សិល្បៈជាតិ៖ ក្រោយការប្រកួតយ៉ាងស្វិតស្វាញអស់ជាច្រើនសប្ដាហ៍កន្លងមក ទីបំផុតកម្មវិធីកម្រិតពិភពលោក Cambodia’s Got Talent រដូវកាលទី៣ កាលពីថ្ងៃទី២០ ខែវិច្ឆិកា បានស្វែងរកឃើញជើងឯកដែលបានបង្កើតកំណត់ត្រាជាប្រវត្តិសាស្ត្រថ្មីលើឆាកប្រកួតដ៏ធំនិងអស្ចារ្យ ក្លាយជាម្ចាស់ជ័យលាភី នៅក្នុងឆ្នាំ២០២៣ នេះហើយ ដោយបានទៅលើក្រុមរាំ ដែលមានសមាជិក៩រូប គឺ MJM។ យ៉ាងណាមិញជោគជ័យរបស់ក្រុមនេះមានទាំងអ្នកអបអរសាទរ ស្ញើចសរសើរចំពោះទេពកោសល្យពួកគេ និងមានទាំងអ្នករិះគន់មិនសូវពេញចិត្តចំពោះលទ្ធផលនេះ។
ប្រាកដណាស់បេក្ខជននីមួយៗ មួយក្រុមៗ តែងតែមានហ្វេននិងអ្នកគាំទ្ររៀងៗខ្លួន ដូច្នេះហើយសម្រាប់អ្នកគាំទ្រ MJM ច្បាស់ជាសប្បាយចិត្ត ចំណែកបេក្ខជនដែលមិនបានទទួលជ័យលាភីប្រាកដជាអន់ចិត្ត ដែលរឿងនេះរមែងកើតមានឡើងគ្រប់ការប្រកួតដោយចៀសមិនរួច។ អ្វីដែលជាការចាប់អារម្មណ៍នោះគឺមានអ្នកគាំទ្ររបស់បេក្ខជន ឌួង សុវណ្ណារិទ្ធ វ័យ១៣ឆ្នាំ ដែលជាកុមារាមានសមត្ថភាពចងចាំអច្ឆរិយៈ បានបង្ហាញអារម្មណ៍សោកស្ដាយ និងមិនអន់ចិត្ត ដែលប្អូនមិនអាចទទួលបានជោគជ័យក្លាយជាម្ចាស់ពាននៅក្នុងវគ្គផ្ដាច់ព្រ័ត្រនារដូវកាលទី៣នេះ។
ក្នុងនោះអ្នកគាំទ្របានបញ្ចេញមតិចចំពោះករណីខាងលើនេះថា៖ «រាំចុះរាំឡើងក្លាយជាជ័យលាភី Got’s Talent សម្រាប់ខ្ញុំគិតថា ធម្មតា អ្នកណាក៏ធ្វើបាន តែសម្រាប់ក្មួយប្រុសដែលមានការចងចាំដែលមិនងាយមានអ្នកណាធ្វើដូចបែរជាគ្មានសមត្ថភាពសម្រាប់ឈ្នះជ័យលាភីទៅវិញ។ តើ Got Talent មានន័យដូចម្ដេច?
បន្ទាប់ពីមានការលើកឡើងដូចបានរៀបរាប់នេះ មានអ្នកដែលសោកស្ដាយសមត្ថភាពរបស់ កុមារា ឌួង សុវណ្ណារិទ្ធ ជាច្រើនរូបបានបង្ហាញការយល់ឃើញគាំទ្រទាំងស្រុងទៅលើការបញ្ចេញជាមតិមួយនេះ សូម្បីតែលោក ឌួង វុទ្ធី ឬមានគណនីហ្វេសប៊ុកថា Vothy Doung Mbs ក៏បានចេញមកសម្ដែងចំណាប់អារម្មណ៍ផ្ទាល់ខ្លួន ជាមួយនឹងសំណេរខ្លីតែមានបង្កប់អត្ថន័យយ៉ាងស៊ីជម្រៅថា៖ «កូននៅក្មេងណាស់ គេមិនអាចជឿកូនទេ! នេះហើយសង្គមរបស់កូន! នេះហើយជាប្រទេសរបស់កូន!»។ ដែលការលើកឡើងរបស់លោកនេះ បង្កើតឱ្យមានមតិចម្រូងចម្រាស ក៏ដូចជាការវែកញែកផ្សេងៗពីគ្នា ដោយមានទាំងអ្នកគាំទ្រ និងអ្នកមិនគាំទ្រ។
