សិល្បៈជាតិ៖ ដំណឹងចុងក្រោយដែលសារព័ត៌មានត្រយងទទួលបាននាពេលថ្មីៗនេះបានឱ្យដឹងថា លោកតា គង់ ណៃ វិរៈសិល្បករមរតកមនុស្សរស់ផ្នែកចាប៉ីដងវែង ពេលនេះធ្លាក់ខ្លួនឈឺធ្ងន់ សុខភាពនៅតែខ្សោយ និងមានអាការៈវង្វេងស្មារតី។
លោក គង់ សម័យ ត្រូវជាកូនប្រុសរបស់ព្រឹទ្ធាចារ្យ គង់ ណៃ បានប្រាប់អ្នកសារព័ត៌មានក្នុងស្រុកថា ឪពុករបស់លោក បានធូរស្រាយបន្តិច ក្រោយពីបានព្យួរសេរ៉ូមនៅផ្ទះ។ លោកបន្តថា យ៉ាងណាក៏ដោយ ក្រុមគ្រួសាររបស់លោកក៏ចង់បញ្ជូនព្រឹទ្ធាចារ្យទៅពេទ្យដែរ ប៉ុន្តែដោយសារខ្វះខាតថវិកា ទើបបានជាសម្រេចចិត្ត ព្យាបាលព្រឹទ្ធារ្យនៅផ្ទះ។
កូនប្រុសព្រឹទ្ធាចារ្យគង់ណៃបានបន្ថែមថា ស្មារតីរបស់ឪពុកលោក ចាប់ផ្ដើមវង្វេងតាំងពីប្រមាណ១ឆ្នាំមុនម្ល៉េះ លោកតាអត់សូវចាំអ្វីទេ សូម្បីតែឈ្មោះកូនៗលោកតា ទាល់តែរំលឹកច្រើន ទើបលោកតាចាំមកវិញខ្លះ។
បច្ចុប្បន្នព្រឹទ្ធាចារ្យកោសល្យវោហារ គង់ ណៃ មានជន្មាយុ៧៨ឆ្នាំ។ លោករស់នៅស្រុកកំណើត ក្នុងភូមិដូង ឃុំស្វាយទង ស្រុកកំពង់ត្រាច ខេត្តកំពត។ លោកមានកូន១០នាក់ស្រី៤ ហើយក្នុងចំណោមកូនទាំងអស់ មានតែកូនប្រុសម្នាក់ប៉ុណ្ណោះ ដែលបន្តកេរចាប៉ីពីលោក។ កាលពីឆ្នាំ២០១៧ ព្រឹទ្ធាចារ្យ បានទទួលពានរង្វាន់មួយ ពីប្រទេសជប៉ុន ដែលមានឈ្មោះថា ពានរង្វាន់សិល្បៈវប្បធម៌ហ្វុគុអូកា Fukuoka Prize ។
សូមរំលឹកថា ព្រឹទ្ធាចារ្យ គង់ ណៃ ធ្លាប់បានធ្លាក់ខ្លួនឈឺ តាំងពីឆ្នាំ២០១៩មកម្ល៉េះ ដោយសារជំងឺសួត ឈាមស និងជំងឺរបេង។ លោកគឺជាអ្នកសិល្បៈករដ៏អស្ចារ្យម្នាក់ក្នុងចំណោមសិល្បៈករខ្មែរមួយចំនួនដែលបានរស់រានមានជីវិតពីសម័យសង្គ្រាមខ្មែរក្រហម។ ហើយកិត្តិនាមរបស់លោកតាត្រូវបាន ល្បីល្បាញ ទូទាំងពិភពលោក និងបានស្គាល់លោកតាតាមរយៈបទ Time to Rise របស់តារាចម្រៀង រេប វណ្ណដា ដែរមានអ្នកចូលមើល ១១៧ លាននាក់៕