សិល្បៈជាតិ៖ វីដេអូឃ្លីបស៊ីឆ្កែដែលក្រុមគ្រូតឿបានផលិតត្រូវបានបញ្ជាក់ថា មិនមែនជាមាតិកាសម្រាប់ដាក់ឱ្យទស្សនានៅកម្ពុជា។ បន្ទាប់ពីក្រុមនេះ ត្រូវក្រុមអ្នកស្រឡាញ់សត្វចិត្តចិញ្ចឹមនៅកម្ពុជា តារាសម្ដែងកញ្ញា ម៉ារី ថាច់ លោកឧកញ៉ា ឌួង ឆាយ និងអ្នកលេងបណ្ដាញសង្គមជាច្រើននាក់ផ្សេងទៀតមានប្រតិកម្មយ៉ាងចំពោះសកម្មភាពដែលមិនអាចទទួលយកបាននេះ។
ក្រុមអ្នកស្រឡាញ់សត្វចិត្តចិញ្ចឹម បានលើកឡើងពីការមិនគាំទ្រចំពោះករណីមួយនេះថា ពួកគេមិនគាំទ្រជាដាច់ខាតនូវការផលិតវីឌីអូបែបនេះ ព្រោះជាការបង្ហាញពីភាពអសីលធម៌សង្គម និងទទូចសូមបញ្ឈប់សកម្មភាពទាំងនោះជាបន្ទាន់។
បន្តមកទៀត តារាសម្ដែងកញ្ញា ម៉ារី ថាច់ ក៏បានបង្ហាញពីការគាំទ្រ និងប្រឆាំងយ៉ាងដាច់អហង្ការចំពោះវីដេអូក្រុមគ្រូតឿដែរថា បេះដូងរបស់កញ្ញាស្ទើរតែខ្ទេចខ្ទាំអស់ទៅហើយ នៅពេលឃើញសកម្មភាពអស់ទាំងនោះកើយឡើង។ ហើយក្នុងនាមជាអ្នកសង្គ្រោះសត្វមួយរូបដែរ កញ្ញាបានដាក់ជាសំណួរនៅលើបណ្ដាញសង្គមថា តើប្រទេសកម្ពុជាពេលណាទើបមានច្បាប់ការពារសត្វចិញ្ចឹម? ដោយកញ្ញាអំពាវនាវឱ្យអ្នកលេងបណ្ដាញសង្គមទាំងអស់នាំគ្នាជួយ Report ហ្វេសប៊ុកផេករបស់ក្រុមគ្រូតឿចោល ដើម្បីបិទមិនឱ្យមានសកម្មភាពបន្តទៅមុខទៀត។
សម្រាប់លោកឧកញ៉ា ឌួង ឆាយ បានបង្ហោះសារនៅលើបណ្ដាញសង្គមនាពេលថ្មីៗនេះ ដើម្បីបង្ហាញពីការប្រឆាំងការបរិភោគសាច់សុនកដែរថា ៖ «ប្រឆាំងការហូបសាច់ឆ្កែ និងសាច់ឆ្មា។ ទោះបីច្បាប់មិនមានចែងក៏គួរតែមានធម៌ក្នុងខ្លួនដែរ»។
រីឯអ្នកលេងបណ្ដាញសង្គមមួយចំនួនទៀតក៏បានលើកឡើងដែរថា ក្រសួងដែលពាក់ព័ន្ធគួរតែហៅក្រុមនេះទៅទូន្មាន ព្រោះទង្វើអសីលធម៌របស់ពួកគាត់កំពុងតែប៉ះពាល់ដល់សង្គម ជាពិសេសយកសត្វឆ្កែមកធ្វើជាម្ហូបរួចបង្ហាញជាសាធារណៈបែបនេះ គឺធ្វើឱ្យប៉ះពាល់ដល់អារម្មណ៍អ្នកស្រលាញ់សត្វឆ្កែ។
ក្រោយមានការប្រតិកម្មចំពោះវីដេអូស៊ីសាច់ឆ្កែដែលផលិតដោយក្រុមគ្រូតឿយ៉ាងព្រោងព្រាតពេញបណ្ដាញសង្គមហើយនោះ ក្រុមមួយនេះក៏បានចេញវីដេអូធ្វើការបកស្រាយទៅកាន់មហាជនបានឱ្យពិចារណាអំពីការពិតនៃការផលិតមាតិកាមួយនេះ ដែលមិនមែនដាក់សម្រាប់ឱ្យកម្ពុជាទស្សនានោះទេ។
