ក្រុមបាល់ទាត់ហ្វូតសាលជម្រើសជាតិថៃ និងក្រុមអ៊ីរ៉ង់ បានឡើងដល់វគ្គផ្ដាច់ព្រ័ត្រក្នុងពានរង្វាន់បាល់ទាត់ហ្វូតសាលកម្រិតអន្តរជាតិមួយឈ្មោះថា Continental Futsal Championship នៅរាជធានីបាងកក ដោយត្រូវប៉ះគ្នានៅវេលាម៉ោង៤:៣០នាទីរសៀលថ្ងៃទី ៣០ខែកក្កដា ឆ្នាំ២០២១ នេះ។
សម្រាប់ប្រកួតវគ្គដណ្តើមចំណាត់ថ្នាក់លេខ៧ បានទៅក្រុមលីទុយអានី ក្រោយឈ្នះលើក្រុមកូសាវូ ៣ទល់២ ខណៈប្រកួតដណ្តើមចំណាត់ថ្នាក់លេខ៥ គឺក្រុមម៉ូហ្សាំប៊ិក ប៉ះក្រុមតាហ្ស៊ីគីស្ថាន និងជំនួបដណ្តើមចំណាត់ថ្នាក់លេខ៣ ក្រុមអេហ្ស៊ីប ត្រូវជួបក្រុមអ៊ូបេគីស្ថាន។
សូមបញ្ជាក់ថាពានរង្វាន់នេះមានក្រុមចូលរួម៨ក្រុម ដោយបែងចែកជា២ពូល ក្នុងនោះ ពូល A មានម្ចាស់ផ្ទះថៃ, អ៊ូបេគីស្ថាន, កូសឺវ៉ូ និងម៉ូហ្សាំប៊ិក ហើយពូល B មានលីទុយអានី,អេហ្ស៊ីប,តាហ្ស៊ីគីស្ថាន និងអ៊ីរ៉ង់ ដោយប្រកួតពីថ្ងៃទី២៥ ដល់៣០ ខែកក្កដា ឆ្នាំ២០២១។
លទ្ធផលវគ្គពាក់កណ្ដាលផ្ដាច់ព្រ័ត្រនេះមាន៖
-អ៊ីរ៉ង់ ៧-៥ អ៊ូបេគីស្ថាន
-ថៃ ១-០ អេហ្ស៊ីប
នេះជាការត្រៀមខ្លួនរបស់ថៃ ដើម្បីចូលរួមប្រកួតក្នុងពានរង្វាន់ហ្វូតសាលជើងឯកពិភពលោក 2021 FIFA Futsal World Cup នៅប្រទេសលីទុយអានី ក្នុងទ្វីបអឺរ៉ុប ចាប់ពីថ្ងៃទី១២ ខែកញ្ញា ដល់៣ ខែតុលា ឆ្នាំ២០២១ ខាងមុខ ជាមួយក្រុមតំបន់អាស៊ី៤ទៀតមានជប៉ុន អ៊ីរ៉ង់ អ៊ូបេគីស្ថាន និងវៀតណាម៕
