គ្រូបង្ហាត់គុនខ្មែរម្នាក់កំពុងរស់នៅក្នុងប្រទេសបារាំង លោក ធីម សៀងហៃ បានបង្ហាញការសាទរចំពោះ ការរៀបចំព្រឹត្តិការណ៍កីឡាប្រដាល់គុនខ្មែរ ដែលជាជំនួបគូពិសេសរវាងអ្នកលេងគុនខ្មែរ ព្រុំ សំណាង និងកីឡាករប្រដាល់មីយ៉ាន់ម៉ា ដេវ លីឌុច (DAVE LEDUC) កាលបីរាត្រីថ្ងៃទី៥ វិច្ឆិកា ឆ្នាំ២០២៣។
លោក ធីម សៀងហៃ បានបង្ហាញការចាប់អារម្មណ៍នៅលើកទំព័រហ្វេសបុកថា៖«ខ្ញុំពិតជាសប្បាយចិត្តជំនួសម្ចាស់ក្រុមហ៊ុនផ្ទាល់ និងប្រជាជនខ្មែរទាំងមូលខ្លាំងណាស់ ដែលខ្ញុំមានរូបភាពល្អៗរបស់ថោន យកទៅបង្ហាញដល់កូនសិស្សបារាំង និងអ្នកលេងកីឡាប្រដាល់នៅក្នុងប្រទេសបារាំងទាំងមូលឲ្យគេបានឃើញពីភាពអស្ចារ្យរបស់ខ្មែរ!»។
គ្រូប្រដាល់រូបនេះ បានបន្ថែមថា៖ «ហើយមួយវិញទៀតជនជាតិបារាំង គេបើកមាត់ឡើងធំៗ គ្រាន់តែឃើញចំនួនអ្នកដែលចូលមើលឡាយកាលពីម្សិលមិញ774.6k(fb) ពីសង្វៀនគុនខ្មែរ ខ្ញុំពិតជារំភើប និងអរគុណដល់លោកពូ ថមមី លោកអ៊ុំ វ៉ា សុធារិទ្ធ និងចុងក្រោយ អរគុណដល់លោកអ៊ុំ លាង ម៉េង ដែលគាត់បានខិតខំចំណាយថវិការ ក៏ដូចជាពេលវេលា និងក្ដីស្រលាញ់ទាំងមូលដល់ប្រជាជនខ្មែរ ដើម្បីវិស្ស័យកីឡាប្រដាល់គុនខ្មែរ និងជាតិខ្មែរទាំងមូល ដើម្បីផ្សព្វផ្សាយនៅអ្វីដែលខ្មែរមាន»។
មានស្រុកកំណើតនៅខេត្តកោះកុង លោក ធីម សៀងហៃ គឺជាកូនខ្មែរសុទ្ធសាធដែលស្រលាញ់ការហាត់ប្រដាល គុនខ្មែរ តាំងពីតូចៗមក ដោយមានឈាមឪពុក និងពូជាអ្នកប្រដាល់ ស្រាប់ក៏បានជម្រុញឲ្យលោកកាន់តែមានដុងក្នុងវិស័យប្រដាល់គុនខ្មែរ។ កាលនៅតូចលោកធ្លាប់បានចូលរួមប្រកួតជាច្រើនទាំងនៅតាមវត្ត រហូតដល់ថ្នាក់ជាតិ និងអន្តរជាតិ។
លោក សៀងហៃ ធ្លាប់ចូលរួមប្រកួតជ្រើសរើសជើងឯកនៅកម្ពុជាជាប់ចំណាត់ថ្នាក់លេខ២ និងធ្លាប់ទទួលបានចំណាត់ថ្នាក់ជើងឯកអរន្តជាតិនៅចិន ចំណាត់ថ្នាក់លេខ៣ នៅដើមឆ្នាំ២០២២ លោកទទួលបាននៅចំណាត់ថ្នាក់លេខ១ ក្នុងការប្រកួតដណ្ដើមខ្សែរក្រវ៉ាត់របស់ស្ថាប័ន AFMT ដែលជ្រើសជើងឯកប្រចាំប្រទេសបារាំង។
ក្នុងអាជីពជាគ្រូបង្វឹកក្បាច់គុនប្រដាល់ លោកបានចាប់ផ្ដើមដំបូងនៅឆ្នាំ២០១៦ ដោយបង្ហាត់តិចតួចជាម៉ោងឯកជនដោយធ្វើការទាតក់ទង់ជាមួយជនបរទេស ដោយខ្លួនឯងនៅភ្នំពេញ បន្ទាប់មកក្នុងឆ្នាំ២០១៩ លោកក៏មានឱកាសបានឈានជើងមកធ្វើជាគ្រូបង្វឹកនៅប្រទេសបារាំងផ្ទាល់ តាមរយ:ម្ចាស់ក្លិបសមាគមគុនខ្មែរ នៅប្រទេសបារាំង។
បច្ចុប្បន្នលោកកំពុងបម្រើសការនៅក្នុងក្លិបសមាគមគុនខ្មែរ នៅក្នុងទីក្រុង បុកដូ ដែលជាកម្មសិទ្ធរបស់កូនខ្មែរកាត់បារាំងមួយរូបដែលជាអ្នកស្រលាញ់ និងចង់ផ្សព្វផ្សាយគុនខ្មែរនៅបរទេស និងកំពុងមានការគាំទ្រយ៉ាងខ្លាំងសម្រាប់បរទេសដែលមកហ្វឹកហាត់ជាមួយលោកផ្ទាល់ ដោយជាគ្រូគុនខ្មែរ៕
