សិល្បៈជាតិ៖ ថ្វីត្បិតបានចាកចេញពីប្រទេសកំណើតទៅរស់នៅសាងទ្រនំសុភមង្គលជាមួយភរិយាលើទឹកដីថ្មី (សហរដ្ឋអាមេរិក) ប៉ុន្តែអតីតតារាចម្រៀងប្រចាំផលិតកម្មហង្សមាសនៅតែឧស្សាហ៍ចេញចូលប្រទេសកំណើតជាញឹកញាប់ ដើម្បីបំពេញការងារក៏ដូចជាឡើងឆាកតន្ត្រីឱ្យបងប្អូនដែលគាំទ្រសំឡេងរបស់លោកបាត់នឹករលឹក។
មែនទែនទៅទោះជាចេញទៅរស់នៅស្រុកគេក៏តារារូបនេះមិនបានចោះបង់ចោលអាជីពចាស់ ដោយលោកនៅតែបន្តច្រៀង ហើយក៏ទទួលបានការគាំទ្រពីបងប្អូនខ្មែរ-អាមេរិកយ៉ាងច្រើនកុះករខ្លាំងផងដែរ។ យ៉ាងណាមិញតារាចម្រៀងរូបសង្ហាសម្ងំនៅអាមេរិកមានទាំងសុភមង្គលហើយថែមទាំងកើបលុយចំណូលពីការចេញទៅច្រៀងនិងប្រគំតន្ត្រីនៅក្នុងចំណោមសហគមន៍ខ្មែររស់នៅទីនោះផងដែរ។
យោងតាមការបង្ហោះរបស់លោកនៅលើបណ្ដាញសង្គមថ្មីៗនេះលោកបានសរសេររៀបរាប់ជាភាសាអង់គ្លេសថា៖
«ជួបគ្នាពេលក្រោយអ្នក Ohio! ខ្ញុំសូមអរគុណចំពោះបងប្អូននៅ Columbus , OH ដែលបាននាំគ្នាមកគាំទ្រខ្ញុំកាលពីយប់មិញនេះ! ស្រលាញ់ខ្លាំងណាស់! ហើយក៏សូមអរគុណជាពិសេសចំពោះបង ដែន និងបងស្រីសម្លាញ់ ស៊ុន សុភីផងដែរ៕» «See you next time Ohio! I want to thank Columbus, OH for coming to support me last night! Much love! Also, big thanks to my brother Dan and lovely sister Sophy Sun»
គួររំលឹកឡើងវិញថា លោក នៅ ស៊ីនឿន បានរៀបអាពាហ៍ពិពាហ៍ជាមួយនឹងនារីអនិកជនអាមេរិកកាលពីថ្ងៃទី២២ ខែធ្នូ ឆ្នាំ២០២១ ហើយក៏បានចាកចេញពីកម្ពុជាទៅរស់នៅសាងទ្រនំសុភមង្គលជាមួយនឹងគ្រួសាររបស់ភរិយានាសហរដ្ឋអាមេរិក៕