សិល្បៈអន្តរជាតិ៖ តួស្រី Nanno ក្នុងភាពយន្ត «Girl from Nowhere» គឺនាង Kitty Chicha បានលេចវត្តមានយ៉ាងភ្ញាក់ផ្អើលនៅក្នុងកម្មវិធី មហោស្រពភាពយន្តអន្តរជាតិ StarS Asian International Film Festival StarS Gala 2023 ដែលធ្វើឡើងនៅក្នុងទីក្រុង Los Angeles រដ្ឋ California កាលពីពាក់កណ្ដាលខែវិច្ឆិកា។
តាមរយៈកម្មវិធីនេះ អ្នកគាំទ្រចាប់អារម្មណ៍ឃើញតារាស្រី Kitty Chicha Amatayakul ផ្លាស់ប្ដូររូបរាងយ៉ាងគួរឱ្យព្រួយបារម្ភ ដោយសភាពរូបរាងរបស់នាងមើលទៅស្គមរីងរៃដូចមនុស្សកំពុងមានជំងឺធ្ងន់ធ្ងរ។ អ្នកគាំទ្រមានការព្រួយបារម្ភអំពីសុខភាពរបស់នាងជាងខ្លាំង រហូតដល់គ្រប់គ្នាសួរដេញដោលពីស្ថានភាពសុខភាពសព្វថ្ងៃរបស់នាង។
យ៉ាងណាមិញ សារព័ត៌មានថៃបានចេញផ្សាយពីការពិតនៃដែលជាមូលហេតុធ្វើឱ្យរាងកាយរបស់តួស្រីរូបនេះមានសភាពស្គមស្ដើងឱ្យអ្នកគាំទ្រអស់ចម្ងល់ នោះក៏ដោយសារតែនាងទទួលថតរឿងភាគថ្មីរបស់ផលិតកម្មបរទេសមួយ។
ប្រភពដដែលបានទម្លាយថា Kitty Chicha Amatayakul កំពុងសម្ងំថតរឿងភាគដែលមានចំណងជើងថា The Evil Sea ដែលតម្រូវឱ្យនាងសម្រកគីឡូឱ្យដូចតួអង្គដែលបីសាចដែលមើលទៅមានស្បែកដណ្ដប់ឆ្អឹងតែប៉ុណ្ណោះ។ ដោយឡែក ដំណឹងចុងក្រោយនេះ មិនមានការបញ្ជាក់ឱ្យច្បាស់នោះទេថា តួស្រី Nanno នៅក្នុងរឿងភាគថ្មីនេះ សម្រកទម្ងន់អស់ប៉ុនា្មនគីឡូឱ្យប្រាកដ។
សូមជម្រាបថា រឿងភាគថ្មី The Evil Sea ជាប្រភេទរឿងភាគបែបរន្ធត់ ដែលត្រូវបានផលិតដោយផលិតករចិនអាមេរិក Peter Luo ដែលជាផលិតករមានមូលដ្ឋាននៅ Beverly Hills រដ្ឋ California និងដឹកនាំរឿងដោយលោក Frank Shang ដោយប្រមូលតារាល្បីៗពីប្រទេសចិន និងថៃ មកចូលរួមសម្ដែង៕