អង្គការសហប្រជាជាតិបានព្រមានកាលពីថ្ងៃអាទិត្យថា «សណ្តាប់ធ្នាប់ស៊ីវិល» កំពុងចាប់ផ្តើមធ្លាក់ចុះហើយ នៅក្នុងតំបន់ហ្គាហ្សា បន្ទាប់ពីមនុស្សរាប់ពាន់នាក់បានសម្រុកចូលឃ្លាំងស្ដុកស្បៀងអាហារ នៅក្នុងទឹកដីប៉ាឡេស្ទីនដែលហែកហួរដោយសង្រ្គាម។ នេះបើយោងតាមការចេញផ្សាយដោយសារព័ត៌មាន NDTV នាថ្ងៃចន្ទ ទី៣០ ខែតុលា ឆ្នាំ២០២៣។
ទីភ្នាក់ងារផ្តល់ជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បាននិយាយថា «ស្រូវសាលី ម្សៅ និងការផ្គត់ផ្គង់ផ្សេងទៀតត្រូវបានគេលួចនៅឃ្លាំងស្ដុកអាហារជាច្រើន»។
លោក Thomas White ប្រធានទីភ្នាក់ងារ UNRWA ប្រចាំតំបន់ហ្គាហ្សា បាននិយាយថា «នេះ គឺជាសញ្ញាដ៏គួរឱ្យព្រួយបារម្ភមួយ ដែលសណ្តាប់ធ្នាប់ស៊ីវិលកំពុងចាប់ផ្តើមធ្លាក់ចុះ បន្ទាប់ពីសង្គ្រាមរយៈពេល ៣សប្តាហ៍ និងការឡោមព័ទ្ធយ៉ាងតឹងរ៉ឹង»។
ទីភ្នាក់ងារផ្តល់ជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បាននិយាយថា «មនុស្សរាប់ពាន់នាក់បានចូលទៅក្នុងឃ្លាំង និងមជ្ឈមណ្ឌលចែកចាយជំនួយមនុស្សធម៌ របស់ UNRWA ជាច្រើននៅតំបន់កណ្តាល និងភាគខាងត្បូងនៃតំបន់ហ្គាហ្សាស្ទ្រីប ដោយយកម្សៅស្រូវសាលី និងសម្ភារៈរស់រានមានជីវិតជាមូលដ្ឋានផ្សេងទៀត ដូចជាការផ្គត់ផ្គង់អនាម័យជាដើម»។
មន្ត្រីអ៊ីស្រាអែលបាននិយាយថា ជម្លោះបានចាប់ផ្តើមនៅថ្ងៃទី៧ ខែតុលា នៅពេលដែលប្រតិបត្តិការរបស់ក្រុមហាម៉ាសបានវាយលុកឆ្លងកាត់ព្រំដែនហ្គាហ្សា ហើយបានបន្តការវាយលុកក្នុងប្រទេសអ៊ីស្រាអែល ដោយបានសម្លាប់មនុស្ស ១,៤០០នាក់ និងចាប់ជំរិតមនុស្ស ២៣០នាក់ផ្សេងទៀត។
ចាប់តាំងពីពេលនោះមក អ៊ីស្រាអែលបានចាប់ផ្តើមការទម្លាក់គ្រាប់បែកដ៏ខ្លាំងក្លាដើម្បីកម្ទេចក្រុមហាម៉ាស់ នៅតំបន់ហ្គាហ្សា ដែលក្រសួងសុខាភិបាលនៅក្នុងតំបន់គ្រប់គ្រងដោយក្រុមហាម៉ាសបាននិយាយថា បានសម្លាប់មនុស្សជាង ៨,០០០នាក់នៅក្នុងទឹកដីប៉ាឡេស្ទីន ដែលពាក់កណ្តាលនៃពួកគេ គឺជាកុមារ។
អ៊ីស្រាអែលក៏បានដាក់ការបិទផ្លូវទាំងស្រុងលើការដឹកជញ្ជូនអាហារ ទឹក ថ្នាំពេទ្យ និងប្រេងឥន្ធនៈជាប្រចាំទៅកាន់តំបន់ហ្គាហ្សា ហើយក្បួនរថយន្តជំនួយមនុស្សធម៌ដំបូង មិនបានចូលក្នុងទឹកដីនេះរហូតដល់ ២សប្តាហ៍ក្រោយមក។
ចាប់តាំងពីពេលនោះមក ទីភ្នាក់ងារ UNRWA និយាយថា រថយន្តជំនួយចំនួន ៨៤គ្រឿង បានឆ្លងកាត់ចូលទៅក្នុងតំបន់ហ្គាហ្សា ប៉ុន្តែភ្នាក់ងារជំនួយនេះ និយាយថា ចំនួននេះគឺទាបណាស់។ មុនពេលមានជម្លោះ តួលេខរបស់អង្គការសហប្រជាជាតិ បានបង្ហាញជាមធ្យមរថយន្តដឹកទំនិញចំនួន ៥០០គ្រឿងក្នុងមួយថ្ងៃចូលតំបន់ហ្គាហ្សា ជារៀងរាល់ថ្ងៃ។
ស្របពេលជាមួយគ្នា លោក White បាននិយាយថា «ការផ្គត់ផ្គង់នៅលើទីផ្សារកំពុងអស់ ខណៈជំនួយមនុស្សធម៌ដែលចូលមកក្នុងតំបន់ហ្គាហ្សាស្រ្ទីប ពីប្រទេសអេហ្ស៊ីបចាប់តាំងពីថ្ងៃទី២១ ខែតុលា គឺមិនគ្រប់គ្រាន់ទេ។ ជារួមតម្រូវការរបស់សហគមន៍ គឺធំធេងណាស់ ប្រសិនបើសម្រាប់តែការរស់រានមានជីវិតជាមូលដ្ឋាន ខណៈជំនួយដែលយើងទទួលបានគឺមានចំនួនតិចតួច និងមិនមានជាប់លាប់ទេ»៕