ក្រុមគ្រូតឿ បានបំភ្លឺថា ក្រុមរបស់ខ្លួនទទួលស្គាល់បានផលិតវីដេអូស៊ីសាច់ឆ្កែដើម្បីរកចំណូលតាមអនឡាញពីបណ្ដាញសង្គមនានា។ ក៏ប៉ុន្តែសម្រាប់វីដេអូនេះ គឺពួកគេផលិតមកដើម្បីដាក់ឱ្យទស្សនានៅក្រៅប្រទេសប៉ុណ្ណោះ ដោយបានបិទប្រទេសកម្ពុជាមិនឱ្យទស្សនាឡើយ។ ពួកគេអះអាងថា មានជនខិលខូចបានព្យាយាមយកវីដេអូរបស់ក្រុមខ្លួន ទៅបង្ហោះនៅលើ TikTok ដែលមានអ្នកតាមដានសុទ្ធតែជាជនជាតិខ្មែរជាច្រើននាក់ ក្នុងចេតនាកាច់កុងជាមួយក្រុមខ្លួន។
ក្រុមគ្រូតឿ និយាយបន្តទៀតថា ការផលិតវីដេអូមាតិកាល្អសម្រាប់ក្នុងស្រុក មិនសូវមានអ្នកចូលចិត្តទស្សនាឡើយ ខណៈដែលក្រុមខ្លួនបានចំណាយប្រាក់រាប់ពាន់ដុល្លារក្នុងការផលិតរាល់វីដេអូនីមួយៗ ហើយទទួកបានចំណូលមកវិញតែខ្ទង់រយដុល្លារប៉ុណ្ណោះ។ ដូច្នោះហើយទើបបានជាក្រុមរបស់ពួកគេ សម្រេចត្រូវផលិតមាតិកាបែបនេះ ដើម្បីដាក់ឱ្យបរទេសមើល ព្រោះបរទេសភាគច្រើនគេចូលចិត្តទស្សនាវីដេអូបែបនេះ។
យ៉ាងណាមិញ ក្រុមគ្រូតឿ បានសុំការអធ្យាស្រ័យពីមហាជន ព្រោះពួកគេមិនមានចេតនាណាមួយផលិតវីដេអូនេះដើម្បីបញ្ចេញនៅក្នុងស្រុកឱ្យមានការរើសអើងនោះទេ ប៉ុន្តែដោយសារមានអ្នកគាំទ្រការសម្ដែងរបស់ពួកគេមួយចំនួនខ្លះទៀត គឺតាមដានខ្លាំងពេក រហូតយកវីដេអូខ្លះមកបង្ហោះជាសាធារណៈដូចបញ្ហាដែលបានកើតឡើងនេះ។
គួររំលឹកដែរថា ក្រុមគ្រូតឿ ធ្លាប់ត្រូវបានសមត្ថកិច្ចមូលដ្ឋាន ហៅទៅអប់រំណែនាំម្ដងរួចមកហើយកាលពីក្រុមពួកលោកផលិតវីដេអូបរិភោគលាមកសត្វគោ ហើយទទួលរងនូវការរិះគន់យ៉ាងខ្លាំងពីអ្នកលេងបណ្ដាញសង្គមហ្វេសប៊ុក។ ភ្ជាប់ជាមួយករណីវីដេអូស៊ីសាច់ឆ្កែនេះគេអាចចាត់ទុកថា គឺជាលើកទី ២ ហើយដែលមហាជនបទទូចសុំឱ្យក្រសួង និងស្ថាប័នពាក់ព័ន្ធ មានវិធានបន្ទាន់ចំពោះក្រុមគ្រូតឿ។
សូមជម្រាបថាដែរ ការបរិភោគសាច់សត្វសុនក ត្រូវបានគេមើលឃើញថា ជាការបង្ហាញសញ្ញានៃការធ្លាក់ចុះនូវតម្លៃមនុស្សធម៌ គុណធម៌ ព្រមទាំងធ្វើឱ្យមានការឆ្លងរាលដាលជំងឺឆ្កែឆ្កួត និងជំងឺផ្សេងៗជាច្រើនទៀតពីតំបន់ ១ ទៅតំបន់ ១ ដែលប៉ះពាល់ដល់សុខភាពសាធារណៈផងដែរ៕