ប្រទេសជប៉ុននៅថ្ងៃព្រហស្បតិ៍ នេះ បានចាប់ផ្តើមបញ្ចេញទឹកកាកសំណល់ចេញពីរោងចក្រនុយក្លេអ៊ែរ Fukushima ជាលើកទី៣ ថ្វីត្បិតប្រទេសចិន និងរុស្ស៊ី ហាមឃាត់ការនាំចូលអាហារសមុទ្រពីប្រទេសនេះជាការឆ្លើយតបក៏ដោយ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃព្រហស្បតិ៍ ទី២ ខែវិច្ឆិកា ឆ្នាំ២០២៣។
ភ្នាក់ងារថាមពលអគ្គិសនីទីក្រុងតូក្យូ (TEPCO) បាននិយាយថា ខ្លួនបានចាប់ផ្តើមបញ្ចេញទឹកចំនួន ៧,៨០០តោន ដែលត្រូវបានប្រើដើម្បីធ្វើឱ្យម៉ាស៊ីនរ៉េអាក់ទ័រត្រជាក់ ហើយបានរលាយបន្ទាប់ពីរលកយក្សស៊ូណាមិ សម្លាប់មនុស្សកាលពីឆ្នាំ២០១១។ អ្នកនាំពាក្យរបស់ TEPCO បានប្រាប់ AFP ថា «ការបញ្ចេញនាពេលនេះ ត្រូវបានគេប៉ាន់ស្មានថា នឹងបញ្ចប់ក្នុងរយៈពេលប្រហែល ១៧ថ្ងៃ»។
យ៉ាងណាម៉ិញ ប្រទេសជប៉ុនអះអាងថា ទឹកដែលត្រូវបានបញ្ចេញ គឺគ្មានគ្រោះថ្នាក់ និងមានបញ្ហាជាមួយទឹកសមុទ្រទេ ទឹកនេះក៏ត្រូវបានបញ្ចេញជាធម្មតា ក្នុងរយៈពេលជាច្រើនទសវត្សរ៍មកហើយ។
ជុំវិញបញ្ហានេះ ទីភ្នាក់ងារថាមពលបរមាណូអន្តរជាតិ និងប្រទេសសេដ្ឋកិច្ចឈានមុខជាច្រើន បានគាំទ្រចំពោះចំណាត់ការរបស់ប្រទេសជប៉ុន។ ប៉ុន្តែប្រទេសចិន និងរុស្ស៊ី បានរិះគន់ការបញ្ចេញទឹកកាកសំណល់ និងហាមឃាត់ការនាំចូលអាហារសមុទ្រជប៉ុនទាំងអស់ ដោយនិយាយថា ជប៉ុនកំពុងបំពុលបរិស្ថាន។
អ្នកជំនាញមកពី IAEA និងទីភ្នាក់ងារផ្សេងទៀត រួមទាំងអ្នកមកពីប្រទេសចិន បានធ្វើការស្ទង់មតិពីផលប៉ះពាល់បរិស្ថាននៃការបញ្ចេញទឹកកាកសំណល់នេះ រួមទាំងដោយការយកគំរូទឹក និងត្រីផងដែរ។
សូមជម្រាបថា ប្រទេសជប៉ុន បានចាប់ផ្តើមបញ្ចេញទឹកកខ្វក់ពីរោងចក្រថាមពលនុយក្លេអ៊ែរ ចូលទៅក្នុងមហាសមុទ្រកាលពីខែសីហា ដោយទទួលបានការរិះគន់យ៉ាងខ្លាំងពីប្រទេសចិន និងរុស្ស៊ី ក៏ដូចជាបានដាក់បម្រាមលើការនាំចូលអាហារសមុទ្រ ឬជលផលទាំងអស់ពីប្រទេសជប៉ុន ដើម្បីជាការសងសឹក។ យ៉ាងណាម៉ិញប្រទេសរុស្ស៊ី គឺជាអ្នកផ្គត់ផ្គង់ផលិតផលសមុទ្រដ៏ធំបំផុតមួយទៅកាន់ប្រទេសចិន ហើយកំពុងស្វែងរកការបង្កើនចំណែកទីផ្សាររបស់ខ្លួន៕