បទចម្រៀងមរតកដើម «ស្រណោះអូរជ្រៅ» សំនៀងដើមរបស់លោក ស៊ិន ស៊ីសាមុត និងអ្នកស្រី រស់ សេរីសុទ្ធា ត្រូវបានតារាចម្រៀងឯនាយសមុទ្រលោក Jay Chan និងដៃគូកញ្ញា Thaory (ថាវរី) លើកយកមកបកស្រាយឡើងវិញ (Cover) និងបង្ហោះចែកចាយលើគេហទំព័ររបស់លោក Jay Chan កំពុងតែទាក់ទាញការចាប់អារម្មណ៍ខ្លាំងពីសំណាក់អ្នកស្ដាប់និងអ្នកទស្សនា។
«ស្រណោះអូរជ្រៅ» បទចម្រៀងដែលផលិតឡើងយ៉ាងសម្រិតសម្រាំងជាថ្មី ដោយមានបង្កប់នូវរសជាតិខ្មែរ មានការតុបតែងម៉ូដសក់និងសំលៀកបំពាក់ប្រពៃណី ស័ក្តិសម ជាបុរសខ្មែរ និងនារីខ្មែរយ៉ាងស្រស់សង្ហានិងស្រស់សោភា របស់តារាចម្រៀងលោក Jay Chan ដែលបច្ចុប្បន្នកំពុងរស់នៅឯសហរដ្ឋអាមេរិក និង តារាចម្រៀង កញ្ញា ថាវរី ដែលជាតារាចម្រៀងមកខេត្ត ត្រាវិញ ទឹកដីកម្ពុជាក្រោម ទើបនឹងបញ្ចេញហើយផ្សព្វផ្សាយឱ្យអ្នកគាំទ្របានទស្សនា នៅថ្ងៃទី១ ខែសីហា ឆ្នាំ២០២១ នេះ តាមរយៈហ្វេសប៊ុក និង YouTube របស់លោក Jay Chan មានការគាំទ្រយ៉ាងខ្លាំងពីសំណាក់មហាជន ដោយទទួលបានការ ខមមិនសរសើរយ៉ាងច្រើនលើសលប់ព្រោះគិតត្រឹមម៉ោង៥ ល្ងាចថ្ងៃទី១ ខែសីហា ឆ្នាំ២០២១ នេះមានចំនួន Share ចំនួន ២៦៥ ចំនួន Comment មាន ៩៥ និង ចំនួន Like រហូតដល់ ១.៣K ហើយ។
គួរដឹងថាបទចម្រៀង «ស្រណោះអូរជ្រៅ» គឺជាបទចម្រៀងរបស់ផលិតកម្ម G.O.A.T Entertainment ដែលមានលោក Jay Chan គឺជាម្ចាស់ផលិតកម្ម ខណៈកញ្ញា ថាវរី គឺជាតារាចម្រៀងទើបតែចុះកុងត្រា ជាមួយនឹងផលិតកម្មមួយនេះកាលពីថ្ងៃទី១៧ ខែកក្កដា ឆ្នាំ២០២១នេះ ហើយនៅថ្ងៃទី១ ខែសីហា ឆ្នាំ២០២១ កញ្ញាបានចេញបទចម្រៀងដំបូងជាមួយនឹងលោក Jay Chan នូវបទមរតកដើមខាងលើ ហើយទទួលបានការគាំទ្រយ៉ាងច្រើនពីសំណាក់អ្នកគាំទ្រ (ហ្វេន)៕
ទស្សនាបទចម្រៀង «ស្រណោះអូរជ្រៅ» ច្រៀងឡើងវិញដោយលោក Jay Chan និងកញ្ញា Thaory ខាងក្រោម៖