ម្សិលមិញនេះ មានបណ្ដាសិល្បករ តន្ត្រីករ តារាចម្រៀង តារាសម្ដែង ពិធីករ ពិសេសតារាដែលស្ថិតក្រោមទ្រនំហង្សមាសបានចេញមកផុសសំណេររំលែកទុក្ខចំពោះការបាត់បង់នូវអ្នកដឹកនាំជើងចាស់ដែលធ្លាប់ដឹកនាំបទចម្រៀងល្បីៗជាច្រើនគឺលោកអ៊ុំ ហ៊ុយ ពុធ។
លោកអ៊ុំ ហ៊ុយ ពុធ បានទទួលមរណភាពកាលពីវេលាម៉ោង ៨ និង ១៥នាទីយប់ត្រូវនឹងថ្ងៃទី២ ទី២ ខែកក្កដា ឆ្នាំ២០២១ ក្នុងជន្មាយុ ៨២ ឆ្នាំដោយរោគាពាធ (ឃុំសង្កាត់បញ្ជាក់ថាលោកអ៊ុំគឺអវិជ្ជមានជំងឺកូវីដ-១៩)។ សពរបស់លោកអ៊ុំត្រូវបានតម្កល់នៅគេហដ្ឋានធ្វើបុណ្យតាមប្រពៃណីនៅផ្ទះលេខ៩៣B ផ្លូវលំ ភូមិព្រះពន្លា សង្កាត់ព្រែកប្រា ខ័ណ្ឌច្បារអំពៅ។
លោកអ៊ុំ ហ៊ុយ ពុធ គឺជាអ្នកដឹកនាំជើងចាស់ដ៏មានឈ្មោះបោះសំឡេងការអនិច្ចកម្មរបស់លោកធ្វើឱ្យរង្វង់សិល្បៈខ្មែរបាត់បង់នូវធនធានដ៏មានតម្លៃមិនអាចកាត់ថ្លៃបានមួយទៀតមិនខុសពីការបាត់បង់សិល្បករជើងចាស់ជាច្រើនរូបដែលជាព្រលឹងនៃសិល្បៈជាតិកម្ពុជា។
នៅក្នុងជីវិតជាអ្នកដឹកនាំសម្ដែងរបស់លោកអ៊ុំ ហ៊ុយ ពុធ លោកអ៊ុំបានបន្សល់ទុកនូវស្នាដៃដឹកនាំជាច្រើនតាមរយៈបទចម្រៀងក្នុងផលិតកម្មហង្សមាសដូចជា «បើកសៀវភៅឃើញស្នេហ៍» ច្រៀងដោយលោក ព្រាប សុវត្ថិ ជាដើម៕
