អ្នកស្រី ម៉ៅ សំណាង ម្ចាស់ស្នាដៃប្រលោមលោកជាច្រើន ដែលអ្នកគាំទ្រនិយមហៅថា «អ្នកនិពន្ធទន្សាយ» បានចេញមកសម្ដែងក្ដីរំភើបព្រោះតែស្នាដៃចុងក្រោយរបស់អ្នកស្រីទទួលបានការគាំទ្រខ្លាំងលើសពីស្នាដៃនានាកន្លងមក មិនគួរឱ្យជឿ។
តាមរយៈការរៀបរាប់របស់អ្នកស្រី ម៉ៅ សំណាង កាលពីថ្ងៃទី១ ខែសីហា ឆ្នាំ២០២១ កន្លងទៅអ្នកស្រីបានរៀបរាប់ពីជម្រៅដួងចិត្តរបស់អ្នកស្រី យ៉ាងដូច្នេះ ថា ៖
«ខ្ញុំមិននឹកស្មានថាស្នាដៃថ្មី នភាល័យដែលខ្ញុំកំពុងកាន់នេះត្រូវបានទទួលការគាំទ្រពីប្រិយមិត្តច្រើនបែបនេះទេ គឺហួសពីការរំពឹងទុករបស់ខ្ញុំ ដោយស្នាដៃនេះទទួលបានការកក់ទុកច្រើនលើសពីស្នាដៃមុនៗដែលខ្ញុំបានចេញផ្សាយទៅទៀត។ ខ្ញុំពិតជាមានក្តីរំភើបនិងរីករាយខ្លាំងណាស់ ដែលទទួលបានការគាំទ្រពីប្រិយមិត្តគ្រប់ទិសទី ហើយនេះគឺជាកម្លាំងជំរុញចិត្តខ្ញុំដើម្បីអាចបន្តសរសេរស្នាដៃថ្មីៗទៀត ទោះបីខ្ញុំសរសេរយឺតពេលខ្លះ មួយថ្ងៃបានត្រឹមមួយសន្លឹកក៏ដោយ។»
តាមរយៈសំណេររបស់អ្នកនិពន្ធជើងចាស់រូបនេះបានបង្ហាញឱ្យឃើញថា ថ្វីត្បិតតែអ្នកស្រីមានវ័យចំណាស់ក៏ពិតមែន តែស្នាដៃនិពន្ធរបស់អ្នកស្រីនៅតែទទួលបានការគាំទ្រខ្លាំងពីសំណាក់មិត្តអ្នកអាន។ ស្នាដៃនិពន្ធរបស់អ្នកស្រីដែលចេញថ្មីៗ ក្រោយពីបាត់មុខមួយរយៈរួមមាន៖ ប្រលោមចិត្ត ភាគ ១ និង ភាគ២, សែងសុរិយា, ស្លាបមយូរី, ទន្សាយជានរណា? នភាល័យ និងមានស្នាដៃមួយជារបស់កូនស្រីរបស់អ្នកស្រី កញ្ញា ម៉ៅ ច័ន្ទរស្មី ក្រោមចំណងជើងថា «កំណត់ហេតុពណ៌ស្វាយភាគ ១»៕
