សមត្ថកិច្ចបានស្រាវជ្រាវឃាត់ខ្លួនជនសង្ស័យ ១នាក់ក្រោយលួចម៉ូតូពីខេត្តបាត់ដំបងរួច រត់គេចខ្ទៅលាក់ខ្លួននៅក្នុងខេត្តបន្ទាយមានជ័យ។
មន្ត្រីការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តបាត់ដំបងបានឲ្យដឹង ថា នគរបាលព្រហ្មទណ្ឌកម្រិតស្រាល បានចុះដឹកនាំកម្លាំងក្រុមអន្តរាគមន៍បង្ការបង្ក្រាប សហការជាមួយនឹងកម្លាំងព្រហ្មទណ្ឌទទួលបន្ទុក រួមទាំងកម្លាំងអធិការដ្ឋាន នគរបាល ស្រុក មង្គលបូរីនៃស្នងការដ្ឋាននគរបាលខេត្តបន្ទាយមានជ័យបានបង្ក្រាបនិងឃាត់ខ្លួនមុខសញ្ញាលួចយកម៉ូតូ ០១ករណីរួចនាំជនសង្ស័យមកសាកសួរ។
ជនសង្ស័យមានឈ្មោះ ហៀង រ៉ាវី ភេទប្រុស អាយុ ៣៩ឆ្នាំ មុខរបរមិនពិតប្រាកដមាន ស្រុកកំណើតក្នុងភូមិអូរឫស្សី សង្កាត់ អូរឫស្សី ក្រុង ក្រចេះ ខេត្តក្រចេះ ។
ប្រភពពីសមត្ថកិច្ចបានឲ្យដឹងថា នៅថ្ងៃកើតហេតុ ថ្ងៃទី ២៨ ខែកក្កដាកន្លងទៅជនសង្ស័យ បាន ធ្វើសកម្មភាព លួច ម៉ូតូ ១ គ្រឿងជារបស់ជនរងគ្រោះឈ្មោះ លីន បូរុំ ភេទស្រី អាយុ ៥៥ ឆ្នាំ មានទីលំនៅ ភូមិកម្មករ សង្កាតស្វាយប៉ោ ក្រុងបាត់ដំបង ខេត្ត បាត់ដំបង នៅ ចំណុច ផ្ទះរបស់ ជនរងគ្រោះ ។
នៅក្នុងការបង្ក្រាបនេះសមត្ថកិច្ចដកហូតបានវត្ថុតាងម៉ូតូម៉ាកហុងដាស្កុបពី ពណ៌ស ស៊េរីឆ្នាំ ២០២០ មួយគ្រឿងជារបស់ជនរងគ្រោះដោយត្រូវប្រគល់ជូនដល់ម្ចាស់ដើមវិញ។ ចំណែក ជនសង្ស័យ មន្ត្រីការិយាល័យ ជំនាញបានកសាងសំណុំរឿងបញ្ជូនទៅសាលាដំបូង ខេត្ត បាត់ដំបងចាត់ការបន្តតាមនីតិវិធី៕
អត្ថបទ៖ដំបងក្រញូង