ចំពោះអ្នកគាំទ្របានលើកឡើងថា៖ «ខ្ញុំសោកស្ដាយខ្លាំងណាស់ ខ្ញុំមានសង្ឃឹមថាសុវណ្ណារិទ្ធ នឹងជាប់តែបែរជាក្រុមរាំឯណាវិញខឹងដេកអត់លក់ម៉ង»។ ប្រកាច់ចុះប្រកាច់ឡើងពេញឆាកបានលើកពាន សែនអាណិតប្អូនប្រុស ឌួង សុវណ្ណារិទ្ធណាស់ ទាំងឆ្លាត ទាំងពូកែ បែកជាមិនទទួលបានលទ្ធផលល្អ សួរថា តើមានក្មេងដូចជាគាត់ប៉ុន្មាននាក់ ដែលមានការចងចាំល្អដូចជាគាត់ ស្រុកខ្មែរយើង ខ្ញុំហ៊ាននិយាយថា គ្មានការអោយតម្លៃចំពោះការសិក្សាទេ បើប្រទេសជិតខាងវិញ សឹងតែរាជរដ្ធាភិបាលរបស់គេយកទៅរក្សានឹងទំណុកបំរុងដើម្បីពង្រឹងសមត្ថភាពបន្ថែមទៀត ព្រោះជាធនធានកំរ ដែលមនុស្សជាច្រើនមិនអាចធ្វើបាន។
ដោយឡែកអ្នកដែលមិនគាំទ្រការលើកឡើងរបស់ឪពុកបេក្ខជន ឌួង សុវណ្ណារិទ្ធ បានលើកជាហេតុផលមកបញ្ជាក់ដែរថា៖ «ការរាំអ្នកណាក៏ចេះ តែបើធ្វើអោយ Professional នឹងមានការឆ្នៃប្រឌិតខ្ញុំគិតថាមានតិចណាស់នៅកម្ពុជាព្រោះវាមិនមែនជាការងាយស្រួលនោះទេ។ ខ្ញុំទទួលស្គាល់ថាប្អូនប្រុសនោះគាត់ពិតជាមានTalented លើការចងចាំខ្លាំងពិតមែន តែខ្ញុំបកមកនិយាយពីការរាំវិញថាទាមទារបែបមិចខ្លះ៖
-ការរាំត្រូវមានការអត់ធ្មត់ខ្លាំង
-ត្រូវការការចងចាំខ្ពស់
-ត្រូវចេះស្តាប់ចង្វាក់ភ្លេងអោយច្បាស់(មិនមែនចេះតែលើកដៃលើកជើងទេ)
-ត្រូវការប្រើអារម្មណ៍នឹងខួរក្បាលមកបំបែកក្បាច់រាំនឹងរៀបចំកាឡាអោយត្រូវគ្នា
-ទាមទារការឆ្នៃប្រឌិតខ្ពស់ទើបការងារនឹងកាន់តែ Professional
-ប្រើកំលាំងនឹងខួរក្បាលបូកបញ្ចូលគ្នាទើបអាចរាំបាន(ភ្នែក ត្រចៀក នឹងខួរក្បាលត្រូវរហ័សរហួន ទើបអាចបត់បែនតាមស្ថានការកើតឡើង)
ទាំងនេះជាបទពិសោធន៍របស់ខ្ញុំរយះពេល10ឆ្នាំជាងនៅលើវិស័យសិល្បះរាំមួយនេះ ( ហើយបើអ្នករាំរបាំបុរាណទៀតគឺកាន់តែពិបាកជាងពួកខ្ញុំទៀតព្រោះពួកគាត់ត្រូវការប្រើពេលហាត់រៀនយូរណាស់ទើបរាំបានស្អាត)
មួយវិញទៀតស្រុកខ្ញុំពិតជាមិនអោយតំលៃលើការងារមួយនេះពិតមែន ចាត់ទុកថាខ្ញុំសំណាងក៏បានដែលបានធ្វើការជាមួយមនុស្សស្គាល់ពីការលំបាកនឹងអោយតំលៃខ្លាំងលើការងារពួកខ្ញុំ
»។
គួរដឹងថាកុមារា ឌួង សុវណ្ណារិទ្ធ គឺជាមនុស្សមានសមត្ថភាពចងចាំអច្ឆរិយៈដែលអាចចងចាំតួលេខបានយ៉ាងច្បាស់ល្អ បើទោះបីជាត្រូវគេសួរបន្លប់យ៉ាងណាក៏គេនៅតែអាចឆ្លើយតបបានយ៉ាងត្រឹមត្រូវឥតខ្ចោះ។ កុមារាវ័យត្រឹម១៣ឆ្នាំរូបនេះ គឺជាបេក្ខជនដ៏លេចធ្លោមួយរូបនៃកម្មវិធី Cambodia’s Got Talent រដូវកាលទី៣ ដែលអាចឡើងមកដល់វគ្គផ្ដាច់ព្រ័ត្រដណ្ដើមជយលាភីជាមួយជើងខ្លាំងផ្សេងទៀត ទោះជាមិនទទួលបានពានក្ដី៕
