សិល្បៈជាតិ៖ Miss Grand លំដាប់រងទី ១ ឆ្នាំ ២០២៣នេះ គឺ កុយ អេនណា កំពុងតែមានហាងឆេងដើរម៉ូដទាំងក្នុងនិងក្រៅប្រទេស ហើយក៏ត្រូវបានមហាជនចោលក្រសែភ្នែកចាប់អារម្មណ៍យ៉ាងខ្លាំងនៅពេលដើរម៉ូតក្នុងព្រឹត្តិការណ៍ Fashion show ដ៏អស្ចារ្យរបស់កំពូលអ្នករចនាម៉ូដល្បីឈ្មោះ ២ រូបដែលជាជនជាតិខ្មែរ និង ម៉ាដាហ្កាសារ។
នៅក្នុងការបើកបង្ហាញនូវបណ្តុំ Collection ថ្មីរបស់កំពូលអ្នករចនាម៉ូតទឹកដៃឯក ២ រូប នៃស្លាកយីហោសម្លៀកបំពាក់របស់ អាំប្រេ ភ្នំពេញ (Ambre Phnom Penh) និងលោក Eric Raisina ជាអ្នកច្នៃម៉ូតម៉ាដាហ្កាសារដែលមានមូលដ្ឋានប្រចាំនៅខេត្តសៀមរាប បានទាក់ទាញក្រសែភ្នែកមហាជនអ្នកចូលរួមជិត ៥០០ នាក់ ក្នុងរាជធានីភ្នំពេញកាលពីរាត្រីថ្ងៃទី ១៨ ខែវិច្ឆិកា ឆ្នាំ២០២៣។
កញ្ញា កុយ អេនណា ត្រូវបានគេចាប់អារម្មណ៍ខ្លាំង នៅពេលបានប្រទះឃើញវត្តមាននាង លេចមុខក្នុងព្រឹត្តិការណ៍ដើរបង្ហាញម៉ូតបែប Exclusive ដ៏ធំអស្ចារ្យនៅកម្ពុជា មុនដំណាច់ឆ្នាំ២០២៣។
ក្នុងចំណោមម៉ូដែលប្រុសស្រីល្បីឈ្មោះជាច្រើនរូប 1st runner up Miss Grand Cambodia 2023 រូបនេះ បានដើរបង្ហាញយ៉ាងមានទំនុកចិត្តបំផុតលើការគ្រងឈុតសម្លៀកបំពាក់ ៤ ម៉ូត ផ្សេងៗគ្នារបស់ឌីហ្សាញនើរ៍ទាំង ២ ខាងលើនេះ។ ហើយតាមការឱ្យដឹងពីអ្នករចនាម៉ូត Collection ដែលនៅលើខ្លួនរបស់អេនណា សុទ្ធសឹងជាម៉ូតពិសេសៗ ដែលឌីហ្សាញនើររបស់យើង បានជ្រើសរើស និងរៀបចំសម្រាប់នាងផងដែរ។
ព្រឹត្តិការណ៍ Fashion Show មួយនេះ បានបញ្ចប់ទៅយ៉ាងជោគជ័យជាមួយនឹងការប្រមូលម្តុំនូវភ្ញៀវលំដាប់ VIP និងអ្នកមានមុខមាត់ក្នុងវិស័យហ្វេស្សិនយ៉ាងច្រើនកុះករចូលរួមយ៉ាងមិននឹកស្មានដល់ ដើម្បីអបអរចំពោះសមិទ្ធផលថ្មីនៃការច្នៃឈុតសម្លៀកបំពាក់ដ៏រស់ររើក ប្រកបដោយប្រណីតភាព របស់កំពូលអ្នករចនាម៉ូតសម្រាប់ Ambre និង Eric Raisina ប្រចាំឆ្នាំ២០២៣ -២០២៤៕
