ប៉ុន្មានថ្ងៃកន្លងមកនេះបងប្អូនខ្មែរមួយចំនួនធំបានបញ្ចេញប្រតិកម្មក្ដៅក្រហាយ ដោយសារតែមានគណនីមួយបង្កើតឡើងដោយក្រុមការងារនារីវៀតណាមម្នាក់បានប្រើប្រាស់រូបភាពឃោសនាបំភ្លៃបំភ័ន្តការពិតស្ដីពីប្រាសាទអង្គរវត្តនៅខេត្តសៀមរាប។ ប៉ុន្តែតិកតុកនោះ ត្រូវបានក្រុមហ៊ុនផ្សព្វផ្សាយមាតិការវីដេអូដ៏ធំ Tiktok លុបចោល ដោយសារតែគណនីនេះបានអនុវត្តខុសគោលការណ៍របស់ក្រុមហ៊ុន និងមានការ ចូលរួម Report ពីសំណាក់បងប្អូនពលរដ្ឋខ្មែរ។
បងប្អូនមួយចំនួនធំបានដឹងហើយថា គណនីតិកតុកស្ត្រីវៀតណាមខាងលើបានបង្កឱ្យបងប្អូនខ្មែរផ្ទុះកំហឹងយ៉ាងខ្លាំង ព្រោះតែស្ត្រីរូបនេះបានស្លៀកសំលៀកបំពាក់បុរាណ ចងក្បិនមកថតនៅក្នុងបរិវេណប្រាសាទអង្គរវត្តហើយយកទៅកាត់តវីដេអូដោយដាក់រូបទង់ជាតិថៃ ក៏ដូចជាសន្លឹកយ័ន្ត និងរូបព្រះឆាយាល័ក្ខស្តេចថៃ រាមាទី៩ និង១០ ។ អ្នកវិភាគជាច្រើនយល់ស្របដូចគ្នាថា វីដេអូនេះមានចេតនាញុះញង់ បញ្ឆេះកំហឹងបង្កឱ្យទំនាក់ទំនងរវាងកម្ពុជានឹងប្រទេសជិតខាងកម្ពុជា មានការរើសអើងនិងប្រេះឆាចំណងមិត្តភាពថែមទៀតផង។
យ៉ាងណាមិញក្រោយគណនីក្រុមរបស់ស្ត្រីវៀតណាមដែលមានចំនួន follower រហូតដល់ទៅជាង 700K និងចំនួន Like 19.8M នេះត្រូវបានលុបចេញបាត់ ពួកគេបានបង្ហោះសារត្អូញត្អែរគួរឱ្យកំសត់ ព្រមទាំងភ្ជាប់ជាមួយនឹងរូបថតគណនីដែលត្រូវបាន TikTok ផ្អាកដំណើរការថា៖ យប់នេះជាយប់មួយដែលសែនវែងឆ្ងាយ សេដណាស់។
ជាការកត់សម្គាល់ក្រោយពីការបង្ហោះខាងលើ មិនត្រឹមតែមិនទទួលបានការយល់ចិត្តនិងអាណិតអាសូរ ស្រាប់តែបងប្អូនអ្នកលេងបណ្ដាញសង្គម ពិសេសអ្នកដែលមិនពេញចិត្តចំពោះក្រុមនាង ដែលរួមមានទាំងបងប្អូនខ្មែរកម្ពុជាក្រោម បងប្អូនខ្មែរ និងជនជាតិវៀតណាមខ្លះទៀត បានបញ្ចេញមតិឆ្លើយតបនឹងសាររបស់នាងថា «សូមអបអរសាទរផងណាប្អូនស្រី សូមឱ្យលុបបាត់ទៅ។ សាងអីបានអូននឹងអូនហ្វឿង។ ដោយសារតែប្អូនស្រីម្នាក់ធ្វើឱ្យបងប្អូនយើងមើលមុខគ្នាមិនចំ សមមុខហើយ។ គេគ្រប់គ្នាស្រលាញ់ទឹកដីកម្ពុជា ហេតុអ្វីនាងធ្វើបែបហ្នឹង តើបានអីមកវិញ? បានតែគេស្អប់»
ករណីក្រុមការងារនារីវៀតណាមនេះ មិនត្រឹមតែបងប្អូនខ្មែរយើងនោះឡើយ ដែលផ្ទុះកំហឹងឆេះដុំចំពោះពួកនាង សូម្បីតែបងប្អូនជនជាតិវៀតណាម ក៏បង្ហាញពីការមិនពេញចិត្តចំពោះទង្វើ និងសកម្មភាព ដែលមានចរិតញុះញង់បង្កឱ្យមិត្តភាពទ្វេរភាគី រវាងប្រជាជនកម្ពុជា និងវៀតណាម អាចកើតការស្អប់ខ្ពើមរើសអើងជាតិសាសន៍ និង មានទំនាស់នឹងគ្នា ខណៈដែលប្រជាជន និងរដ្ឋាភិបាលប្រទេសទាំងពីរ មានទំនាក់ទំនងល្អជាមួយគ្នាជាយូរអង្វែងណាស់មកហើយ៕
