អ្នកប្រដាល់សញ្ជាតិមីយ៉ាន់ម៉ា Dave Leduc បានធ្វើដំណើរដល់អាកាសយាន្តដ្ឋានអន្តរជាតិរាជធានីភ្នំពេញ ហើយនៅរាត្រីថ្ងៃពុធ ទី១ ខែវិច្ឆិកា ឆ្នាំ២០២៣ ថ្មីៗនេះ ដើម្បីត្រៀមប៉ះ ជាងកាត់សកដៃឯក ព្រំ សំណាង លើសង្វៀនគុនខ្មែរ នៅចុងសប្ដាហ៍នេះ លើសង្វៀនប្រដាល់ទូរទស្សន៍ថោន។
ក្រោយចុះពីយន្តហោះ អ្នកប្រដាល់មីយ៉ាន់ម៉ា ម្នាក់នេះ បានព្យាយាមស្រែកហៅ «ព្រំ សំណាង នៅឯណា?» នៅពីមុខអ្នកសារព័ត៌មាននិងអ្នកគាំទ្រ ជាច្រើននាក់។ យ៉ាងណាក្តីអ្នកទាំង២ នឹងត្រូវប្រកួតគ្នានៅថ្ងៃសៅរ៍ ទី៥ ខែវិច្ឆិកា ឆ្នាំ២០២៣ ស្របពេលដែលមានការឌឺដងឆ្លើយឆ្លងគ្នាជាច្រើនលើកច្រើនសារ។
សម្រាប់ជើងខ្លាំង Dave Leduc ដែលត្រូវបានគេចាត់ទុកថាជា «ស្តេចប្រដាល់» ប្រចាំនៅប្រទេសមីយ៉ាន់ម៉ា គឺជាសមាជិកក្លិប The King of Lethwei របស់ប្រទេសសមាជិកតំបន់អាស៊ានមួយនេះ នឹងត្រៀមជួបសំដែងការគួរសម ជាមួយ សម្តេច ហ៊ុន ម៉ាណែត នាយករដ្ឋមន្រ្តីកម្ពុជា មុនប៉ះ ព្រំ សំណាង។
មុនមកដល់ទឹកដីរបស់កម្ពុជា កីឡាករ Dave Leducបានបញ្ចេញសំណេរជាភាសាខ្មែរ នៅលើកទំព័រហ្វេសបុករបស់ខ្លួនកាលពីថ្ងៃទី១ វិច្ឆិកា កន្លងទៅថា៖ «ខ្ញុំពិតជាមានកិត្តិយសណាស់ និងរំភើបជាខ្លាំងចំពោះជំនួបរបស់ខ្ញុំនៅថ្ងៃស្អែកជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ខ្ញុំសប្បាយចិត្ត និងមានមោទនភាពជាខ្លាំងដែលសម្តេចចាប់អារម្មណ៍លើក្បាច់គុនបុរាណ ព្រំ សំណាង និងខ្ញុំសន្យាថានឹងបង្ហាញផ្ទាំងទស្សសនីយភាពដ៏អស្ចារ្យដល់ពិភពលោក»។
សូមបញ្ជាក់ថា ព្រំ សំណាង នឹងត្រៀមប៉ះអ្នកប្រដាល់មីយ៉ាន់ម៉ា Dave Leduc លក្ខណៈគុនខ្មែរ ដោយប្រកួតរុំអំបោះឆៅវាយតែ ១ទឹក ដោយប្រើពេលរហូតដល់ ៩នាទី នៅសង្វៀនថោន។
សម្រាប់អ្នកប្រដាល់ Dave Leducមានវ័យ ៣១ឆ្នាំ មានទម្ងន់ ៧៥គីឡូក្រាម មានកម្ពស់ ១,៨៨ម៉ែត្រ រូបគេចាប់ផ្ដើមប្រឡូកចូលអាជីពជាអ្នកប្រដាល់នៅឆ្នាំ២០១៣។ ចំណែក ឯអ្នកលេងជង្គុងពិឃាត ព្រំ សំណាង មានស្រុកកំណើតនៅខេត្តកំពង់ស្ពឺ វ័យ៣៧ឆ្នាំ មានកម្ពស់ ១.៨៤ម៉ែត្រ ទម្ងន់៧៨គីឡូ ធ្លាប់ប្រកួតចំនួន ១៥៩ដង ឈ្នះ១៤៤លើក វាយគូប្រកួតសន្លប់៧០ដង ចាញ់តែ១២លើកប៉ុណ្ណោះ និងស្មើ៣លើក។