សិល្បៈជាតិ៖ ថ្មីៗនេះ តារាចម្រៀងប្រុស យ៉ែម សំអូន ស្រាប់តែចេញមកហែកស្រោមមុខអ្នកនាង ម៉េង កែវពេជ្ជចិន្ដា ឱ្យមហាជនបានដឹងការពិតថា លោក បានចាត់ទុកអ្នកនាង ម៉េង កែវពេជ្ជតា ជាគ្រូលាក់មុខម្នាក់នៅក្នុងដួងចិត្ត។
នៅក្នុងសំណេរដ៏មានន័យរបស់លោក យ៉ែម សំអូន បានរៀបរាប់ឱ្យដឹងថា កំពូលតារាចម្រៀងជើង ចាស់អ្នកនាង ម៉េង កែវពេជ្ជតា ជាអ្នកមានគុណធ្លាប់ជួយជ្រោមជ្រែងឲ្យលោកជោគជ័យ និងទទួលបានផ្លែផ្កាមកដល់សព្វថ្ងៃនេះ។
ផ្អែកតាមការបង្ហោះរបស់លោកតារាចម្រៀងលោក យ៉ែម សំអូន បានរៀបរាប់នៅលើបណ្ដាញសង្គមហ្វេសប៊ុកយ៉ាងដូច្នោះ៖ «My only one idol គាត់ ជាគ្រូលាក់មុខរបស់ខ្ញុំ ដែលកំពូលសមត្ថភាពរបស់គាត់ធ្វើឱ្យខ្ញុំរៀនតាម និងទទួលបានផ្លែផ្កាជោគជ័យមកដល់រាល់ថ្ងៃនេះ ខ្ញុំសូមគោរពតបស្នងគុណរបស់រៀមច្បង ដោយការថែរក្សា កេរ្តិ៍តម្លៃ ដ៏ថ្លៃថ្លា មិនអាចកាត់ថ្លៃបាននេះរហូត»។
យ៉ាងណាមិញ គេនៅចាំបានថា នៅក្នុងព្រឹត្តិការណ៍វេទិកាមហោស្រពប្រឡងចម្រៀងសកល កាលពីឆ្នាំ២០១៩ លោក យ៉ែម សំអូន បានច្រៀងឆ្លងឆ្លើយម្នាក់មួយបទជាមួយ អ្នកនាង ម៉េង កែវពេជ្ជចិន្តា នូវបទ «ថ្នម» របស់អធិរាជសំឡេងមាស ស៊ីន ស៊ីសាមុត គឺទទួលបានការកោតសសើរពីសំណាក់មហាជនទាំងក្នុងប្រទេស និងអន្តរជាតិ ដោយពួកគេលើកឡើងពីការសម្ដែងមានភាពល្អឥតខ្ចោះ ហើយសំនៀងទៀតសោតក៏ស្រទន់ពីរោះរណ្ដំចិត្ត និងជាពិសេសតិចនិកក្នុងច្រៀងដោយមានបច្ចេកខ្ពស់ដែលកម្រឃើញសិល្បករជំនាន់ក្រោយមានសមត្ថភាពពិសេសនេះដូច។
ពិតមែនហើយ រាជិនីសំឡេងផ្អែម ម៉េង កែវពេជ្ជតា ត្រូវបានមហាជន និងអ្នកសិល្បៈចាត់ទុកថា ជារៀមច្បងផ្នែកសិល្បៈចម្រៀងមួយរូបដែលពោរពេញទៅដោយបទពិសោធន៍ពេញខ្លួន។ ហើយអ្នកនាងក៏ជាតារាចម្រៀងស្រីដែលនាំមុខគេ ក្នុងការចេញបទចម្រៀងជាច្រើនអាល់ប៊ុមដែលសុទ្ធសឹងតែជាបទល្បីៗប្រចាំប្រទេស។ ក្រៅពីនោះ អ្នកនាងក៏ត្រូវបានអន្តរជាតិទទួលស្គាល់ថា ជាតារាចម្រៀងស្រីប្រចាំប្រទេសកម្ពុជាដែលមានឈ្មោះបោះសំឡេង។
ចំពោះតារាចម្រៀងប្រុស លោក យ៉ែម សំអូន វិញ ក៏ត្រូវបានមហាជនចាត់ទុកថា ជាតារាប្រុសដ៏មានប្រជាប្រិយភាពម្នាក់ដែលជោគជ័យទាំងការងារសិល្បៈ និងមុខជំនួញ។ ក្រៅពីបម្រើអារម្មណ៍មហាជនដោយសំនៀងដ៏ផ្អែមមុតហើយនោះ លោក យ៉ែម សំអូន ក៏មានក្រុមហ៊ុនតន្ត្រីសម័យ Dara Entertainment ដែលផ្ដល់សេវាកម្មផ្នែកតន្ត្រី និងអ្នកចម្រៀង ជូនមហាជននៅតាមបណ្ដាកម្មវិធីផ្សេងៗ គ្រប់ទីកន្លែងផងដែរ៕