ដាលផ្តាច់ព្រ័ត។ ខណ:ពូល B មានម្ចាស់ផ្ទះថៃ និងម៉ាឡេស៊ី ឡើងទៅកាន់វគ្គពាក់កណ្ដាលផ្ដាច់ព្រ័ត្រ។
យ៉ាងណាក្តីចូលដល់វគ្គពាក់កណ្ដាលផ្ដាច់ព្រ័ត្រ ក្រុមកម្ពុជា បានចាញ់ក្រោមថ្វីដៃម្ចាស់ផ្ទះថៃ ក្នុងលទ្ធផល ១ទល់និង០ ខណ:កូរ៉េខាងត្បូង ឈ្នះបាល់ប៉េណាំងទីកាត់សេចក្តី៥-៤ លើកក្រុមម៉ាឡេស៊ី ឡើងវគ្គផ្ដាច់ព្រ័ត្រ។ ដូចនេះក្រុមកម្ពុជា ត្រូវជួបជាមួយម៉ាឡេស៊ី ប្រជែងយកមេដាយសំរឹទ្ធិ ហើយជាលទ្ធផលកម្ពុជា ចាញ់ក្នុងលទ្ធផល ៣ទល់និង០ បានត្រឹមចំណាត់ថ្នាក់លេខ ៤ ស្របពេល កូរ៉េខាងត្បូង ឈ្នះថៃ ក្នុងលទ្ធផល ៣ទល់និង១ នៅវគ្គផ្ដាច់ព្រ័ត្រគ្រងជើងឯកពាន់រង្វាន់ King Cup ឆ្នាំ១៩៧៤។
សម្រាប់ព្រឹត្តិការណ៍ប្រកួតពានរង្វាន់ King Cup នេះ ធ្វើឡើងចាប់ពីឆ្នាំ ១៩៦៨ គិតមកដល់ឆ្នាំ២០២២ បានចំនួន ៤៨លើករួចមកហើយ ក្រុមដែលធ្លាប់ឈ្នះមានដូចជា ម្ចាស់ផ្ទះថៃ ឈ្នះបាន១៤លើក, កូរ៉េខាងត្បូង ឈ្នះ៩លើក, ម៉ាឡេស៊ី និងស៊ុយអ៊ែត ឈ្នះម្នាក់ ៤លើក, កូរ៉េខាងជើង ឈ្នះចំនួន ៣លើក, ស្លូវ៉ាគី ឈ្នះចំនួន ២លើក ក្រៅពីនោះបានត្រឹមឈ្នះម្នាក់១លើក៕
