សិល្បៈជាតិ៖ កញ្ញា កុយ អេនណា Miss Grand Cambodia 2023 លំដាប់រងទី ១ បានគ្រងឈុតរបាំបុរាណខ្មែរយ៉ាងស្រស់ស្អាតគួរឱ្យគយគន់ ដើម្បីអបអរ របាំព្រះរាជទ្រព្យ ចូលជាសម្បត្តិបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។
កញ្ញា កុយ អេនណា បានបង្ហោះសារយ៉ាងដូច្នេះ ៖ «អបអរសាទរខួបគម្រប់ ២០ ឆ្នាំនៃ របាំព្រះរាជទ្រព្យ ត្រូវបានចុះក្នុងបញ្ជីជាសម្បត្តិបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ នៅទីក្រុងអ៊ីស្តង់ប៊ុល ប្រទេសតួកគី ៧ វិច្ឆិកា ២០០៣ – ៧ វិច្ឆិកា ២០២។ របាំព្រះរាជទ្រព្យ ជាសម្បត្តិបេតិកភណ្ឌដ៏មានតម្លៃមិនអាចកាត់ថ្លៃបាន របស់ព្រះរាជាណាចក្រកម្ពុជាតែមួយគត់ ដែលបានថែរក្សានាដកម្មបុរាណមួយនេះ អស់រយៈពេលដ៏យូរលង់ណាស់មកហើយ។ នាងខ្ញុំមានមោទកភាពខ្លាំងបំផុតដែលបានសម្តែងជាតួអង្គនាដការីនៅក្នុងល្ខោនព្រះរាជទ្រព្យខ្មែរ បង្ហាញពីប្រវត្តិដ៏យូរលុងនៃការសម្តែងអំឡុង ១០០ ឆ្នាំមុនដ៏គួរឱ្យស្ញប់ស្ញែង។ កិច្ចការពារ បេតិកភណ្ឌវប្បធម៌ជាភារកិច្ចកូនខ្មែរគ្រប់រូប»
យ៉ាងណាមិញ លោក ប្រាក់ សំណាង បានប្រាប់មកអ្នកសារព័ត៌មានត្រយងថា វត្ថុបំណងធំៗសំខាន់ៗដែលលោកបាននាំកញ្ញា កុយ អេនណា ឱ្យគ្រងឈុតរបាំបុរាណខ្មែរផ្សព្វផ្សាយទៅកាន់មហាជននៅក្នុងថ្ងៃនេះ គឺ កញ្ញា អេនណា ចង់បំពេញកាត្វកិច្ចជាកូនខ្មែរ ដែលមានន័យថា ការផ្សព្វផ្សាយ ការអភិរក្ស ការលើកតម្កើង នូវវប្បធម៌ជាតិ ជាពិសេសគឺសម្បត្តិបេតិកភណ្ឌជាតិទាំងអស់ គឺកើតចេញពីយើងម្នាក់ៗ ហើយសំខាន់បំផុតទៀតនោះ យើងមានលទ្ធភាពនិងសមត្ថភាពដែលអាចធ្វើទៅបាន។ ជាក់ស្ដែងដូចកញ្ញា កុយ អេនណា គឺកញ្ញាស្រឡាញ់ការគ្រងឈុតរបាំបុរាណខ្មែរជាយូរណាស់មកហើយ នឹងឆ្លៀតក្នុងឱកាសនេះ គឺកញ្ញាធ្វើឡើងដើម្បីបង្ហាញមហាជនតែម្ដង។
លោក ប្រាក់ សំណាង បន្តថា កញ្ញា កុយ អេនណា គឺមានហ្វេនទាំងជាតិ និងអន្តរជាតិជាអ្នកតាមដានច្រើននាក់នៅលើបណ្ដាញសង្គមនានា ដូច្នោះហើយការគ្រងឈុតរបាំបុរាណខ្មែរនេះ គឺបានសាយភាយដល់ហ្វេនទូទាំងពិភពលោកបានឃើញវប្បធម៌ខ្មែរដ៏មានវ័យចំណាស់។
លោកបន្តថា ចំណែកឯការជ្រើសយកគំនិតគ្រងឈុតល្ខោនព្រះរាជទ្រព្យខ្មែរដែលមានលាបខ្លួនសបែបនេះ ក៏ព្រោះតែចង់បង្ហាញពីអាយុកាលនៃរបាំព្រះរាជទ្រព្យក្នុងទម្រង់របាំ១០០ ឆ្នាំមុនដែលសម្ដេចព្រះរាជបុត្រីព្រះរៀម នរោត្តម បុប្ផាទេវី ធ្លាប់លើកមកសម្ដែងជូនកាលកន្លង។ ក្រៅពីនោះ កញ្ញា អេនណា ក៏ទទួលបានការបង្ហាត់បង្ហាញពីនាដការីរបាំបុរាណក្នុងការប្រើប្រាស់ក្បាច់របាំដែលត្រូវតាមទម្រង់ដើមផងដែរ។
គួរដឹងថា ការបំផុសគំនិតនេះ ត្រូវបានផ្ដួចផ្ដើមឡើងដោយលោក ប្រាក់ សំណាង គ្រូជំនាញ soft skills និងមានការពិភ្សាប្រឹក្សាយោបល់ជាមួយលោកជំទាវសាស្ត្រាចារ្យ ឱម យុវណ្ឌី ដើម្បីជំរុញការផ្សព្វផ្សាយពីវប្បធម៌ជាតិឱ្យកាន់តែសុសសាយបន្ថែមទៀត៕
