កីឡាការនី ស្រួង ភាវី ទទួលពានរង្វាន់ Asia Special Award 2023 ដែលរៀបចំដោយ Asia Model Festival នៅប្រទេសកូរ៉េខាងត្បូង កាលពីថ្ងៃទី៥ ខែវិច្ឆិកា ឆ្នាំ២០២៣។
ក្រោយឈ្នះពានរង្វាន់លើកនេះ កីឡាការនី ស្រួង ភាវី បានលើកឡើងថា៖ «ពុកម៉ែបងប្អូនជាទីគោរព សម្រាប់រូបនាងខ្ញុំផ្ទាល់ រាល់ពេលទទួលបានពានរង្វាន់នៅឆាកអន្តរជាតិកន្លងមក នៅពេលគេហៅឈ្មោះ ស្រួង ភាវី ឡើងទៅលើវេទិកាដើម្បីទទួលពានរង្វាន់ អារម្មណ៍នាងខ្ញុំគ្រាន់តែឮ ត្រឹមតែដឹងថាគេបានហៅខ្ញុំហើយ»។
ស្រួង ភាវីបន្តថា៖ «ប៉ុន្ដែនៅពេលឮគេហៅថា Cambodia Cambodiaឡើងទៅលើវេទិកា អារម្មណ៍របស់ខ្ញុំពិតជារំភើបប្រកបដោយសេចក្ដីសោមនស្សរីករាយ និងមោទនភាពជាពន់ពេក ។ ព្រោះថាស្រួង ភាវី មកពីប្រទេសកម្ពុជាសូមអញ្ជើញឡើងមកលើវេទិកា គឺក្នុងចិត្តខ្ញុំគិតថាគេកំពុងតែហៅប្រជាជនកម្ពុជាទាំងអស់ឡើងទៅលើវេទិកាដើម្បីទទួលនូវកិត្តិយសដ៏ថ្លៃថ្លាឧត្តុងឧត្តមនៅឆាកអន្តរជាតិ»។
ម្ចាស់មេដាយមាសស៊ីហ្គេម បានបបន្ថែមថា៖ «ពុកម៉ែបងប្អូន កូនស្រីកម្ពុជាម្នាក់នេះ បានឧទ្ទិសរួចហើយ រាល់សមិទ្ធផលទាំងប៉ុន្មានដែលនាងខ្ញុំសម្រេចបាន គឺខ្ញុំបានដាក់ជារបស់រួមសម្រាប់ប្រជាជនខ្មែរទាំងអស់ និងប្រទេសជាតិទាំងមូល។ ខ្ញុំសង្ឃឹមថារាល់ភាពជោគជ័យដែលកូនខ្មែរទទូលបាន សូមគាំទ្រ ស្រលាញ់ ផ្ដល់តម្លៃ ផ្ដល់កម្លាំងចិត្ត និងលេីកស្ទួយដល់ពួកគាត់ ដែលបាន និងកំពុងខិតខំប្រឹងប្រែងខ្លាំងណាស់ ទម្រាំទទូលបានជោគជ័យដ៏ត្រចះត្រចង់នៅលើឆាកអន្តរជាតិនានា»។
ជាចុងបញ្ចប់ នាងខ្ញុំសូមឱ្យប្រជាជនខ្មែរទាំងអស់ចេះស្រឡាញ់គ្នា សាមគ្គីគ្នា មានមេត្តា ករុណាដល់គ្នានិងគ្នា ក្នុងនាមជាឈាមជ័រតែមួយ។ សូមគោរពជូនពរពុកម៉ែបងប្អូនជួបប្រទះតែសេចក្ដីសុខគ្រប់ប្រការ។ សូមអរគុណ !
គួរដឹងថា កីឡាការិនី ស្រួង ភាវី កើតនៅថ្ងៃទី១២ ខែកញ្ញា ឆ្នាំ១៩៩០ បានចាកចេញពីប្រទេសកម្ពុជា ទៅរស់នៅប្រទេសកូរ៉េខាងត្បូង តាំងពីអាយុ ២០ឆ្នាំ ដើម្បីរៀបការជាមួយស្វាមីដែលជាជនជាតិកូរ៉េ។ ភាវី បានចំណាយពេលរយៈពេល ៧ឆ្នាំ ដើម្បីវិវឌ្ឍខ្លួនឲ្យក្លាយជាកំពូលកីឡាការិនីស្នូកឃ័រ។
គួរបញ្ជាក់ថា កីឡាការិនីឆ្នើម ស្រួង ភាវី បានចូលរួមប្រកួតក្នុងព្រឹត្តិការណ៍កីឡាស៊ីហ្គេមលើកទី៣២ នៅកម្ពុជា និងបានឈ្នះមេដាយមាសលើវិញ្ញាសាប៊ីយ៉ាការ៉ុប៣បាំង និងបានមេដាយសំរឹទ្ធលើវិញ្ញាសាការ៉ុម១បាំង៕
